ಚನ್ನಪಟ್ಟಣ:ಆ/19/20/ಬುಧವಾರ. ನಗರದ ತುಂಬೆಲ್ಲಾ ಎಲ್ಲಿ ನೋಡಿದರಲ್ಲಿ ಕಸದ ರಾಶಿ ತುಂಬಿ ತುಳುಕುತ್ತಿದೆ. ಕಸ ಹಾಕುವುದಕ್ಕೆ ನಿಗದಿತ ಜಾಗವೇ ಇಲ್ಲ. ಅಲ್ಲೊಂದು ಇಲ್ಲೊಂದು ಜಾಗ ಇದ್ದರೂ ಸಹ ನಗರಸಭೆಯ ಕಾರ್ಮಿಕರು ಕಸ ಎತ್ತುವ ಮೊದಲೇ ಅರ್ಧ ರಸ್ತೆಗೆ ಬಂದಿರುತ್ತದೆ. ಎಂದಿಗಿಂತಲೂ ಹೆಚ್ಚಾಗಿರುವ ನಾಯಿಗಳ ಹಿಂಡು ಕಸದ ರಾಶಿಯಲ್ಲಿ ಆಹಾರವನ್ನು ಅರಸುತ್ತಾ ಕಚ್ಚಾಡುತ್ತಿವೆ. ಈಗಾಗಲೇ ಹಲವಾರು ಕಡೆ ನಾಯಿಗಳಿಂದ ಕಚ್ಚಿಸಿಕೊಂಡವರು ಕೆಲವರಾದರೆ, ಬೈಕ್ ಗೆ ಅಡ್ಡ ಬಂದು ಕೈಕಾಲು ಮುರಿದುಕೊಂಡ ಸವಾರರೇ ಹೆಚ್ಚಿದ್ದಾರೆ. ಅಂತೂ ಕಸದ ಗಬ್ಬು ವಾಸನೆಯಿಂದ ಅನಾರೋಗ್ಯ ಪೀಡಿತರಾಗುವವರೆಗೂ, ನಾಯಿಗಳಿಂದ ಪ್ರಾಣ ಕಳೆದುಕೊಳ್ಳುವವರೆಗೂ ನಗರಸಭೆಯ ಅಧಿಕಾರಿಗಳು‌ ಕಾರ್ಯೋನ್ಮುಖರಾಗುವುದಿಲ್ಲ ಎಂಬ ಶಪಥ ಮಾಡಿರಬಹುದೆನೋ‌ ಎಂಬ ಅನುಮಾನ ಸಾರ್ವಜನಿಕರಿಗೆ ಕಾಡುತ್ತಿದೆ.

ನಿಗದಿತ ಜಾಗವೂ ಇಲ್ಲ. ಡಬ್ಬವೂ ಇಲ್ಲ.

ನಗರಸಭೆಯಿಂದ ಹಲವಾರು ಕಾರ್ಯಕ್ರಮಗಳನ್ನು ಹಮ್ಮಿಕೊಂಡು, ಕಸ ವಿಂಗಡಣೆ, ಅವುಗಳಿಗೊಂದು ಡಬ್ಬ, ಮನೆಮನೆ ತ್ಯಾಜ್ಯ ಶೇಖರಣೆ, ಬೀದಿ ಬದಿಯಲ್ಲೊಂದು ದೊಡ್ಡ ಡಬ್ಬ ಹೀಗೆ ಎಲ್ಲವೂ ಇದ್ದು ಕಸ ಮಾತ್ರ ನಗರದ ಬಹುತೇಕ ಎಲ್ಲಾ ರಸ್ತೆಯ ಬದಿಗಳಲ್ಲೇ ಎರಚಾಡುತ್ತಿದೆ. ನಗರದ ಯಾವ ಬೀದಿಯಲ್ಲೂ ಸಹ ಪಾದಚಾರಿಗಳು ಮೂಗು ಮುಚ್ಚದೆ ನಡೆದುಕೊಂಡು ಹೋಗುವ ಸಾಹಸ ಮಾಡಲಾಗುತ್ತಿಲ್ಲ. ಪ್ರತಿ ಕಸದ ರಾಶಿಯಲ್ಲೂ ಸಹ ನಾಯಿಗಳ ಹಿಂಡು ಗಿಜಗುಡುತ್ತಿವೆ.

ಮಾಂಸದ ತ್ಯಾಜ್ಯವೇ ಹೆಚ್ಚು

ನಗರದ ಬಹುತೇಕ ರಸ್ತೆಗಳ ಬದಿಯಲ್ಲಿ ಬಿದ್ದಿರುವ ಕಸ ಹಾಗೂ ನಗರದೊಳಗಿನ ಶೆಟ್ಟಿಹಳ್ಳಿ ಕೆರೆ, ನಗರದ ಹೊರ ವಲಯದ ಕೆರೆಗಳು ಹಾಗೂ ಹೆದ್ದಾರಿಯ ಬದಿಯಲ್ಲಿ ಬಿದ್ದಿರುವ ಎಲ್ಲಾ ಕಸದ ರಾಶಿಗಳಲ್ಲೂ ಮಾಂಸದ ತ್ಯಾಜ್ಯವೇ ಹೆಚ್ಚಿದೆ. ಇದುವರೆಗೂ ಮಾಂಸದ ಅಂಗಡಿಗಳಿಗೆ ಒಂದು ನಿಯಮವನ್ನು ರೂಪಿಸಲು ನಗರಸಭೆಗೆ ಸಾಧ್ಯವಾಗದಿರುವುದು ನಾಚಿಕೆಗೇಡಿನ ಸಂಗತಿಯೇ ಸರಿ. ಪ್ಲಾಸ್ಟಿಕ್ ಚೀಲಗಳಲ್ಲಿ ತುಂಬಿ ಬಿಸಾಡುವ ಈ ಮಾಂಸದ ತ್ಯಾಜ್ಯವನ್ನು ತಿನ್ನಲು ನಾಯಿಗಳು ಕಚ್ಚಾಡಿ ರಸ್ತೆಗೆ ಬರುತ್ತವೆ. ಇದರಿಂದ ದ್ವಿಚಕ್ರ ವಾಹನಗಳ ಸವಾರರು ಬಿದ್ದು ಗಾಯಗೊಂಡರೆ, ದೊಡ್ಡ ವಾಹನಗಳಿಗೆ ಸಿಲುಕುವ ನಾಯಿಗಳ ಪ್ರಾಣ ಹರಣವಾಗುತ್ತಿವೆ. ಮಳೆಗಾಲವಾದ್ದರಿಂದ ಹಳಸಿದ ಮಾಂಸದ ತ್ಯಾಜ್ಯ ಮತ್ತು ಸತ್ತ ನಾಯಿಗಳ ದುರ್ವಾಸನೆ ಎರಡೂ ಸಹ ಮಾನವ ಮತ್ತು ಸೂಕ್ಷ್ಮ ಜೀವಿಗಳ ಮೇಲೆ ದುಷ್ಪರಿಣಾಮ ಬೀರುತ್ತಿವೆ.

ಹೇಳಿಕೆಗಳಿಗಷ್ಟೇ ಸೀಮಿತವಾಗುತ್ತಿರುವ ಅಧಿಕಾರಿಗಳು

ಯಾವುದೇ ಸಮಸ್ಯೆಗಳ ಬಗ್ಗೆ ಅಧಿಕಾರಿಗಳನ್ನು ಕೇಳಿದರೆ, ಅದಕ್ಕೆ ಒಂದು ಹೇಳಿಕೆ, ಸಬೂಬು ಅಥವಾ ಸಿಬ್ಬಂದಿಗಳ ಕೊರತೆ ಹೇಳಿ ತಪ್ಪಿಸಿಕೊಳ್ಳುವ ಅಧಿಕಾರಿಗಳೇ ಹೆಚ್ಚಾಗಿದ್ದಾರೆ. ಆ ಸಮಸ್ಯೆಯ ಬಗ್ಗೆ ಒಂದು ನಿರ್ಧಿಷ್ಟ ಕ್ರಮ ಕೈಗೊಂಡು ಅದಕ್ಕೊಂದು ಇತಿಶ್ರೀ‌ ಹಾಡುವ ಕೆಲಸವನ್ನು ಯಾವ ಅಧಿಕಾರಿಗಳು ಮಾಡದಿರುವುದು ಸಾರ್ವಜನಿಕರ ದುರದೃಷ್ಟಕರ ಎನ್ನಬಹುದು. ಒಂದು ಸಮಸ್ಯೆಗೆ ಒಂದು ಹೇಳಿಕೆ ಮುಂದೆ ನೋಡೋಣಾ ಎಂಬ ಅಧಿಕಾರಿ ವರ್ಗ ಇರುವವರೆಗೂ ಹಾಗೂ ಸಾರ್ವಜನಿಕರಿಗೆ ಅರಿವು ಬರುವವರೆಗೂ ಈ ಸಂಕಷ್ಟಗಳು ಕಟ್ಟಿಟ್ಟ ಬುತ್ತಿಯಾಗಿಯೇ ಉಳಿಯುವದರಲ್ಲಿ ಸಂದೇಹವೇ ಇಲ್ಲ.

ಜನ ಬದಲಾಗದೆ, ಅಧಿಕಾರಿಗಳಿಂದ ಬದಲಾಗುವುದು ಕಷ್ಟ ಕಮೀಷನರ್

ನಾವು ಮನೆಮನೆಗೆ ಕಸ ವಿಂಗಡಿಸಿ ಕೊಡಲು ಡಬ್ಬಗಳನ್ನು ನೀಡಿದ್ದೇವೆ. ಮನೆಗೆ ತೆರಳಿ ‌ಕಸ ಸಂಗ್ರಹಿಸಲು ಹೋದಾಗ ಕಸ ಕೊಡುವವರು ಕಡಿಮೆ. ಮಧ್ಯಾಹ್ನದ ನಂತರ ಕಸ ತಂದು ರಸ್ತೆ ಬದಿಗೆ ಸುರಿಯುತ್ತಾರೆ. ನಾಯಿಗಳನ್ನು ಹಿಡಿದು ಹೊರಗೆ ಬಿಡಲು ಅಥವಾ ಪ್ರಾಣ ತೆಗೆಯಲು ಪ್ರಾಣಿ ದಯಾಸಂಘ ದವರು ಒಪ್ಪಿಗೆ ನೀಡುತ್ತಿಲ್ಲ. ಸಂತಾನ ಹರಣ ಶಸ್ತ್ರ ಚಿಕಿತ್ಸೆ ಒಂದೇ ದಾರಿ, ಅದಕ್ಕೆ ಸಂಬಂಧಿಸಿದ ಅಧಿಕಾರಿಗಳ ಸಭೆ ಕರೆದು ಶೀಘ್ರ ಕ್ರಮ ಕೈಗೊಳ್ಳುವುದಾಗಿ ಪೌರಾಯುಕ್ತ ಶಿವನಂಕಾರಿಗೌಡ ತಿಳಿಸಿದರು. ಅಧಿಕಾರಿಗಳು, ಕಾರ್ಮಿಕರ ಜೊತೆಗೆ ಸಾರ್ವಜನಿಕರು ಸಹಕರಿಸಬೇಕು. ನಮ್ಮ ನಗರ, ನಮ್ಮ ಸೌಂದರ್ಯ ಎನ್ನುವ ಪರಿಕಲ್ಪನೆ ಅವರಿಗೆ ಬರದ ಹೊರತು ಅಧಿಕಾರಿಗಳು ಮತ್ತು ಕಾರ್ಮಿಕರಿಂದಲೇ ಎಲ್ಲವೂ ಸಾಧ್ಯವಾಗದು ಎಂಬುದನ್ನು ಮನಗಾಣಬೇಕು ಎಂದು ತಮ್ಮ ಅಸಹಾಯಕತೆ ಯನ್ನು ತೋಡಿಕೊಂಡರು.

ಗೋ ರಾ ಶ್ರೀನಿವಾಸ...

ಮೊ:9845856139.