ಚನ್ನಪಟ್ಟಣ:ಜು/೨೮/೨೦/ಮಂಗಳವಾರ. ತಾಲ್ಲೂಕಿನ ಖಡಕ್ ಅಧಿಕಾರಿ, ಪ್ರಾಮಾಣಿಕ ಅಧಿಕಾರಿ, ಜನಪರ, ರೈತಪರ ಹಾಗೂ ಸರ್ಕಾರಿ ಆಸ್ತಿಯ ಬಗ್ಗೆ ಅತಿಯಾದ ಕಳಕಳಿಯುಳ್ಳ‌ ಅಧಿಕಾರಿ ಎಂದು ವರ್ಷದೊಳಗೆ ತಾಲ್ಲೂಕಿನ ಆಚೆಗೂ ಹೆಸರು ಗಳಿಸಿದ್ದ ಕೆಎಎಸ್ ಅಧಿಕಾರಿ ಬಿ ಕೆ ಸುದರ್ಶನ್ ರವರನ್ನು ಎತ್ತಂಗಡಿ ಮಾಡಿ ಸರ್ಕಾರ ಆದೇಶ ಹೊರಡಿಸಿದೆ.

ತಾಲ್ಲೂಕಿನ ನೂತನ ತಹಶಿಲ್ದಾರ್ ಆಗಿ ತಾಲ್ಲೂಕಿನವರೇ ಆದ ಗೋವಿಂದಳ್ಳಿ ಗ್ರಾಮದ ನಾಗೇಶ್ ಎಂಬುವವರು ನಿನ್ನೆ ಸಂಜೆಯೇ ಅಧಿಕಾರ ಸ್ವೀಕರಿಸಿದ್ದಾರೆ. ಇವರು ಈ ಮೊದಲು ವಿಧಾನಸೌಧ ದಲ್ಲಿ ಕೆಲಸ ನಿರ್ವಹಿಸಿ ನಂತರ ಮಂಡ್ಯ ತಾಲ್ಲೂಕಿನ ತಹಶಿಲ್ದಾರ್ ಆಗಿ ಕಾರ್ಯನಿರ್ವಹಿಸಿದ್ದುದಾಗಿ ತಿಳಿದುಬಂದಿದೆ.

ಕಳೆದ ವರ್ಷ ಜುಲೈ 15 ರಂದು ಅಂದಿನ ತಹಶಿಲ್ದಾರ್ ಯೋಗಾನಂದ ರವರು ವರ್ಗಾವಣೆಗೊಂಡ ಜಾಗಕ್ಕೆ ಮೂಡಬಿದಿರೆಯಲ್ಲಿ ಕೆಲಸ ನಿರ್ವಹಿಸುತ್ತಿದ್ದ ಸುದರ್ಶನ್ ರವರು ಜುಲೈ 22 ರಂದು ಅಧಿಕಾರ ವಹಿಸಿಕೊಂಡಿದ್ದರು. ಒಂದು ವರ್ಷ ಪೂರೈಸಿದ ಬೆನ್ನಲ್ಲೆ ವರ್ಗಾವಣೆ ಮಾಡಿರುವುದರಿಂದ ಸುದರ್ಶನ್ ರವರು ತಡೆಯಾಜ್ಞೆ ಗೆ ಮೊರೆ ಹೋಗಿರುವುದಾಗಿ ತಿಳಿದುಬಂದಿದೆ.

ಕಳೆದ ಹದಿನಾರು ವರ್ಷಗಳಿಂದ ಆಗದ ಕೆರೆ, ಕುಂಟೆ, ಕಾಲುವ, ರಸ್ತೆ, ಗೋಮಾಳ ಸೇರಿದಂತೆ ಅನೇಕ ಸರ್ಕಾರಿ ಆಸ್ತಿಗಳನ್ನು ತೆರವುಗೊಳಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ ಸುದರ್ಶನ್ ರವರು ತಾಲ್ಲೂಕಿನ ಜನಸಾಮಾನ್ಯರ ಹೀರೋ ಆಗಿ ಮಿಂಚಿದ್ದರು. ತಹಶಿಲ್ದಾರ್ ಎಂದರೆ ಗ್ರಾಮ ಲೆಕ್ಕಾಧಿಕಾರಿಯಿಂದ ಬಡ್ತಿ ಹೊಂದಿ ತಹಶಿಲ್ದಾರ್ ಆಗಿ ಕೆಲಸ ಮಾಡಲಾಗುವುದಿಲ್ಲ. ಆತ ಕೆಎಎಸ್ ಪರೀಕ್ಷೆ ಬರೆದು ಬಂದವರಾದರೆ ಮಾತ್ರ ಕಾನೂನು ರೀತ್ಯಾ ಕೆಲಸ ಮಾಡಲು ಸಾಧ್ಯ. ಅಂತಹ ಕೆಲಸವನ್ನು ಸುದರ್ಶನ್ ಮಾಡಿದ್ದಾರೆ ಎಂದು ಅನೇಕ ರೈತ ಮುಖಂಡರ ಮತ್ತು ಜನಸಾಮಾನ್ಯರ ತೀರ್ಮಾನವಾಗಿತ್ತು.

ಶೆಟಿಹಳ್ಳಿ ಕೆರೆ ಒತ್ತುವರಿಯಲ್ಲಿ ತಹಶಿಲ್ದಾರ್ ಸುದರ್ಶನ್ ಮತ್ತು ಜೆಡಿಎಸ್ ಪಕ್ಷದ ಮುಖಂಡರೊಬ್ಬರಿಗೆ ನೇರವಾದ ಸವಾಲಾಗಿತ್ತು. ಕ್ಷಣಾರ್ಧದಲ್ಲಿ ತೆರವು ಆಗಬೇಕಾಗಿದ್ದ ಒತ್ತುವರಿಗೆ ತಡೆಯಾಜ್ಞೆ ತಂದು ಆ ಕೆಲಸವನ್ನು ನಿಲ್ಲಿಸಿದ ಅಪಕೀರ್ತಿ ಆ ಮುಖಂಡರಿಗೆ ಸಲ್ಲುತ್ತದೆ. ಆ ಕೆರೆಯ ಒತ್ತುವರಿ ಬಗ್ಗೆ ಅನೇಕ ಕನಸುಗಳನ್ನಿಟ್ಟಿದ್ದ ತಾಲ್ಲೂಕಿನ ಜನತೆ ಅಂದು ಬಹಳ ನಿರಾಶರಾಗಿದ್ದರು. ಆದರೆ ಛಲಬಿಡದ ತಹಶಿಲ್ದಾರ್ ರವರು ಮೇಲ್ಮನವಿ ಸಲ್ಲಿಸಿರುವುದಾಗಿ ಹೇಳಿಕೆ ನೀಡಿದ್ದರು.

ಚನ್ನಪಟ್ಟಣ ತಾಲ್ಲೂಕು ರಾಜಕೀಯದಲ್ಲಿ ಹೇಗೆ ಅಡಜಂಬರವಿದೆಯೋ ಅದೇ ರೀತಿ ಅಧಿಕಾರಿಗಳನ್ನು ಸಹ ಅವರ ಕೈಗೊಂಬೆಯಾಗಿ ಮಾಡಿಕೊಳ್ಳಲು ಯತ್ನಿಸುತ್ತಲೇ ಇರುತ್ತಾರೆ. ಒಬ್ಬ ಪ್ರಾಮಾಣಿಕ ಅಧಿಕಾರಿಗೆ ನಮ್ಮ ತಾಲ್ಲೂಕಿನಲ್ಲಿ ಜಾಗವಿಲ್ಲಾ ಎಂಬುದು ಮತ್ತೆ ಸಾಬೀತಾಗಿದೆ. ಈ ಮೊದಲು ಕೆಲಸ ನಿರ್ವಹಿಸಿದ ಮತ್ತೋರ್ವ ಕೆಎಎಸ್ ಅಧಿಕಾರಿ ಯೋಗಾನಂದ ರವರು ಸಹ ಹೋಗುವಾಗ ನೀಡಿದ ಹೇಳಿಕೆ ಹೀಗಿತ್ತು. ಸರ್ ನನಗೆ ಕೈಕಾಲು ಅಷ್ಟೇ ಅಲ್ಲಾ ಬಾಯಿಯನ್ನು ಸಹ ಕಟ್ಟಿಹಾಕಿಬಿಟ್ಟರು. ಇಂತಹ ಸಂದರ್ಭದಲ್ಲಿ ಜನತೆಯ ಪರವಾಗಿ ಕೆಲಸ ಮಾಡಲಾಗುವುದಿಲ್ಲ ಎಂದು ಹೇಳಿದ್ದು ಇನ್ನೂ ಹಸಿಯಾಗೇ ಇದೆ.

ಅಧಿಕಾರ ಸ್ವೀಕರಿಸಿರುವ ನೂತನ ತಹಶಿಲ್ದಾರ್ ನಾಗೇಶ್ ರವರು ಮಾತನಾಡಿ ನನಗೆ ಸರ್ಕಾರ ಚನ್ನಪಟ್ಟಣದಲ್ಲಿ ಕಾರ್ಯನಿರ್ವಹಿಸಿ ಎಂದು ಆದೇಶ ಮಾಡಿದೆ. ಹಾಗಾಗಿ ಇಲ್ಲಿ ಅಧಿಕಾರ ಸ್ವೀಕಾರ ಮಾಡಿದ್ದೇನೆ. ಈಗಾಗಲೇ ಕೋವಿಡ್ ಗೆ ಸಂಬಂಧಿಸಿದ ಹಾಗೆ ಇಂದು ಕೆಲಸ ನಿರ್ವಹಿಸಿದ್ದೇನೆ ಎಂದು ತಿಳಿಸಿದರು. ನವೀನ ತಹಶಿಲ್ದಾರ್ ನಾಗೇಶ್ ರವರೇ ಮುಂದುವರೆಯುತ್ತಾರಾ ಅಥವಾ ತಡೆಯಾಜ್ಞೆ ತಂದು ಸುದರ್ಶನ್ ರವರೇ  ಮುಂದುವರೆಯುತ್ತಾರಾ ಎಂದು ತಾಲ್ಲೂಕಿನ ಜನತೆ ಎದುರು ನೋಡುತ್ತಿದ್ದಾರೆ.

ಗೋ ರಾ ಶ್ರೀನಿವಾಸ...

ಮೊ:9845856139.