ಚನ್ನಪಟ್ಟಣ:ಅ/14/20/ಬುಧವಾರ.

ನಗರದ ಸಿಎಂಸಿ ಲೇಔಟ್ ನಲ್ಲಿ ಕೊಳಚೆ ನಿರ್ಮೂಲನಾ ಮಂಡಳಿಯವರು ಮನೆಗಳನ್ನು ನಿರ್ಮಿಸಲು ತಳಪಾಯ ಹಾಕಿದ್ದು, ನಗರಸಭೆಯ ಪೌರಾಯುಕ್ತರ ಮೌಖಿಕ ಆದೇಶ ಮೇರೆಗೆ ಇಂದು ತಳಪಾಯವನ್ನು ತೆರವುಗೊಳಿಸಿ ಯಥಾಸ್ಥಿತಿ ಕಾಪಾಡಿಕೊಳ್ಳಲು ಮುಂದಾಗಿದ್ದಾರೆ.

ನಗರಸಭೆಗೆ ಸೇರಿದ ಆಸ್ತಿಯಲ್ಲಿ ಸ್ಲಂ ಬೋರ್ಡ್ ನವರು ಮನೆ ನಿರ್ಮಾಣಕ್ಕೆ ತಳಪಾಯ ಹಾಕಿದ್ದನ್ನು ಗಮನಿಸಿದ ಸಾರ್ವಜನಿಕರು ನಗರಸಭೆ ಗೆ ಮೌಖಿಕ ದೂರು ನೀಡಿದರು. ಸ್ಥಳಕ್ಕೆ ಆಗಮಿಸಿದ ಪೌರಾಯುಕ್ತ ಶಿವನಂಕಾರಿಗೌಡ ಮತ್ತು ಅಧಿಕಾರಿಗಳು ಸ್ಲಂ ಬೋರ್ಡ್ ನ ಇಂಜಿನಿಯರ್ ಮತ್ತು ಗುತ್ತಿಗೆದಾರರಿಗೆ ದಾಖಲೆಗಳ ಇತ್ಯರ್ಥವಾಗುವ ತನಕ ತಳಪಾಯವನ್ನು ತೆರವುಗೊಳಿಸಬೇಕೆಂದು ಆದೇಶ ನೀಡಿದ್ದರು.

ಸ್ಪಂದಿಸಿದ ಕೊಳಚೆ ನಿರ್ಮೂಲನಾ ಮಂಡಳಿಯ ಇಂಜಿನಿಯರ್ ಶಶಿಕುಮಾರ್ ಮತ್ತು ಗುತ್ತಿಗೆದಾರ ಸಚಿನ್ ರವರು ಇಂದು ಬೆಳಿಗ್ಗೆ ತಳಪಾಯ ತೆರವುಗೊಳಿಸಿ, ಯಥಾಸ್ಥಿತಿ ಕಾಪಾಡುವ ಮೂಲಕ ಸಾರ್ವಜನಿಕರ ಆಪಾದನೆಗೆ ಅಂತ್ಯ ಹಾಡಿದರು.

ನಾವು ಮನೆ ನಿರ್ಮಿಸಲು ಬೇಕಾದ ದಾಖಲೆಗಳನ್ನು ಫಲಾನುಭವಿಗಳು ತಲುಪಿಸಿರುವುದರಿಂದ ನಮ್ಮ ಗುತ್ತಿಗೆದಾರರು ತಳಪಾಯ ನಿರ್ಮಿಸಿದ್ದರು. ನಗರಸಭೆಯ ಆಯುಕ್ತರ ಮೌಖಿಕ ಆದೇಶದ ಮೇರೆಗೆ ಹಾಗೂ ಪತ್ರಿಕೆಯಲ್ಲಿ ಪ್ರಕಟವಾದ ನಂತರ ತೆರವುಗೊಳಿಸಿದ್ದೇವೆ. ನಗರಸಭೆಯವರು ಫಲಾನುವಿಯದೇ ಜಾಗ ಎಂದು ಪತ್ರ ನೀಡುವವರೆಗೂ ನಾವು ಯಥಾಸ್ಥಿತಿ ಕಾಪಾಡುತ್ತೇವೆ.

*ಶಿವಕುಮಾರ್. ಎಇ, ಸ್ಲಂ ಬೋರ್ಡ್.*

ಫಲಾನುಭವಿಗಳಾದವರು, ಕಂದಾಯದ ರಶೀತಿ, ಅಥವಾ ಗ್ರಾಮಪಂಚಾಯಿತಿ ಖಾತೆಯನ್ನೇ ಅಧಿಕೃತ ಎಂದು ತಿಳಿದುಕೊಂಡಿದ್ದರೆ ಅದು ದಾಖಲೆಯಾಗುವುದಿಲ್ಲ. ನಗರಸಭೆಯಿಂದ ಖಾತೆ ಆಗಿರಬೇಕು. ಅವರು ಈ ನಿವೇಶನ ಹೇಗೆ ಪಡೆದುಕೊಂಡಿದ್ದಾರೆ ಎಂಬುದಕ್ಕೆ ಮೂಲ ದಾಖಲೆಗಳಿರಬೇಕು. ಎಲ್ಲಾ ದಾಖಲೆಗಳನ್ನು ತಂದು ಕೊಟ್ಟ ನಂತರ ಪರಿಶೀಲಿಸಿ ಕ್ರಮಕೈಗೊಳ್ಳುತ್ತೇವೆ.

*ಶಿವನಂಕಾರಿಗೌಡ. ಪೌರಾಯುಕ್ತರು, ನಗರಸಭೆ*

ನಾವು ದಾಖಲೆಗಳನ್ನು ಪರಿಶೀಲಿಸಿಯೇ ಇಲ್ಲಿ ಕೆಲಸ ಪ್ರಾರಂಭಿಸಿದ್ದೇವೆ. ನಗರಸಭೆ ಮತ್ತು ಫಲಾನುಭವಿಗಳ ಮಧ್ಯ ದಾಖಲೆಯ ಗೊಂದಲ ಇರುವುದರಿಂದ ಇಂದು ತೆರವುಗೊಳಿಸುತ್ತಿದ್ದೇವೆ. ದಾಖಲೆ ಸರಿಯಾಗಿದ್ದರೆ ಮಾತ್ರ ಕೆಲಸ ಮುಂದುವರೆಸುತ್ತೇವೆ. ಇಲ್ಲವಾದರೆ ಈ ಜಾಗ ಯಥಾಸ್ಥಿತಿಯಲ್ಲಿಯೇ ಇರುತ್ತದೆ.

*ಸಚಿನ್, ಗುತ್ತಿಗೆದಾರ.*

ಗೋ ರಾ ಶ್ರೀನಿವಾಸ...

ಮೊ:9845856139.