ಚನ್ನಪಟ್ಟಣ:ಆ/20/20/ಗುರುವಾರ. ನಗರವೆಲ್ಲವೂ ಕಸದ ರಾಶಿಯಿಂದ ತುಂಬಿಹೋಗುತ್ತಿದ್ದು, ಗೊಂಬೆ (ಬೊಂಬೆ) ನಗರಿ ಎಂಬ ಹಿರಿಮೆಗೆ ಪಾತ್ರವಾಗಿದ್ದ ಚನ್ನಪಟ್ಟಣ ನಗರ ಗಬ್ಬು ನಗರವಾಗಿ, ಅನಾರೋಗ್ಯ ಪೀಡಿತರ ನಗರವಾಗಿ, ರೂಪುಗೊಳ್ಳುತ್ತಿರುವುದು ಚನ್ನಪಟ್ಟಣಕ್ಕೆ ಇದ್ದ ಹಿರಿಮೆಯ ಎಲ್ಲಾ ರೆಕ್ಕೆಗಳನ್ನು ಕತ್ತರಿಸಿ ಹಾಕಿದಂತಾಗಿದೆ. ಕಸದ ರಾಶಿ ಹೀಗೆ ಮುಂದುವರೆದರೆ, ಈ ಅಪಾತ್ರಕ್ಕೆ ಗುರಿಯಾದ ನಗರಗಳಲ್ಲಿ ರಾಜ್ಯದ ಮೊದಲ ನಗರಿಯಾಗುವ ಎಲ್ಲಾ ಗುಣಾವಗುಣಗಳು ಕಂಡುಬರುತ್ತಿವೆ.

*ಖಾಲಿ ನಿವೇಶನಗಳ ಮಾಲೀಕರಿಗೆ ನೋಟೀಸ್ ನೀಡಿ*

ನಗರದ ಎಲ್ಲಾ ಕಡೆಯೂ ಖಾಸಗಿ ಯವರ ಖಾಲಿ ನಿವೇಶನಗಳಿದ್ದು, ಬಹುತೇಕ ಮನೆಯ ಮಹಾನ್ ನಾಗರೀಕರೂ ಆ ಖಾಲಿ ನಿವೇಶನದಲ್ಲಿಯೇ ಕಸ ತಂದು ಸುರಿದು ಹೋಗುತ್ತಿರುವುದು ಸತ್ಯ ಸಂಗತಿ. ಆ ಮಾಲೀಕರು ಎಲ್ಲೋ ಇದ್ದು, ಕಾಂಪೌಂಡ್ ಹಾಕಿಸದೆ, ಸ್ವಚ್ಛಗೊಳಿಸದೆ ಹಾಗೆ ಬಿಟ್ಟಿರುವುದರಿಂದ ಕಸ ಎಸೆದು ಹೋಗುವ ಅನಾಗರಿಕರಿಗೆ ಅನುಕೂಲವಾಗಿದೆ. ಇಂತಹ ನಿವೇಶನಗಳ ಮಾಲೀಕರನ್ನು ಹುಡುಕಿ ನೋಟೀಸ್ ಜಾರಿ ಮಾಡಿದರೆ ಮಾಲೀಕರ ಜೊತೆಗೆ ಕಸ ಸುರಿಯುವವರು ಸಹ ಎಚ್ಚರಗೊಳ್ಳುತ್ತಾರೆ.

*ಸರ್ಕಾರಿ ನಿವೇಶನಗಳಿಗೂ ನೋಟೀಸ್ ನೀಡಿ*

ಖಾಸಗಿ ನಿವೇಶನಗಳ ಜೊತೆಗೆ ಸರ್ಕಾರ ಒಡೆತನದ ಖಾಲಿ ನಿವೇಶನಗಳನ್ನು ಗುರುತು ಪತ್ತೆ ಮಾಡಿ ಆಯಾಯ ಇಲಾಖೆಯ ಮುಖ್ಯಸ್ಥರಿಗೂ ನೋಟೀಸ್ ಜಾರಿ ಮಾಡಬೇಕಾಗಿದೆ. ಯಾವ ಇಲಾಖೆಗೆ ಅದು ಖಾತೆಯಾಗಿದೆಯೋ ಆ ಇಲಾಖೆಯ ಮುಖ್ಯ ಅಧಿಕಾರಿಯೇ ಆ ನಿವೇಶನದ ಜವಾಬ್ದಾರಿ ಹೊತ್ತು ಅದನ್ನು ಆ ಇಲಾಖೆಯ ವತಿಯಿಂದಲೇ ಸ್ವಚ್ಛಗೊಳಿಸುವ ಜವಾಬ್ದಾರಿ ಹೊರಿಸುವ ಕೆಲಸವನ್ನು ನಗರಸಭೆಯ ಅಧಿಕಾರಿಗಳು ಮಾಡಿದರೆ ಮನೆ, ಅಂಗಡಿಗಳು ಮತ್ತು  ಮಾಂಸದ ತ್ಯಾಜ್ಯವೂ ಸಹ ನಗರಸಭೆಯ ಆಟೋಗಳಿಗೆ ತಲುಪುವ ಮಾರ್ಗ ಸುಲಭವಾಗುತ್ತದೆ.

*ರಾಜಕಾರಣಿಗಳಿಗೆ ಕಣ್ಣು, ಕಿವಿ ಮೂಗು ಇಲ್ಲವೇ ?*

ಸದ್ಯ ನಗರಸಭೆಯಲ್ಲಿ ಚುನಾಯಿತ ಜನ ಪ್ರತಿನಿಧಿಗಳು ಇಲ್ಲದಿರುವುದನ್ನು ಹೊರತುಪಡಿಸಿದರೆ ಮಿಕ್ಕೆಲ್ಲಾ ಚುನಾಯಿತ ಜನಪ್ರತಿನಿಧಿಗಳಿಗೆ ಕಣ್ಣು, ಕಿವಿ, ಮೂಗು ಇಲ್ಲವೆ ? ನಗರಸಭೆಯ ಮಾಜಿ‌ ಜನ ಪ್ರತಿನಿಧಿಗಳು ಅಧಿಕಾರ ಇದ್ದರೆ ಮಾತ್ರ ಕೆಲಸ ಮಾಡಬೇಕೆ ? ಅಥವಾ ಎಲ್ಲಾ ಅಂಗಗಳು ಇದ್ದೂ ಆ ಅಂಗಗಳು ಕೆಲಸ ನಿರ್ವಹಿಸುತ್ತಿಲ್ಲವೇ ? ಎಂಬ ಆತಂಕ ಸಾರ್ವಜನಿಕರನ್ನು ಕಾಡುತ್ತಿದೆ. ಶಾಸಕ, ಮೇಲ್ಮನೆ ಸದಸ್ಯ, ಆಡಳಿತದಾಧಿಕಾರಿಗಳು ಎಲ್ಲವೂ ಇದ್ದು ನಗರ ಗಬ್ಬು ನಾರುತ್ತಿರುವುದು ಮಾತ್ರ ಬೊಂಬೆ ನಗರಿಗರ ದುರ್ದೈವ.

*ಕಸ ಸುರಿಯಲು ಜಾಗವೇ ಇಲ್ಲ. ಪೌರಾಯುಕ್ತ*

ನಗರದಲ್ಲಿ ಕಸವು ದಿನೆದಿನೇ ಹೆಚ್ಚಾಗುತ್ತಲೇ ಇದೆ. ಇದನ್ನು ಶಾಶ್ವತವಾಗಿ ಒಂದೆಡೆ ಸುರಿಯಲಾಗಲಿ, ವಿಂಗಡಿಸಲಾಗಲಿ ಸೂಕ್ತ ಸ್ಥಳ ಇಲ್ಲ. ಕಣ್ವ ಬಳಿಯ ಜಾಗ ಇನ್ನೂ ಹಸ್ತಾಂತರವಾಗಿಲ್ಲ. ಎಲೆಕೇರಿ ಬಳಿಯ ಜಾಗದಲ್ಲಿ ಎಲ್ಲವೂ ಸಾಧ್ಯವಿಲ್ಲ. ಅಲ್ಲಿ ಇನ್ನೂ ಕಾಮಗಾರಿ ನಡೆಯುತ್ತಿದೆ. ಸಾರ್ವಜನಿಕರು ಸಹ ಕಸ ವಿಂಗಡಣೆ ಮಾಡಿ ಕೊಡುವುದಿಲ್ಲ ಮತ್ತು ಅವರ ಮನೆ ಮುಂದೆ ಆಟೋ ಬಂದಾಗ ಕಸ ಕೊಡದೆ ಬೀದಿ ಬದಿಯಲ್ಲೇ ಸುರಿಯುತ್ತಾರೆ. ಈ ಎಲ್ಲಾ ಅಂಶಗಳನ್ನು ಸಂಬಂಧಿಸಿದ ಹಿರಿಯ ಮತ್ತು ಜಿಲ್ಲಾ ಅಧಿಕಾರಿಗಳ ಗಮನಕ್ಕೆ ತಂದಿದ್ದು ಸೂಕ್ತ ಕ್ರಮ ಕೈಗೊಳ್ಳುತ್ತೇವೆ ಎಂದು ಪೌರಾಯುಕ್ತ ಶಿವನಂಕಾರಿಗೌಡ ಪತ್ರಿಕೆಗೆ ಮಾಹಿತಿ ನೀಡಿದರು.

ಗೋ ರಾ ಶ್ರೀನಿವಾಸ...

ಮೊ:9845856139.