ಚನ್ನಪಟ್ಟಣ:ಜು/೨೨/೨೦/ಬುಧವಾರ. ಕಳೆದ ವಿಧಾನಸಭೆ ಚುನಾವಣೆಯ ನಂತರ ಒಂದಲ್ಲಾ ಒಂದು ರೀತಿಯಲ್ಲಿ ಸೋಲನ್ನೇ ಅನುಭವಿಸಿ‌ದ ತಾಲ್ಲೂಕಿನ ಮಾಜಿ ಶಾಸಕ, ಕರ್ನಾಟಕ ಸರ್ಕಾರದ ಮಾಜಿ ಸಚಿವ, ತಾಲ್ಲೂಕಿನ ನೀರಾವರಿ ಹರಿಕಾರ ಎಂದೇ ಬಿಂಬಿತವಾಗಿರುವ ಸಿ ಪಿ ಯೋಗೇಶ್ವರ್ ರವರನ್ನು ರಾಜ್ಯ ಸರ್ಕಾರದ ಶಿಫಾರಸ್ಸು ಮೇರೆಗೆ ರಾಜ್ಯಪಾಲ ವಜುಭಾಯಿ ಪಟೇಲ್ ರವರು ವಿಧಾನ ಪರಿಷತ್ ನೂತನ ಸದಸ್ಯರಾಗಿ ಆಯ್ಕೆ ಮಾಡಿ ಆದೇಶ ಹೊರಡಿಸಿದ್ದಾರೆ.

ಸಿ ಪಿ ಯೋಗೇಶ್ವರ್ ರವರ ಜೊತೆಯಲ್ಲೇ ಕಳೆದ ವಿಧಾನ ಸಭೆಯ ಚುನಾವಣೆಯ ನಂತರ ಬಹುತೇಕ ಯೋಗೇಶ್ವರ್ ರವರ ಕೆಲವು ಗೆಲುವಿಗೆ ಅಡ್ಡಗಾಲಾಗಿದ್ದ ಅಡಗೂರು ಹೆಚ್ ವಿಶ್ವನಾಥ್, ಭಾರತಿಶೆಟ್ಟಿ, ಶಾಂತರಾಮ ಬುಡ್ನಾಸಿದ್ಧಿ ಮತ್ತು ಡಾ ತಲ್ವಾರ್ ಸಾಬಣ್ಣ ನವರನ್ನು ಸಹ ವಿಧಾನ ಪರಿಷತ್ ನಾಮ ನಿರ್ದೇಶಿತ ಸದಸ್ಯರನ್ನಾಗಿ ನೇಮಿಸಲಾಗಿದೆ.

ಕಳೆದ ಲೋಕಸಭಾ ಕ್ಷೇತ್ರ ಮತ್ತು ವಿಧಾನಸಭೆಯಲ್ಲಿ ಸೋಲು ಅನುಭವಿಸಿದ್ದ ಸಿಪಿವೈ, ಹುಣಸೂರು ವಿಧಾನಸಭಾ ಕ್ಷೇತ್ರದ ಉಪ ಚುನಾವಣೆಗೆ ಟಿಕೆಟ್ ಆಕಾಂಕ್ಷಿಯಾಗಿದ್ದರು. ಮಾಜಿ ಸಚಿವ ಅಡಗೂರು ಹೆಚ್ ವಿಶ್ವನಾಥ್ ರವರೇ ಹಠದಿಂದ ಟಿಕೆಟ್ ಪಡೆದಿದ್ದರಿಂದ ಒಂದು ರೀತಿಯಲ್ಲಿ ಅಲ್ಲೂ ಸಹ ಸೋಲನ್ನನುಭವಿಸಿದರು. ತದ ನಂತರ ಮೊದಲ ಹಂತದ ವಿಧಾನ ಪರಿಷತ್ ನಾಮ ನಿರ್ದೇಶನದಲ್ಲಿಯೂ ಸಹ ಇದೇ ವಿಶ್ವನಾಥ್ ರವರ ಚಿತಾವಣೆಯಿಂದ ನಾಮ ನಿರ್ದೇಶನಗೊಳ್ಳದೆ, ಕೆಲವೇ ಕ್ಷಣಗಳಲ್ಲಿ ಮಂತ್ರಿ ಪದವಿಯನ್ನು ತಪ್ಪಿಸಿಕೊಂಡಿದ್ದರು.

ಇದರಿಂದ *ಸ್ವಲ್ಪ ಮಂಕಾಗಿದ್ದ ಸಿಪಿವೈ ಆರ್ ಎಸ್ ಎಸ್ ಸರಸಂಘದ ನಾಯಕರು, ಬಿಜೆಪಿ ಪಕ್ಷದ ರಾಷ್ಟ್ರೀಯ ನಾಯಕರು ಮತ್ತು ಬಿಜೆಪಿ ಪಕ್ಷವು ರಾಜ್ಯದಲ್ಲಿ ಆಡಳಿತದ ಚುಕ್ಕಾಣಿ ಹಿಡಿಯಲು ಇವರ ಸಮ್ಮುಖದಲ್ಲಿ ಕರೆತಂದಿದ್ದ ಕೆಲ ಮಂತ್ರಿಮಹೋದಯರನ್ನು ಹೊರತುಪಡಿಸಿ ಬೇರೆಲ್ಲಾ ನಾಯಕರಿಂದ ದೂರ ಉಳಿದಿದ್ದರು.* ಕೊರೊನಾ ಸಮಯದಲ್ಲೂ ಸಹ ಸ್ಥಳೀಯ ಮತದಾರರ ಕಷ್ಟಕ್ಕೂ ಸ್ಪಂದಿಸದೇ ಬೆಂಗಳೂರಿನಲ್ಲೇ ಉಳಿದಿದ್ದರು. ಆಕಸ್ಮಾತ್ ನಗರಕ್ಕೆ ಬಂದಾಗ ತಮ್ಮ ಆತ್ಮೀಯರು, ಕೆಲ ಬೆಂಬಲಿಗರು, ಪಕ್ಷದ ಬೆಂಬಲಿಗರನ್ನು ಬಿಟ್ಟರೆ ಬೆರಳೆಣಿಕೆ ಮಂದಿಯ ಸಾವಿಗೆ ಅಷ್ಟೇ ಬಂದು ಹೋಗಿದ್ದರು.

ಜಿಲ್ಲಾ ಪದಾಧಿಕಾರಿಗಳನ್ನು ಇತ್ತೀಚೆಗೆ ಬದಲಾಯಿಸಿದ ನಂತರ ತಾಲ್ಲೂಕಿನ ಪದಾಧಿಕಾರಿಗಳನ್ನು, ಅವರ ಸಮ್ಮುಖದಲ್ಲಿ ಬದಲಾಯಿಸಿದ್ದರು. ಬಿಜೆಪಿ ನಾಯಕನಾಗಿ ಹಾಗೂ ವೈಯುಕ್ತಿಕವಾಗಿ ತಮ್ಮದೇ ವರ್ಚಸ್ಸು ಹೊಂದಿರುವುದರಿಂದ, ಅವರಿಗೆ ಅಧಿಕಾರವೂ ಇಲ್ಲದ್ದರಿಂದ, ಬಹುತೇಕ ಅವರ ಹಿಂಬಾಲಕರೆಲ್ಲರೂ ಸಾಮಾಜಿಕ ಜಾಲತಾಣ ಹೊರತುಪಡಿಸಿ, ಸಾರ್ವಜನಿಕವಾಗಿ ಮುಗುಮ್ಮಾಗಿ ಉಳಿದಿದ್ದರು. ಈಗ ವಿಧಾನ ಪರಿಷತ್ ಸದಸ್ಯರಾಗಿ ಹೊರಹೊಮ್ಮಿದ ನಂತರ ಇವರೆಲ್ಲರಲ್ಲೂ  ಹಸಿವು ತಾಳಾರದೆ ಬಿಲದಿಂದ ಹೊರಬಂದ ಹಾವಿನಂತಾಗಿರುವುದು ಸುಳ್ಳಲ್ಲ.

*ಕೇವಲ ವಿಧಾನ ಪರಿಷತ್ ಸದಸ್ಯರಾಗಿ ಉಳಿಯುವುದಿದ್ದರಷ್ಟೇ ಆಗಿದ್ದರೆ, ಸಿಪಿವೈ ಯಾವುದೇ ಕಾರಣಕ್ಕೂ ಇದಕ್ಕೆ ಒಪ್ಪಿಕೊಳ್ಳುತ್ತಿರಲಿಲ್ಲ. ಇದರ ಹಿಂದೆ ರಾಷ್ಟ್ರೀಯ,  ರಾಜ್ಯ ಬಿಜೆಪಿ ಪಕ್ಷದ ಧುರೀಣರು ಹಾಗೂ ಆರ್ ಎಸ್ ಎಸ್ ನಾಯಕರು ಒಂದು ದೊಡ್ಡ ಬದಲಾವಣೆ ಬಯಸಿಯೇ ಸಿಪಿವೈ ಗೆ ಸ್ಥಾನ ನೀಡಿದ್ದಾರೆ. ಕೇವಲ ಕೆಲವೇ ದಿನಗಳಲ್ಲಿ (ಕೊರೊನಾ ಆಜೂಬಾಜೂ) ಮಂತ್ರಿ ಪದವಿ, ಜಿಲ್ಲಾ ಉಸ್ತುವಾರಿ ಹಾಗೂ ಒಂದು ಪಕ್ಷ ಮತ್ತು ಆ ಪಕ್ಷದ ನಾಯಕರ ವಿರುದ್ಧ ಕಾರ್ಯಾಚರಣೆಗೆ ಇಳಿಸಲು ನಿಗೂಢ ತಂತ್ರ ಎಣೆಯುವ ಸಲುವಾಗಿಯೇ ಅವರಿಗೆ ಈ ಸ್ಥಾನ ನೀಡಲಾಗಿದೆ ಎಂದೇ ವ್ಯಾಖ್ಯಾನಿಸಬಹುದಾಗಿದೆ.*

ಆದೇಶದ ನಂತರ ರಾಮನಗರ ಜಿಲ್ಲಾ ಮತ್ತು ಚನ್ನಪಟ್ಟಣ ತಾಲ್ಲೂಕಿನಾದ್ಯಂತ ಅವರ ಬೆಂಬಲಿಗರು ಮತ್ತು ಪಕ್ಷದ ಧುರೀಣರು ಪಟಾಕಿ ಸಿಡಿಸಿ, ಸಿಹಿ ಹಂಚಿ ವಿಜಯೋತ್ಸವ ಆಚರಿಸಿ ಸಂಭ್ರಮಿಸಿದರು.

ಗೋ ರಾ ಶ್ರೀನಿವಾಸ...

ಮೊ:9845856139.