ಚನ್ನಪಟ್ಟಣ:ಅ/10/20/ಶನಿವಾರ. ಧಾರಾಕಾರವಾಗಿ ಸುರಿಯುತ್ತಿರುವ ಮಳೆಯಿಂದ ‌ಈ ಮೊದಲೇ ಕಟ್ಟಿಕೊಂಡಿರುವ ಚರಂಡಿಗಳು ತುಂಬಿ ರಸ್ತೆಯ ಮೇಲೆ ಹರಿಯುವ ನೀರು ಒಂದೆಡೆಯಾದರೆ, ಕಾವೇರಿ ನೀರು ಸರಬರಾಜು ಪೈಪುಗಳು ಒಡೆದು ರಸ್ತೆಗೆ ನೀರು ಹರಿದು ಗುಂಡಿಗಳಾಗುತ್ತಿರುವುದು ಮತ್ತೊಂದೆಡೆ. ಇವುಗಳಿಂದ ಪರಿತಪಿಸುತ್ತಿರುವುದು ಮಾತ್ರ ವಾಹನಗಳ ಚಾಲಕರು ಮತ್ತು ಪಾದಚಾರಿಗಳು.

ನಗರದ ಸುಪ್ರಸಿದ್ಧ ಸಾತನೂರು ಸರ್ಕಲ್ ಬಳಿಯ ರಸ್ತೆಯಲ್ಲಿ. ಸಾತನೂರು ರಸ್ತೆ ಮತ್ತು ಹೆದ್ದಾರಿಯ ಮೂಲಕ, (ಅಂಬೇಡ್ಕರ್ ಭವನದ ಪಕ್ಕದ ರಸ್ತೆ) ನಿಜಾಮಿ ವೃತ್ತದ ಕಡೆಯಿಂದ ನಗರದೊಳಗೆ ಹೋಗುವ ಈ ದಾರಿಯಲ್ಲಿ ಹಳ್ಳಗಳಾಗಿದ್ದು, ಮಳೆಯ ನೀರು ನಿಂತು ಪ್ರಯಾಣಿಕರು ಮತ್ತು ಸ್ಥಳೀಯ ಅಂಗಡಿಗಳಿಗೆ ಕಿರಿಕಿರಿಯಾಗುತ್ತಿದೆ. ಪಾದಚಾರಿಗಳಂತೂ ಭಯದಿಂದ ನಡೆದುಕೊಂಡು ಹೋಗಬೇಕಾದ ಸ್ಥಿತಿ ಒದಗಿದೆ.

ಹೆದ್ದಾರಿಯ ಬದಿಯೇ ಇರುವ ಈ ರಸ್ತೆಯಲ್ಲಿ ಟ್ರಾಫಿಕ್ ಪೋಲೀಸರು ಸದಾ ಇರುತ್ತಾರೆ. ಗಂಟೆಯಲ್ಲಿ ಸಹಸ್ರಾರು ವಾಹನಗಳು ಸಂಚರಿಸುತ್ತವೆ. ಇಂತಹ ರಸ್ತೆಯಲ್ಲಿ ನೀರು ನಿಂತು ವಾಹನಗಳು ಸಂಚರಿಸುವಾಗ ಸುತ್ತಲೂ ನೀರು ಚಿಮ್ಮಿ ಅದೆಷ್ಟೋ ಸಂದರ್ಭದಲ್ಲಿ ಜಗಳಗಳು ಆಗಿರುವುದುಂಟು. ಈ ರಸ್ತೆಯು ನೇರ ಪಿಡಬ್ಲ್ಯೂಇ ಇಲಾಖೆಗೆ ಸಂಪರ್ಕ ರಸ್ತೆಯಾಗಿದ್ದು ಎಲ್ಲಾ ಅಧಿಕಾರಿಗಳು ಇದೇ ರಸ್ತೆಯಲ್ಲಿ ಸಂಚರಿಸುತ್ತಿದ್ದರೂ ಸಹ ಕಣ್ಮುಚ್ಚಿ ಓಡಾಡುತ್ತಿದ್ದಾರೆಯೇ ಎಂಬುದು ಸಾರ್ವಜನಿಕರ ಪ್ರಶ್ನೆಯಾಗಿದೆ.

*ಕಾವೇರಿ ನೀರು ಸರಬರಾಜು ಬಳಿಯೂ ಇದೇ ಗೋಳು*

ನಗರದ ಸಾತನೂರು ರಸ್ತೆಯ ಕಾವೇರಿ ವಾಟರ್ ಸಪ್ಲೈ ಮತ್ತು ಕೆಎಸ್ಆರ್ಟಿಸಿ ಬಸ್ ಡಿಪೋ ಬಳಿ ಆಳವಾದ ಗುಂಡಿಗಳಾಗಿದ್ದು, ಎಲ್ಲಾ ರೀತಿಯ ವಾಹನಗಳ ಸವಾರರು ಚಾಲನೆ ಮಾಡಲು ಪರಿತಪಿಸುತ್ತಿದ್ದಾರೆ. ದ್ವಿಚಕ್ರ ವಾಹನಗಳ ಸವಾರರಂತೂ ಜೀವ ಕೈಲಿಡಿದು ಹೋಗಬೇಕಾದ ಸ್ಥಿತಿ ಇದೆ.

ಮೊದಲೇ ಪಾದಚಾರಿ ರಸ್ತೆಯೇ ಮಾಯವಾಗಿರುವ ಈ ದೊಡ್ಡ ರಸ್ತೆಯಲ್ಲಿ ಹಳ್ಳಕೊಳ್ಳದ ನೀರು ಮೈಮೇಲೆ ಹಾರುವುದು ಎಂಬ ಭಯದಿಂದ ಪಾದಚಾರಿಗಳು ಅತಿ ಎಚ್ಚರಿಕೆಯಿಂದ ಸಾಗಬೇಕಾಗಿದೆ. ಕಾವೇರಿ ವಾಟರ್ ಸಪ್ಲೈ ನ ಪೈಪು ಆಗಾಗ್ಗೆ ಒಡೆದು ಇಲ್ಲಿ ನೀರು ನಿಲ್ಲುತ್ತದೆ. ವಾಟರ್ ಸಪ್ಲೈ ಕಛೇರಿಗೆ ಹೊಂದಿಕೊಂಡಂತೆ ಈ ಅವಘಡ ಸಂಭವಿಸಿದ್ದರೂ ಸಹ ಎಚ್ಚರಿಕೆ ವಹಿಸದಿರುವುದು ಅಧಿಕಾರಿಗಳ ಬೇಜಾವಾಬ್ದಾರಿಯನ್ನು ತೋರಿಸುತ್ತದೆ.

ರಸ್ತೆಯ ಗುಂಡಿಗಳನ್ನು ಮುಚ್ಚದೆ ಹಾಗೂ ಪೈಪುಗಳು ಒಡೆದ ತಕ್ಷಣ ಅದನ್ನು ಶಾಶ್ವತವಾಗಿ ಸರಿಪಡಿಸದಿರುವ ಕಾರಣ ಇಷ್ಟೆಲ್ಲಾ ಅವಾಂತರಗಳಾಗುತ್ತಿವೆ. ಇದು ಮಳೆಗಾಲವಾದ್ದರಿಂದ ಪ್ರಯಾಣಿಕರಿಗೆ ಅತಿಯಾದ ಕಿರಕಿರಿಯಾಗುತ್ತಿದೆ. ಶೀಘ್ರವಾಗಿ ಎಚ್ಚೆತ್ತುಕೊಂಡು ಸರಿಪಡಿಸದಿದ್ದರೆ ಅಧಿಕಾರಿಗಳಿಗೆ ಪ್ರಯಾಣಿಕರಿಂದಲೇ ತಕ್ಕ ಶಾಸ್ತಿಯಾಗುವುದು ಶತ:ಸಿದ್ದ.

ಗೋ ರಾ ಶ್ರೀನಿವಾಸ...

ಮೊ:9845856139.