ಸು ತ ರಾಮೇಗೌಡ.

ಸಂಪಾದಕರು.

ಬಯಲುಸೀಮೆ ಸಂಜೆ ದಿನಪತ್ರಿಕೆ

ಇಂದು ಚನ್ನಪಟ್ಟಣ ತಾಲ್ಲೂಕಿನ ಹಲವು ಕೆರೆಗಳು ಒತ್ತುವರಿಯಾಗಿವೆ. *ಈ ಒತ್ತುವರಿಯಲ್ಲಿ ಪಟ್ಟಭದ್ರರ ಪಾತ್ರವೇ ಜಾಸ್ತಿ ಇದೆ.* ಸಣ್ಣಪುಟ್ಟವರನ್ನು ತೆರವುಗೊಳಿಸುವ ಪ್ರಯತ್ನ ಮಾಡಿದರೆ, ಮೊದಲು ಅವರದು ಬಿಡಿಸಿಕೊಂಡು ಬನ್ನಿ ನಾವು ನಾವೇ ತೆರವು ಮಾಡುತ್ತೇವೆ ಎಂದು ಜಾರಿಕೊಳ್ಳುತ್ತಾರೆ.

ದೊಡ್ಡವರು ಮಾಡಿರುವ ಒತ್ತುವರಿಯನ್ನು ತೆರವು ಗೊಳಿಸುವಂತಿಲ್ಲ, ಸಣ್ಣವರು ತೆರವಿಗೆ ಬಗ್ಗುವಂತಿಲ್ಲ. ಇಂತಹ ದುಸ್ಥಿತಿಯು ತಾಲ್ಲೂಕಿನ ಸರ್ಕಾರಿ ಜಾಗಕ್ಕೆ ಒದಗಿ ಬಂದಿದೆ.

ಹಿಂದೆ ಕೆಲವು ಗೋಕಟ್ಟೆಗಳನ್ನು ಮುಚ್ಚುವ ಕಾರ್ಯಕ್ಕೆ ಆಗಿನ ಶಾಸಕ ಸಿ.ಪಿ ಯೋಗೇಶ್ವರ್ ಪ್ರಯತ್ನ ಮಾಡಿ ಸಫಲರಾದರು.

ಅವುಗಳನ್ನು ಸಾರ್ವಜನಿಕ ಕೆಲಸಕ್ಕೆ ಹಾಗೂ ಶಾಲೆಗಳಿಗೆ, ಸಮುದಾಯ ಭವನಕ್ಕೆ ಬಳಸಿಕೊಳ್ಳುವ ಆಲೋಚನೆಯು ಇತ್ತು. ಆದರೆ ಅಂತಹ ಜಾಗವನ್ನೂ ಸಹ ಅವರ ಹಿಂಬಾಲಕರು ಹಿಡಿದಿದ್ದಾರೆ.

ಇದನ್ನು ಗಮನಿಸಿದ ಬೇರೆ ಪಕ್ಷಗಳ ಮುಖಂಡರು ಕೂಡ, ನಾವೇನು ಕಡಿಮೆ, ಅವರು ಒತ್ತುವರಿ ಮಾಡಿದರೆ ನಾವೂ ಮಾಡುತ್ತೇವೆ ಎಂದು ಅವರೂ ಸಹ ಒತ್ತುವರಿ ಮಾಡಿದ್ದಾರೆ.

ಇಂತಹ ಜಾಗಗಳೂ ಸಹ ಈಗ ಜಿದ್ದಿಗೆ ಬಿದ್ದಿವೆ. ಅವರದ್ದು ಬಿಡಿಸಿಕೊಂಡು ಬನ್ನಿ ಎಂದು ಇವರು, ಇವರದ್ದು ಬಿಡಿಸಿ ಎಂದು ಅವರು, ಈಗ ಜಂಗಿ ಕುಸ್ತಿಯೂ ಸಹ ನಡೆಯುತ್ತಿದೆ.

ಎಷ್ಟೋ ಕಡೆಗಳಲ್ಲಿ ಮುಖ್ಯರಸ್ತೆಗಳನ್ನು ಒತ್ತುವರಿ ಮಾಡಿ ಮನೆ ಕಟ್ಟುವುದು, ಬೇರೆ ಬೇರೆ ರೀತಿಯ ಉಪಯೋಗ ಮಾಡಿ ಕೊಳ್ಳುವುದು ನಡೆದಿದೆ, ಇದನ್ನು ಯಾರು ಸರಿಮಾಡಿಯಾರು?.

ಹೀಗೆ ಒಬ್ಬರ ಮೇಲೆ ಒಬ್ಬರು ರಂಪ ಮಾಡಿಕೊಂಡು ಅಂತಹ ಕೆಲಸವು ಹೇಗೋ ಹಾಗೆ ಮುಂದುವರಿದುಕೊಂಡು ಹೋಗಿವೆ. ಯಾವುದೂ ಸಹ ದಡ ಮುಟ್ಟದೆ ಹಾಗೆಯೇ ಉಳಿದು ಕೊಳಡಯುತ್ತಿವೆ.

ಈ ತಾಲ್ಲೂಕಿಗೆ ಶಿಸ್ತಿನ, ಯಾವುದು ನ್ಯಾಯ, ಯಾವುದು ಅನ್ಯಾಯ ಎಂದು ಪರಾಮರ್ಶೆ ಮಾಡಿ ಗಟ್ಟಿ ನಿರ್ಧಾರ ತೆಗೆದುಕೊಳ್ಳಬಲ್ಲ ಶಕ್ತಿ ಇರುವ ತಹಶೀಲ್ದಾರ್ ಬಂದಿಲ್ಲ ಎಂದೇನಿಲ್ಲ.

ಯಾರನ್ನು ಯಾವ ರೀತಿಯಲ್ಲಿ ದಿಗ್ಬಂಧಿಸಿ, ಇಲ್ಲಿಂದ ಅಟ್ಟಬಹುದೋ ಆ ಕೆಲಸವನ್ನು ಇಲ್ಲಿನ ಅಧಿಕಾರಾರೂಢರು ಮಾಡಿಕೊಂಡು ಬಂದಿದ್ದಾರೆ. ಅದು ಈಗಲೂ ಮುಂದುವರಿದಿದೆ.

ಚನ್ನಪಟ್ಟಣ,ತಹಶಿಲ್ದಾರ್

ಏನಾದರೂ ಮಾಡಬೇಕು ಎಂದರೆ ರಾಜಕೀಯ ಪ್ರವೇಶಿಸುತ್ತದೆ. ಆಗ ಯಾವುದೇ ಕೆಲಸವಾಗಲಿ ಸುಲಭವಾಗಿ ನಡೆಯಲು ಬಿಡುವುದಿಲ್ಲ. ಆ ರೀತಿಯ ಒಂದು ಸಮಸ್ಯೆಗಳು ಹುಟ್ಟುತ್ತವೆ.

ಇಂದು ಅಧಿಕಾರಶಾಹಿಯೂ ಸಹ ಹಣಕೊಟ್ಟು ಬರುವ ಸ್ಥಿತಿಯಿರುವುದರಿಂದ, ಭ್ರಷ್ಟರಾದವರೇ ಬರುತ್ತಾರೆ. ಅವರು ಅದಾವ ರೀತಿಯಲ್ಲಿ ನ್ಯಾಯ ನೀತಿ ಅನುಸರಿಸಲು ಸಾಧ್ಯವಾದೀತು.

ಎಲ್ಲರೂ ಸಹ ಆರಂಭಕ್ಕೆ ಅಗಸ ಎತ್ತಿ ಎತ್ತಿ ಹೊಗೆದ ರೀತಿಯಲ್ಲಿ ಮಾಡಿ, ಆಮೇಲೆ ಎಲ್ಲಾ ರೀತಿಯ ಅಕ್ರಮ ಮಾರ್ಗವನ್ನೂ ಸಹ ಹಿಡಿದು ಎಲ್ಲರಂತೆ ಇವನೂ ಸಹ ಎನ್ನುವ ಹಂತಕ್ಕೆ ಹೋಗಿ ಬಿಡುತ್ತಾನೆ. ಅಂತಹವರಲ್ಲಿ ಕ್ರಿಯೆ ಎಲ್ಲಿ ಇರಲು ಸಾಧ್ಯ?.

ಇಂತಹ ಪರಿಸ್ಥಿತಿಯಲ್ಲಿ ಯಾವುದೇ ಸರ್ಕಾರ ಬಂದು, ಏನೋ ಸುಧಾರಣೆ ಮಾಡುತ್ತೇನೆ ಎಂದು ಹೇಳಿದರೂ ಸಹ ಅದು ಊರ್ಜಿತವಾಗುವುದಿಲ್ಲ. ಎಲ್ಲವೂ ಸಹ ಬರಹದಲ್ಲಿ ಇರುತ್ತವೆಯೇ ಹೊರತಾಗಿ ಕಾರ್ಯಗತವಾಗುವುದಿಲ್ಲ.

ಇದು ಹಿಂದೆಯೂ ನಡೆದು ಬಂದಿದೆ, ಈಗಲೂ ನಡೆಯುತ್ತಿದೆ, ಮುಂದೆಯೂ ಸಹ ನಡೆಯುವಂತಹದ್ದೇ. ಹಾಗಾಗಿ ಅದು ಯಾವ ಬದಲಾವಣೆಯೂ ಆಗದೆ ಹಾಗೇ ನಡೆಯುತ್ತಲೇ ಹೋಗುತ್ತದೆ.

ಹಲವು ಬಾರಿ ಇಂತಹವುಗಳನ್ನು ಸುಧಾರಿಸುತ್ತೇನೆ ಎಂದು ಹೇಳುವವನೇ ಸೋತುಹೋಗಿ, ಇಲ್ಲಿನ ಸಹವಾಸವೇ ಬೇಡ ಇಲ್ಲಿ ಮಾಡಿಕೊಂಡಿದ್ದೇ ಸಾಕು ಎಂದು ಜಾಗ ಖಾಲಿ ಮಾಡುವ ಕಡೆಗೆ  ಮುಂದಾಗುತ್ತಾರೆ. ಇದಕ್ಕೆ ಯಾರು ಏನು ಮಾಡಲು ಸಾಧ್ಯ?.

*ಗೋ ರಾ ಶ್ರೀನಿವಾಸ...*

*ಮೊ:9845856139.*