ಚನ್ನಪಟ್ಟಣ:ಸೆ/05/20/ಶನಿವಾರ. ಶಿಕ್ಷಕರು ಎಂದರೆ ಸರ್ವರಿಗೂ ಮಾದರಿಯಾಗುವ ಮಂದಿ ಎಂಬುದು ಜಗತ್ತಿನಾದ್ಯಂತ ಜನಜನಿತವಾಗಿದೆ. ತಾಲ್ಲೂಕಿನ ಸರ್ಕಾರಿ ಶಾಲಾ ಶಿಕ್ಷಕರಲ್ಲೂ ಬಹಳ ಮಂದಿ ಸಂಭಾವಿತರಿರುವುದನ್ನು ಅಲ್ಲಗಳೆಯಲಾಗುವುದಿಲ್ಲ. ಆದರೆ ಅವರದೇ ಹೆಸರಿನ ದಿನಾಚರಣೆಯಂದು ನಡೆದ ಕಾರ್ಯಕ್ರಮದಲ್ಲಿ ಕೆಲವರು ಭಾಗವಹಿಸಿದರೆ, ಮತ್ತೆ ಕೆಲವರು ಭಾಗವಹಿಸಿದ್ದು ಅರ್ಧ ಕಾರ್ಯಕ್ರಮಕ್ಕೆ ಎದ್ದು ಹೋದರೆ, ಇನ್ನೂ ಕೆಲವರು ನಮಗೆ ಸ್ಥಾನಮಾನವಿಲ್ಲ, ಆಹ್ವಾನ ಇಲ್ಲ ಎಂದು ಅಸಮಧಾನ ವ್ಯಕ್ತಪಡಿಸಿ ನಮ್ಮಲ್ಲಿ ಒಗ್ಗಟ್ಟಿಲ್ಲಾ ಎಂಬುದನ್ನು ಸಾಬೀತು ಪಡಿಸಿಕೊಂಡರು.

ಶಿಕ್ಷಣ ತಜ್ಞ, ಮಾಜಿ ರಾಷ್ಟ್ರಪತಿ ಡಾ ಸರ್ವಪಲ್ಲಿ ರಾಧಾಕೃಷ್ಣನ್ ರವರ ಜನ್ಮ ದಿನಾಚರಣೆ ಎಂಬುದು ಒಂದು ಮೈಲಿಗಲ್ಲು.

ಈ ದಿನ ಶಿಕ್ಷಕರಿಗೆ ಮತ್ತು ವಿದ್ಯಾರ್ಥಿಗಳಿಗೆ ತುಂಬಾ ಮಹತ್ತರವಾದ ದಿನ. ಕೊರೊನಾ ಸಂಕಷ್ಟ ಎದುರಾಗಿರುವುದರಿಂದ ಎಲ್ಲಾ ಶಾಲೆಗಳಲ್ಲೂ ಅದ್ದೂರಿಯಾಗಿ ಆಚರಿಸಬೇಕಾದ ಈ ದಿನವನ್ನು ಕೆಲ ಶಾಲೆಗಳಲ್ಲಿ ಸರಳವಾಗಿ ಆಚರಣೆ ಮಾಡಿರುವುದು ಸ್ತುತ್ಯರ್ಹ.

ಆದರೆ ಕ್ಷೇತ್ರ ಶಿಕ್ಷಣಾಧಿಕಾರಿಗಳು ಅಂದರೆ ಬಿಇಓ ಕಛೇರಿಯಲ್ಲಿ ಅದ್ದೂರಿ ಆಚರಣೆಯಲ್ಲದಿದ್ದರೂ ಮಿತಿಯಾಗಿ, ಸಾರ್ವಜನಿಕರು ಮತ್ತು ಮಾಧ್ಯಮದವರ ಸಮ್ಮುಖದಲ್ಲಿ ಆಚರಿಸಬಹುದಾಗಿತ್ತಾದರೂ, ಬಿಇಓ ಮತ್ತು ಕಛೇರಿಯ ಸಿಬ್ಬಂದಿಗಳು ಅದನ್ನು ಮಾಡದೆ, ರಾಧಾಕೃಷ್ಣನ್ ರವರ ಮೂರ್ತಿಗೆ ಒಂದು ಹೂವಿನ ಹಾರ ಮತ್ತು ಎರಡು ಊದುಗಡ್ಡಿ ಹಚ್ಚಿ, ಬೆರಳೆಣಿಕೆಯ ಮಂದಿಯಷ್ಟೇ ಕಾರ್ಯಕ್ರಮ ಮಾಡಿ ಮುಗಿಸಿರುವುದು ಅಗೌರವ ಎನ್ನಲಡ್ಡಿಯಿಲ್ಲ.

ಶಿಕ್ಷಕರ ಸಂಘವು ಶತಮಾನೋತ್ಸವ ಭವನದಲ್ಲಿ ಏರ್ಪಡಿಸಿದ್ದ ಶಿಕ್ಷಕರ ದಿನಾಚರಣೆಯಲ್ಲಿ ಕಾರ್ಯಕ್ರಮಗಳನ್ನು ಹಮ್ಮಿಕೊಂಡಿದ್ದರೆಂದು ತಿಳಿದುಬಂದಿದೆ. ಆದರೆ ಈ ಕಾರ್ಯಕ್ರಮಕ್ಕೆ ಎಲ್ಲರನ್ನೂ ಕರೆಯುವುದಿರಲಿ, ಸಂಘಟನಾ ಪದಾಧಿಕಾರಿಗಳನ್ನು ಕರೆಯದಿರುವುದು, ಕೆಲವರಿಗೆ ಮಾತ್ರ ಮಣೆ‌ ಹಾಕಿರುವುದನ್ನು ಮನಗಂಡ ಅನೇಕರು ಕಾರ್ಯಕ್ರಮದಲ್ಲಿ ಭಾಗವಹಿಸದೆ ಹೊರಗಡೆ ಬಂದು ತಮ್ಮ ಅಸಮಾಧಾನವನ್ನು ಹೊರಹಾಕಿದರು.

ಒಂದು ಕಾರ್ಯಕ್ರಮ ನಡೆದರೆ ಅದನ್ನು ಜನರಿಗೆ ತಲುಪಿಸುವುದೇ ಮಾಧ್ಯಮ. ಈ ಕಾರ್ಯಕ್ರಮದಲ್ಲಿ ತಾಲ್ಲೂಕು ಪಂಚಾಯತಿ ಅಧ್ಯಕ್ಷರು, ದಂಡಾಧಿಕಾರಿಗಳು ಹಾಗೂ ಕ್ಷೇತ್ರ ಶಿಕ್ಷಣಾಧಿಕಾರಿಗಳಂತವರು ಭಾಗವಹಿಸಿದ್ದ ಕಾರ್ಯಕ್ರಮಕ್ಕೆ ಮಾಧ್ಯಮದವರನ್ನು ದೂರವಿಟ್ಟಿದ್ದು ಯಾಕೆ ಎಂಬುದನ್ನು ಸಂಬಂಧಿಸಿದ ಅಧಿಕಾರಿಗಳು ಮತ್ತು ಸಂಘಟನೆಯವರು ಬಹಿರಂಗಪಡಿಸಬೇಕಾಗಿದೆ.

ಗೋ ರಾ ಶ್ರೀನಿವಾಸ...

ಮೊ:9845856139.