ಚನ್ನಪಟ್ಟಣ:೦೯/೨೦/ಮಂಗಳವಾರ. ನಗರಸಭೆಯ ಕೂಗಳತೆ ದೂರದಲ್ಲಿರುವ ಹಲವಾರು ಜನಪಯೋಗಿ ವಸ್ತುಗಳ ಮಾರುಕಟ್ಟೆ ಎಂದೇ ಅನಾದಿ ಕಾಲದಿಂದಲೂ, ಜನಮಾನಸದಲ್ಲಿ ಉಳಿದುಕೊಂಡು ಬಂದಿರುವ ಎಂಜಿ ರಸ್ತೆ ಮತ್ತು ಜೆಸಿ ರಸ್ತೆಯ ಕೂಡುವಿಕೆ ಬಳಿಯ, ನಿಂಬೆ ಹಣ್ಣು ವೃತ್ತದಲ್ಲಿರುವ ನಿಡಘಟ್ಟ ಅಣ್ಣೇಗೌಡ ರ ಬಿಲ್ಡಿಂಗ್ ನ ಹಿಂಭಾಗದಲ್ಲಿ ಕಾಡಿನ ಗಿರಿಯಂತೆ ಬೆಳೆದು ನಿಂತಿದೆ ಕಸದ ರಾಶಿ.

ಕನಿಷ್ಠ ಇಪ್ಪತ್ತು ಟ್ರ್ಯಾಕ್ಟರ್ ನಷ್ಟು ಕಸ ಅಲ್ಲಿರಬಹುದು ಎಂದು ಅಣ್ಣೇಗೌಡ ಬಿಲ್ಡಿಂಗ್ ನ ವ್ಯಾಪಾರಸ್ಥರು ಅಂದಾಜಿಸಿ ಹೇಳುತ್ತಾರೆ. ಆದರೆ ಅಂಗಡಿಗಳ ಮಾಲೀಕರಾಗಲಿ, ಸುತ್ತಲೂ ವಾಸಿಸುತ್ತಿರುವ ನಿವಾಸಿಗಳಾಗಲಿ, ದಿನನಿತ್ಯ ವ್ಯಾಪಾರ ವಹಿವಾಟಿಗಾಗಿ ಬರುವ ಸಹಸ್ರಾರು ಮಂದಿ ಗ್ರಾಹಕರಾಗಲಿ ಈ ಕಸದ ರಾಸಿಯ ಬಗ್ಗೆ ಚಕಾರ ಎತ್ತದಿರುವುದು ನಗರಸಭೆಯವರಿಗೆ ವರದಾನವಾಗಿರಬಹುದು.

ಈ ಕಸದ ರಾಸಿಯು ಅಂಗಡಿಮುಂಗಟ್ಟುಗಳ ಕಸವೋ ? ಅಥವಾ ನಗರಸಭೆಯ ಮಂದಿಯೇ ಇಲ್ಲಿ ಕಸ ತಂದು ಸುರಿದಿರಬಹುದೇ ! ಎಂಬ ಅನುಮಾನವು ಈ ಕಸದ ಗುಡ್ಡೆಯನ್ನು ನೋಡಿದಾಗ ಅನುಮಾನ ಮೂಡುವುದು ಸಹಜ.

ಆದರೆ ಇಷ್ಟೊಂದು ಕಸ ಗುಡ್ಡೆಯಾದರೂ ನಗರಸಭೆಯ ಸಿಬ್ಬಂದಿಗಳಿಗಾಗಲಿ, ಆರೋಗ್ಯ ಅಧಿಕಾರಿಗಳಿಗಾಗಲಿ, ಪೌರಾಯುಕ್ತ ಶಿವನಂಕಾರಿಗೌಡರಿಗಾಗಲಿ ಗೋಚರಿಸದಿರುವುದು ಅವರ ಸೂಕ್ಷ್ಮಾಂಗಗಳು ಕೆಲಸ ನಿರ್ವಹಿಸುತ್ತಿದ್ದಾವೆಯೇ ಎಂಬುದನ್ನು ಪರೀಕ್ಷಿಸಿಕೊಳ್ಳಬೇಕಿದೆ.

ಮೊದಲು ಅಣ್ಣೇಗೌಡ ರ ಕುಟುಂಬದವರೇ ಎರಡು ತಿಂಗಳಿಗೊಮ್ಮೆ ತೆಗೆದುಕೊಂಡು ಹೋಗುತ್ತಿದ್ದರು.

ಕಳೆದ ಏಳೆಂಟು ತಿಂಗಳಿಂದ ಅವರು ತುಂಬಿಕೊಂಡು‌ ಹೋಗುತ್ತಿಲ್ಲ. ನಗರಸಭೆಯವರಿಗೆ ಮತ್ತು ಮಾಜಿ ಸದಸ್ಯರಿಗೆ ಹೇಳಿದರೂ ಕ್ಯಾರೆ ಎನ್ನುತ್ತಿಲ್ಲ. ಈ ವಾಸನೆಯಿಂದ ಇಲ್ಲಿ ವಾಸಿಸುವುದೇ ಕಷ್ಟವಾಗಿದೆ.

*ಕೃಷ್ಣಪ್ಪ. ಸ್ಥಳೀಯ ನಿವಾಸಿ*

ಅಣ್ಣೇಗೌಡ ಬಿಲ್ಡಿಂಗ್ ನಲ್ಲಿ ಬಾಡಿಗೆಗೆ ಇರುವ ಅಂಗಡಿಗಳ ಕಸದ ಜೊತೆಗೆ ಅಕ್ಕಪಕ್ಕದ ಅಂಗಡಿಗಳ ಕಸವೂ ಇಲ್ಲಿಯೇ ಜಮೆ ಆಗುತ್ತಿದೆ. ಮಾಲೀಕರಾಗಲಿ, ನಗರಸಭೆಯವರಾಗಲಿ ಕಸವನ್ನು ತೆರವು ಮಾಡುತ್ತಿಲ್ಲ. ಮಳೆ ಬಂದಾಗಂತು ಗಬ್ಬು ನಾರುತ್ತಿದೆ. ಕೊರೊನಾ ಗಿಂತಲೂ ಭಯಾನಕ ರೋಗ ಬಂದರೆ ಆಶ್ಚರ್ಯ ಪಡಬೇಕಾಗಿಲ್ಲ.

*ನಾಗರಾಜು, ವ್ಯಾಪಾರಿ*

ಅಲ್ಲಿರುವ ಸಂಪೂರ್ಣ ಕಸವು ಅಣ್ಣೇಗೌಡ ಬಿಲ್ಡಿಂಗ್ ನಲ್ಲಿರುವ ಅಂಗಡಿಗಳು ಮತ್ತು ಗೋಡೌನ್ ದಾಗಿದ್ದು, ಅಲ್ಲಿಗೆ ಯಾವುದೇ ದೊಡ್ಡ ವಾಹನಗಳು ಹೋಗಲಾಗುತ್ತಿಲ್ಲ. ಇಂದು ಪರಿಶೀಲಿಸಿ ಕಸ ವಿಲೇವಾರಿ ಮಾಡಲು ಕ್ರಮ ಕೈಗೊಳ್ಳುತ್ತೇವೆ.

*ವರಲಕ್ಷ್ಮಿ. ಆರೋಗ್ಯಾಧಿಕಾರಿ. ನಗರಸಭೆ.

ಗೋ ರಾ ಶ್ರೀನಿವಾಸ...

ಮೊ:9845856139.