ಚನ್ನಪಟ್ಟಣ:ಮೇ:೧೨/೨೦/ಮಂಗಳವಾರ. ಕೊರೊನಾ (ಕೋವಿಡ್-೧೯) ಬಂದ ನಂತರ ಕೊರೊನಾ ಸೋಂಕು ತಗುಲಿದ ಕೆಲ ಕಿಡಿಗೇಡಿ ಮುಸ್ಲಿಂ ರು ಹಣ್ಣು, ಹಾಲು, ತರಕಾರಿ ಉಡುಪು ಸೇರಿದಂತೆ ಅನೇಕ ಉತ್ಪನ್ನಗಳ ಮೇಲೆ ತೋರಿದ ವಿಕೃತಿಯಿಂದ ಅನೇಕ ಸಣ್ಣ ಸಣ್ಣ ವ್ಯಾಪಾರಸ್ಥ ಮುಸ್ಲಿಮರು ಇಂದು ನಷ್ಟ ಅನುಭವಿಸುತ್ತಿರುವುದು ಸ್ಪಷ್ಟವಾಗಿದೆ.

ಸದ್ಯ ತಾಲ್ಲೂಕು ಮತ್ತು ಕೇಂದ್ರಾಡಳಿತ ಪ್ರದೇಶವಾದ ನಗರದ ಡಿ ಟಿ ರಾಮು ವೃತ್ತ, ಸಾತನೂರು ವೃತ್ತ, ಅಂಚೆ ಕಛೇರಿ ರಸ್ತೆ, ಎಂ ಜಿ ಮತ್ತು ಜೆ ಸಿ ರಸ್ತೆಗಳಲ್ಲಿ, ತಳ್ಳು ಗಾಡಿಗಳು ಮತ್ತು ಆಟೋಗಳಲ್ಲಿ ಹಣ್ಣು ಮತ್ತು ತರಕಾರಿಗಳ ಮಾರಾಟ ಮಾಡುತ್ತಿರುವುದು ಇಂದಿಗೂ ಕಂಡು ಬರುತ್ತಿದೆಯಾದರು ವ್ಯಾಪಾರಸ್ಥರ ಮೊಗದಲ್ಲಿ ಕೊರೊನಾ ಗಿಂತ ಮೊದಲಿದ್ದ ನಗು ಮತ್ತು ವ್ಯಾಪಾರ ಎರಡು ಇಲ್ಲವಾಗಿರುವುದು ಗೋಚರಿಸುತ್ತಿದೆ.

ಕೊರೊನಾ ಬಂದ ನಂತರ ಬೇರೆಲ್ಲಾ ಸಮುದಾಯದವರು ಮುಸ್ಲಿಂ ಸಮುದಾಯದವರ ಬಳಿ ತಿನ್ನುವ ಪದಾರ್ಥಗಳನ್ನು ಖರೀದಿಸುವುದನ್ನು ಕಡಿಮೆ ಮಾಡಿರುವುದರಿಂದ ವ್ಯಾಪಾರದಿಂದಲೇ ತಮ್ಮ ದಿನನಿತ್ಯದ ಬದುಕನ್ನು ಕಟ್ಟಿಕೊಂಡಿರುವ ಮುಸ್ಲಿಮ್ ವ್ಯಾಪಾರಿಗಳ ಬದುಕು ಇಂದು ಅತಂತ್ರ ಸ್ಥಿತಿಯಲ್ಲಿದೆ. ತಿಳುವಳಿಕೆಯುಳ್ಳ ಅನೇಕರು ಇಂದಿಗೂ ಅವರ ಬಳಿ ಖರೀದಿಸುತ್ತಿರುವುದು ಸಂತೋಷದಾಯಕವಾದರು ಅಗತ್ಯ ವಸ್ತುಗಳನ್ನು ಎಲ್ಲಾ ಸಮುದಾಯದವರು ಅವರ ಬಳಿ ಖರೀದಿಸಿ ಅವರ ಬದುಕಿಗೆ ನೆರವಾಗಬೇಕಾಗಿದೆ.

ಇಲ್ಲಿ ವ್ಯವಸ್ಥೆಯೇ ಕೆಟ್ಟದ್ದಾಗಿದೆ, ಯಾರನ್ನೂ ದೂರಲಾಗುತ್ತಿಲ್ಲ, ನಮಗೆ ನಂಬಿಕೆಯಷ್ಟೇ ಮುಖ್ಯ, ಸ್ಥಳೀಯವಾಗಿ ಯಾರೂ ಸಹ ಇಂತಹ ಕುಕೃತ್ಯ ಎಸಗುತ್ತಿಲ್ಲ, ಎಸಗುವುದಿಲ್ಲ. ಎಲ್ಲರೂ ನಮ್ಮವರೆಂದು ಗುರುತಿಸಿ ಸಹಾಯ ಹಸ್ತ ಚಾಚಬೇಕಿದೆ.
ನಿಜಾಮ್ ಫೌಜದಾರ್, ಕಾಂಗ್ರೆಸ್ ಮುಖಂಡರು

ಎಲ್ಲಾ ಧರ್ಮಗಳಲ್ಲೂ ಒಳ್ಳೆಯವರು ಕೆಟ್ಟವರು ಇರುತ್ತಾರೆ, ಕೆಟ್ಟವರನ್ನು ಗುರುತಿಸಿ ಧಾರ್ಮಿಕ ಮತ್ತು ರಾಜಕೀಯ ಮುಖಂಡರು ಅವರನ್ನು ಸರಿದಾರಿಗೆ ತರಬೇಕು. ಯಾರೋ ಒಬ್ಬರು ಮಾಡಿದ ತಪ್ಪಿಗೆ ಸಮುದಾಯವನ್ನೇ ಅನುಮಾನಿಸುವುದು ತಪ್ಪು. ಎಲ್ಲಾ ಸಮುದಾಯದವರು ಅವರ ಬಳಿ ದಿನನಿತ್ಯದ ವಸ್ತುಗಳನ್ನು ಖರೀದಿಸುವ ಮೂಲಕ ಬಡ ಮುಸ್ಲಿಂ ವ್ಯಾಪಾರಸ್ಥರಿಗೆ ನೆರವಾಗಬೇಕು.
ವಾಸೀಲ್ ಅಲಿಖಾನ್. ಎಪಿಎಂಸಿ ನಿರ್ದೇಶಕರು.

ಮಾನವ ಧರ್ಮ ಎಲ್ಲರಿಗೂ ಒಂದೇ, ಯಾರೋ ‌ಅಧರ್ಮಿಗಳು ಮಾಡಿದ ಕುಕೃತ್ಯಕ್ಕೆ ಇಡೀ ಸಮುದಾಯವನ್ನು ದೂರುವುದು ಸರಿಯಲ್ಲ. ಮುಸ್ಲಿಂ ಸಮುದಾಯದ ದೊಡ್ಡ ದೊಡ್ಡ ಪ್ರಮಾಣದ ವ್ಯಾಪಾರಸ್ಥರಿಗೆ ಹೊಡೆತ ಬೀಳುತ್ತಿಲ್ಲ. ಸಣ್ಣಪುಟ್ಟ ವ್ಯಾಪಾರಿಗಳಿಗೆ ಈ ಹೊಡೆತ ಬೀಳುತ್ತಿದ್ದು, ಅವರ ಬಳಿ ಎಲ್ಲರೂ ಖರೀದಿಸುವ ಮೂಲಕ ಮಾನವ ಧರ್ಮ ದೊಡ್ಡದು ಎಂದು ಸಾರಬೇಕಿದೆ.

ಉಜ್ಮಾ ಇಶ್ರತ್, ನಗರಸಭೆ ಮಾಜಿ ಸದಸ್ಯೆ.

ಕೊರೊನಾ ಬರುವ ಮೊದಲು ಬೇಧ ಭಾವ ಇಲ್ಲದೆ ಎಲ್ಲರೂ ಖರೀದಿಸುತ್ತಿದ್ದರು, ಕೊರೊನಾ ನಂತರ ಹಿಂದುಮುಂದು ನೋಡುತ್ತಿದ್ದು, ಮೊದಲಿನ ವ್ಯಾಪಾರ ನಡೆಯುತ್ತಿಲ್ಲ. ಹಣ್ಣುಗಳನ್ನು ಶೇಖರಿಸಿಡಲಾಗುವುದಿಲ್ಲ. ಕೊಳೆತು ಹೋಗುತ್ತಿದ್ದು ದಿನದ ಖರ್ಚಿಗೂ ಹಣ ಸಿಗುತ್ತಿಲ್ಲ. ಆದರೆ ಇತ್ತೀಚಿಗೆ ಬಹುತೇಕ ಎಲ್ಲರೂ ಬಂದು ಖರೀದಿಸುತ್ತಿರುವುದು ಸಂತೋಷದಾಯಕ.
ಅಲೀಂ ಮತ್ತು ಅಫೀರ್, ಹಣ್ಣು ವ್ಯಾಪಾರಸ್ಥರು.

ಗೋ ರಾ ಶ್ರೀನಿವಾಸ...

ಮೊ:9845856139.