ರಾಮನಗರ:ಆ/23/20/ಭಾನುವಾರ. ಭಾಷೆಯಿಂದ ಭಾಷೆಗೆ, ಜನರ ಬಾಯಿಂದ ಬಾಯಿಗೆ, ತಲೆಮಾರಿನಿಂದ ತಲೆಮಾರಿಗೆ ಹರಿದು, ನಿರಂತವಾಗಿ ಉಳಿದುಕೊಂಡಿದ್ದಲ್ಲದೆ, ಮುಂದಿನ ಪೀಳಿಗೆಗೂ ತಲುಪುತ್ತಿರುವ ಕಲೆ ಜನಪದ ಕಲೆ ಎಂದು ರಾಮನಗರ ಜಿಲ್ಲಾ ಪಂಚಾಯತಿ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಮಹಮ್ಮದ್ ಇಕ್ರಂ ಸಂತಸ ವ್ಯಕ್ತಪಡಿಸಿದರು.

ಅವರು ಇಂದು ಜಾನಪದ ಲೋಕದಲ್ಲಿ ಕರ್ನಾಟಕ ಜಾನಪದ ಪರಿಷತ್ತು, ಅಖಿಲ ಕರ್ನಾಟಕ ಜಾನಪದ ಕಲಾವಿದರ ಒಕ್ಕೂಟ, ಕನ್ನಡ ಸಂಸ್ಕೃತಿ ಇಲಾಖೆ ಹಾಗೂ ಪ್ರವಾಸೋದ್ಯಮ ಇಲಾಖೆಯ ಸಹಯೋಗದಲ್ಲಿ ಹಮ್ಮಿಕೊಂಡಿದ್ದ ವಿಶ್ವ ಜಾನಪದ ದಿನಾಚರಣೆ ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಯಾಗಿ ಭಾಗವಹಿಸಿ ಮಾತನಾಡಿದರು.

ಅಂದು ಲಿಪಿ ಇಲ್ಲದೆ ಜನರ ಬಾಯಿಯಲ್ಲೇ ಉಳಿದ ಜನಪದವನ್ನು ಇಂದು, ಮುಂದು ಹಾಗೂ ಶಾಶ್ವತವಾಗಿ ಉಳಿಸಲು ಎಚ್ ಎಲ್ ನಾಗೇಗೌಡರು ಜಾನಪದ ಲೋಕವನ್ನು ಸೃಷ್ಟಿಸಿದ್ದಾರೆ. ಇಂತ ಮಹಾನ್ ಜಾನಪದ ತಜ್ಞರ ಆಶಯಗಳನ್ನು ಈಡೇರಿಸಲು ಜಿಲ್ಲಾ ಪಂಚಾಯತಿಯು ತನ್ನ ಮಿತಿಯಲ್ಲಿ ಕಲಾವಿದರಿಗೆ ಸಹಕಾರ ನೀಡಲು ನೆರವಾಗುವುದಾಗಿ ತಿಳಿಸಿದರು

ಮತ್ತೋರ್ವ ಮುಖ್ಯ ಅತಿಥಿ ಎಎಸ್ಪಿ ರಾಮರಾಜನ್ ರವರು ಮಾತನಾಡಿ ನಾನು ಸಹ ಕಲಾವಿದರ ಕುಟುಂಬದಿಂದ ಬಂದವನು. ನಮ್ಮ ತಂದೆಯು ಸಹ ಉತ್ತಮ ನಾಟಕಕಾರರು. ಕಲೆ ಜೀವನದ ಒಂದು ಮುಖ್ಯವಾದ ಅಂಗ. ಅದು ಪ್ರತಿಯೊಬ್ಬರಲ್ಲೂ ಒಂದೊಂದು ಬಗೆಯಲ್ಲಿರುತ್ತದೆ. ವಿದ್ಯಾರ್ಥಿಗಳ ವ್ಯಾಸಂಗಕ್ಕೆ ಅದು ಬಹಳ ಮುಖ್ಯ ಅಂಗ ಎಂದೇ ಭಾವಿಸಬಹುದು. ಅದು ಪುರಾಣ ಪುಣ್ಯ ಕಥೆಗಳಿರಬಹುದು ಅಥವಾ ಇತಿಹಾಸ ಇರಬಹುದು. ಎರಡರಲ್ಲೂ ಕಲೆ ಅಜರಾಮರವಾಗಿವೆ. ಕಲೆಯನ್ನು ಉಳಿಸಲು ನಾವೆಲ್ಲರೂ ಒಗ್ಗೂಡಿ ಉಳಿಸಿ ಬೆಳೆಸೋಣಾ ಎಂದು ಕರೆ ನೀಡಿದರು.

ಅಧ್ಯಕ್ಷತೆ ವಹಿಸಿ ಮಾತನಾಡಿದ ಟಿ ತಿಮ್ಮೇಗೌಡರು ಮಾತನಾಡಿ ಕಲಾವಿದರು ನಮ್ಮ ಆಸ್ತಿ. ಅವರನ್ನು ನಾವುಗಳು ಉಳಿಸಿದರೆ ಕಲೆಯನ್ನು ಉಳಿಸಿದಂತೆ ಎಂದು ಅಭಿಪ್ರಾಯಪಟ್ಟರು. ಕೊರೊನಾ ಸಮಯದಲ್ಲೂ ಸರ್ಕಾರಕ್ಕೆ ಮೊರೆ ಇಟ್ಟು ಸಣ್ಣ ಪ್ರಮಾಣದ ಆರ್ಥಿಕ ಸಹಾಯ ಹಾಗೂ ದಿನಸಿ ಪದಾರ್ಥಗಳನ್ನು ಕೆಲವರಿಗೆ ನೀಡಲಾಗಿದೆ. ಉಳಿದವರಿಗೂ ಕೊಡಲು ಎಲ್ಲಾ ತಯಾರಿ ‌ನಡೆದಿದೆ ಎಂದರು.

ಹಿರಿಯ ಕಲಾವಿದ ಚಿಕ್ಕನರಸಯ್ಯ ಉದ್ಘಾಟನಾ ನುಡಿಗಳನ್ನಾಡಿದರು. ಜೋಗಿಲ ಸಿದ್ದರಾಜು ಪ್ರಾಸ್ತಾವಿಕ ನುಡಿಗಳನ್ನಾಡಿದರೆ ಜಾನಪದ ಲೋಕದ ಮುಖ್ಯ ಆಡಳಿತಾಧಿಕಾರಿ ಸಿ ಎನ್ ರುದ್ರಪ್ಪನವರು ಸ್ವಾಗತಿಸಿದರು. ಕಾರ್ಯಕ್ರಮದಲ್ಲಿ ಸು ತ ರಾಮೇಗೌಡ ಉಪಸ್ಥಿತರಿದ್ದರು. ವೈದ್ಯ ಹನುಮಂತಯ್ಯನವರನ್ನು ಇದೇ ವೇಳೆ ಸನ್ಮಾನಿಸಲಾಯಿತು. ಹಲವಾರು ಜಿಲ್ಲೆಗಳ ಕಲಾವಿದರು ಜಾನಪದ ಕಲೆಗಳನ್ನು ಪ್ರದರ್ಶಿಸಿದರು.

ಗೋ ರಾ ಶ್ರೀನಿವಾಸ...

ಮೊ:9845856139.