ಚನ್ನಪಟ್ಟಣ:ಆ/26/20/ಬುಧವಾರ. ನಗರಸಭೆಯ ಆಡಳಿತ ಕಛೇರಿಯ ಕೂಗಳತೆಯಲ್ಲಿ, ರೈಲ್ವೇ ನಿಲ್ದಾಣ ಮತ್ತು ಜೆ ಸಿ ರಸ್ತೆಯ ನಡುವೆ ಇರುವ ಕರಬಲ ಮೈದಾನದಲ್ಲಿ ಎರಡು ಬಾರಿ ನಿರ್ಮಿಸಿರುವ 150  ಕ್ಕೂ ಹೆಚ್ಚು ಅಂಗಡಿ ಮಳಿಗೆಗಳಿದ್ದು ಬಹುತೇಕ ಮಳಿಗೆಗಳು ಖಾಲಿ ಇವೆ. ಬೆರಳೆಣಿಕೆಯಷ್ಟು ಮಳಿಗೆಗಳಲ್ಲಿ ಮಾತ್ರ ತರಕಾರಿ ವ್ಯಾಪಾರ ನಡೆಯುತ್ತಿದ್ದು ಅವುಗಳ ಬಾಡಿಗೆಯೂ ಬರುತ್ತಿಲ್ಲ ಎಂದು ಅಧಿಕಾರಿಯೊಬ್ಬರು ತಿಳಿಸುತ್ತಾರೆ.

*ನೋಡಲಾರದ ಅನೈತಿಕ ಜಾಗದ ಅಂಗಡಿಗಳು* ಖಾಲಿ ಇರುವ ಕೆಲ ಅಂಗಡಿಗಳ ಬಾಗಿಲು ಮುರಿದಿದ್ದು, ಅಲ್ಲಿ ಅನೈತಿಕ ಚಟುವಟಿಕೆಗಳು ನಡೆಯುತ್ತಿರುವುದಾಗಿ ಸ್ಥಳೀಯರೇ ದೂರುತ್ತಾರೆ. ಪ್ರತಿ ಅಂಗಡಿಗಳ ಮುಂದೆ ರಾಶಿ ರಾಶಿ ಕಸ ಬಿದ್ದಿದೆ. ಅದರಲ್ಲೂ ಹೆಂಡದ ಟೆಟ್ರಾ ಪ್ಯಾಕ್ ಗಳು, ಬಿಯರ್ ಬಾಟಲಿಗಳು, ಪ್ಲಾಸ್ಟಿಕ್ ಗ್ಲಾಸ್ ಮತ್ತು ನೀರಿನ ಬಾಟಲಿಗಳಿಂದ ತುಂಬಿ ಹೋಗಿದೆ.

*ಮದ್ಯ ವ್ಯಸನಿಗಳ ತಾಣ*

ಇನ್ನೂ ವಿಚಿತ್ರ ಎಂದರೆ ಬೆಳಿಗ್ಗೆಯೇ ಮದ್ಯ ಸೇವನೆಗೆ ವ್ಯಸನಿ (ಡ್ರಿಂಕ್ಸ್ ಗೆ ಅಡಿಕ್ಟ್) ಆಗಿರುವ ಅನೇಕರು, ಒಬ್ಬಂಟಿಯಾಗಿ, ಗುಂಪಾಗಿ ಡ್ರಿಂಕ್ಸ್ ಮಾಡಲು ಸೇರುತ್ತಿರುವುದು ವಿಚಿತ್ರವಾದರೂ ಸತ್ಯ. ಬೆಳಿಗ್ಗೆ ಆರು ಗಂಟೆಗೆ ಶುರುವಿಟ್ಟುಕೊಳ್ಳುವ ಇವರು ಇಂದು ಬೆಳಿಗ್ಗೆ 9:00 ಗಂಟೆಗೆ ಮಾರುಕಟ್ಟೆಗೆ ಹೋದ ಸಂದರ್ಭದಲ್ಲಿ ಅನೇಕ ವ್ಯಸನಿಗಳು ಕಾಣಸಿಕ್ಕರು. ಕ್ಯಾಮೆರಾ ಕೈಗೆ ಬರುತ್ತಿದ್ದಂತೆಯೇ ಮದ್ಯವನ್ನು ಎತ್ತಿಕೊಂಡೇ ಓಡಿ ಹೋದರು. ಬೆಳಿಗ್ಗೆ ಹತ್ತು ಗಂಟೆಗೆ ಆರಂಭವಾಗಬೇಕಾದ ಬಾರ್ ಗಳು ಬೆಳಿಗ್ಗೆಯೇ ಆರಂಭವಾಗಿವೆಯೇ ಎಂಬ ಅನುಮಾನವೂ ಕಾಡುತ್ತಿದೆ.

*ಮಲಮೂತ್ರಗಳ ತವರು*

ಮಲ ಅಥವಾ ಮೂತ್ರಕ್ಕೆ ಅವಸರವಾದವರು ಸಾರ್ವಜನಿಕ ಶೌಚಾಲಯಗಳನ್ನು ಹುಡುಕಿಕೊಂಡು ಹೋಗುವ ಗೊಡವೆಗೆ ಹೋಗದೆ, ಪ್ಲಾಸ್ಟಿಕ್ ಬಾಟಲಿ ಹಿಡಿದು ಅಲ್ಲಿಯೇ ಎಲ್ಲವನ್ನೂ ಮುಗಿಸಿ ನಿರಾಳವಾಗಿ ಹೋಗುವುದು ಸಹ ಕಂಡುಬರುತ್ತದೆ. ಅಲ್ಲಿದ್ದ ಶೌಚಾಲಯವನ್ನು ರಿಪೇರಿ ಮಾಡುತ್ತಿರುವುದು ಸಹ ಒಂದು ಕಾರಣ ಇರಬಹುದೇನೋ ?.

*ಕಸದ ರಾಶಿ*

ಇಡೀ ಮಾರುಕಟ್ಟೆಯ ಕಸವನ್ನು ಅಲ್ಲಿಯೇ ಸಂಪೂರ್ಣವಾಗಿ ಗುಡ್ಡೆ ಹಾಕಿದ್ದು, ಅದನ್ನು ಎತ್ತು ಹಾಕುವ ಬದಲು ಅಲ್ಲಿಂದಲ್ಲೇ ಬೆಂಕಿ ಹಾಕುವ ಮೂಲಕ ಸುಡಲಾಗುತ್ತಿದೆ. ಹಸಿ ಕಸ, ಒಣ ಕಸದ ಜೊತೆಗೆ ಅತ್ಯಧಿಕ ಪ್ಲಾಸ್ಟಿಕ್ ಸಹ ಇರುವುದರಿಂದ ಕ್ಯಾನ್ಸರ್ ನಂತಹ ಮಾರಕ ರೋಗಗಳಿಗೆ ಅಲ್ಲಿನ ವ್ಯಾಪಾರಿಗಳು ಮತ್ತು ಸ್ಥಳೀಯರು ತುತ್ತಾಗುವುದರಲ್ಲಿ ಅನುಮಾನವೆ ಇಲ್ಲ.

*ರಸ್ತೆಯ ಅತಿಕ್ರಮಣ*

ವ್ಯಾಪಾರ ನಡೆಸುತ್ತಿರುವ ಬೆರಳೆಣಿಕೆಯಷ್ಟು ಅಂಗಡಿಗಳ ಮಾಲೀಕರು ಸಹ ಅಂಗಡಿಯ ಹೊರಗೆ ವ್ಯಾಪಾರ ಮಾಡುತ್ತಿದ್ದು, ಮೊದಲೇ ಕಿರಿದಾದ ರಸ್ತೆಗಳನ್ನು ಅತಿಕ್ರಮಿಸಿಕೊಂಡಿದ್ದಾರೆ. ಇದರಿಂದ ಪಾದಚಾರಿಗಳು ಮತ್ತು ವಾಹನಗಳು ಓಡಾಡಲು ಸಹ ಕಷ್ಟ ಪಡುವಂತಾಗಿದ್ದು ಪೋಲಿಸರಾಗಲಿ, ನಗರಸಭೆಯವರಾಗಲಿ ಎಚ್ಚರಿಕೆಯ ಕ್ರಮ ತೆಗೆದುಕೊಳ್ಳದಿರುವುದು ಅವರ ಬೇಜಾವಾಬ್ದಾರಿ ತನವನ್ನು ತೋರುತ್ತದೆ. 

ಈ ವಿಷಯದಲ್ಲಿ ಅಧಿಕಾರಿಗಳು ಅಂದಿನ ವಿಷಯಕ್ಕೆ ಸಂಬಂಧಿಸಿದಂತೆ ಹಾರಿಕೆಯ ಉತ್ತರ, ಸಿಬ್ಬಂದಿಗಳ ಕೊರತೆ, ಕಸ ಸಂಗ್ರಹದ ನಂತರ ಹಾಕಲು ಜಾಗವಿಲ್ಲ ಎಂಬ ಸಬೂಬುಗಳನ್ನು ಹೇಳಿ ನುಣುಚಿಕೊಳ್ಳುವ ಪ್ರಯತ್ನ ಮಾಡುತ್ತಾರೆಯೇ ವಿನಹ ಶಾಶ್ವತವಾದ ಪರಿಹಾರವನ್ನು ಮಾತ್ರ ಹುಡುಕಿಕೊಳ್ಳದಿರುವುದು ನಗರಸಭೆಯ ಅಧಿಕಾರಿಗಳು ಮತ್ತು ಜನಪ್ರತಿನಿಧಿಗಳ ಕೆಲಸಕ್ಕೆ ಕನ್ನಡಿ ಹಿಡಿದಿದೆ.

ಗೋ ರಾ ಶ್ರೀನಿವಾಸ...

ಮೊ:9845856139.