ಚನ್ನಪಟ್ಟಣ:ಏ/೨೬/೨೦/ಭಾನುವಾರ. ಹನ್ನೆರಡನೇ ಶತಮಾನದಲ್ಲಿ ಯೇ ಸಮಾನತೆ ಸಾರಿದ, ಕಳಬೇಡ, ಕೊಲಬೇಡ, ಹುಸಿಯ ನುಡಿಯಲು ಬೇಡ ಎಂಬ ವಚನದಿಂದ ಇಂದಿಗೂ ಮನೆಮಾತಾದ, ಅಹಿಂಸೆಯನ್ನು ಪ್ರತಿಪಾದಿಸಿದ ಶ್ರೀ ಬಸವಣ್ಣ ನವರ ಹೆಸರಿನಲ್ಲಿ ಆಚರಿಸುವ ಜಯಂತಿಯೇ ಬಸವ ಜಯಂತಿ. ಬಾಳೆಲ್ಲಾ ಅಕ್ಷಯವಾಗಲೆಂದು ಆಚರಿಸುವ ಅಕ್ಷಯ ತೃತೀಯ ಹಬ್ಬವೂ ಇಂದೆ ಬಂದಿದ್ದು ಈ ದಿನ ಹಿಂಸೆ ನಿಷಿದ್ದವಾಗಿದೆ.

ನಗರಸಭೆಯವರು ಈ ದಿನ ಮಾಂಸದಂಗಡಿಗಳು ತೆರೆಯಬಾರದೆಂಬ ನೋಟೀಸ್ ನೀಡಿದ್ದರೂ ಸಹ ಬಹುತೇಕ ಕೋಳಿ ಮತ್ತು ಮಾಂಸದಂಗಡಿಗಳು ತೆರೆದು ಅವರಿಗಿಷ್ಟ ಬಂದ ದರಕ್ಕೆ ಮಾರಿದ್ದಾಗಿ ದೂರುಗಳು ಬಂದಿವೆ.

ಕೆಲವು ಅಂಗಡಿಗಳವರು ಕದ್ದುಮುಚ್ಚಿ ತೆರೆದರೆ, ಕೆಲ ಅಂಗಡಿಗಳು ರಾಜಾರೋಷವಾಗಿಯೇ ಬಾಗಿಲು ತೆರೆದು ವ್ಯಾಪಾರ ಮಾಡಿದ್ದರು, ಕೆಲ ಹೆಸರುವಾಸಿಯಾದ ಅಂಗಡಿಗಳ ಮಾಲೀಕರು ಅಂಗಡಿಯ ಹಿಂಭಾಗದಲ್ಲಿ, ಕೆಲ ಗ್ರಾಹಕರಿಗಷ್ಟೇ ಮಾಹಿತಿ ನೀಡಿ ಭರ್ಜರಿ ವ್ಯಾಪಾರ ಮಾಡಿದ್ದಾರೆ.

ಕೋಳಿ ಮಾಂಸದ ದರ ಪತ್ರಿಕೆಯಲ್ಲಿರುವುದಕ್ಕಿಂತ ಹತ್ತರಿಂದ ಇಪ್ಪತ್ತು ರೂಪಾಯಿಗಳಿಗೂ ಹೆಚ್ಚು ದರ ನಿಗದಿ ಪಡಿಸಿದರೆ, ಮೀನು ಮಾರಾಟದ ಅಂಗಡಿಗಳ ಮುಂದೆ ಜನ ಸಂದಣಿಯೇ ನೆರೆದಿತ್ತು. ಮೇಕೆ ಮತ್ತು ಕುರಿ ಮಾಂಸದಂಗಡಿಗಳ ಮಾಲೀಕರು ಗ್ರಾಹಕರ ಮುಖ ನೋಡಿ ದರ ನಿಗದಿಪಡಿಸಿ ವ್ಯಾಪಾರ ಮಾಡಿದ್ದು, ೫೫೦ ರೂಪಾಯಿಗಳಿಂದ ೭೦೦ ರೂಪಾಯಿವರೆಗೂ ದರ ನಿಗದಿಪಡಿಸಿದ್ದು ಭರ್ಜರಿ ಲಾಭ ಮಾಡಿಕೊಂಡಿದ್ದಾರೆ ಎಂದು ಮಾಂಸ ಖರೀದಿಸಿದ, ಹೆಸರೇಳಲಿಚ್ಚಿಸದ ಗ್ರಾಹಕರುಗಳು ಮಾಹಿತಿ ನೀಡಿದ್ದಾರೆ.

*ನಗರಸಭೆಯ ಅಧಿಕಾರಿಗಳು ಹಲವಾರು ವಿಷಯಗಳಲ್ಲಿ ನೋಟೀಸಿಗಷ್ಟೇ ಸೀಮೀತವಾಗಿದ್ದು, ಪರೀಕ್ಷಿಸಲು ಮುಂದಡಿ ಇಡುವುದೇ ಇಲ್ಲ. ದೂರುಗಳು ಬಂದಾಗಲಷ್ಟೇ ಪರೀಕ್ಷಿಸುವ ಶಾಸ್ತ್ರ ಮಾಡಿ ಕೈತೊಳೆದುಕೊಳ್ಳುತ್ತಾರೆ. ಎಷ್ಟೋ ಅಂಗಡಿಗಳಿಗೆ ಕನಿಷ್ಠ ಪರವಾನಗಿಯೂ ಇಲ್ಲದಿರುವುದು ದುರದೃಷ್ಟಕರ.*

ನಗರಸಭೆಯಿಂದ ಮಾಂಸದಂಗಡಿಗಳಿಗೆ ನೋಟೀಸ್ ಜಾರಿ ಮಾಡಿದ್ದೇವೆ. ಇಂದು ಪರಿಶೀಲಿಸಿ ಸೂಕ್ತ ಕ್ರಮ ಕೈಗೊಳ್ಳುತ್ತೇವೆ.

ನಾಳೆ ತಹಶಿಲ್ದಾರ್ ರವರ ಸಮ್ಮುಖದಲ್ಲಿ ಮಾಂಸದಂಗಡಿಗಳ ಮಾಲೀಕರನ್ನು ಕರೆದು ಸಭೆ ನಡೆಸಿ ದರ ನಿಗದಿಪಡಿಸಿ, ಅಂಗಡಿಯ ಮುಂದೆ ಬರೆಯುವಂತೆ ಸೂಚಿಸುತ್ತೇವೆ.

*ಶಿವನಂಕಾರಿಗೌಡ, ಪೌರಾಯುಕ್ತರು. ನಗರಸಭೆ ಚನ್ನಪಟ್ಟಣ.*

ನಾವು ನಗರದ ಎಲ್ಲಾ ಮಾಂಸದಂಗಡಿಗಳ ಮಾಲೀಕರಿಗೆ ನೋಟೀಸ್ ನೀಡಿದ್ದು, ಯಾವುದೇ ಅಂಗಡಿಗಳು ತೆರೆದಿಲ್ಲ. ಒಂದು ಮೀನು ಮಾರಾಟದ ಅಂಗಡಿ ತೆರೆದಿದ್ದು ತೂಕದ ತಕ್ಕಡಿಯನ್ನು ವಶಪಡಿಸಿಕೊಂಡಿದ್ದೇವೆ. ಮತ್ತೆ ಕಂಡುಬಂದರೆ ಸೂಕ್ತ ಕ್ರಮ ಜರುಗಿಸಲಾಗುವುದು.

*ವರಲಕ್ಷ್ಮಿ ಆರೋಗ್ಯಾಧಿಕಾರಿ, ನಗರಸಭೆ.*

ಗೋ ರಾ ಶ್ರೀನಿವಾಸ...

ಮೊ:9845856139.