ಚನ್ನಪಟ್ಟಣ:ನ/04/20/ಬುಧವಾರ. ಇತ್ತೀಚೆಗೆ ತಾಲ್ಲೂಕು, ಜಿಲ್ಲೆ, ರಾಜ್ಯ ಸೇರಿದಂತೆ ರಾಷ್ಟ್ರದಾದ್ಯಂತ ಅಪಘಾತ ಸಂಖ್ಯೆಗಳು ಹೆಚ್ಚಾಗುತ್ತಿವೆ. ಕೇವಲ ರಸ್ತೆ ಅಪಘಾತದಲ್ಲೇ ಒಂದು ವರ್ಷಕ್ಕೆ ಒಂದು ಲಕ್ಷದ ನಲವತ್ತು ಸಾವಿರ ಮಂದಿ ಅಸುನೀಗುತ್ತಾರೆ. ಇನ್ನೂ ಅಂಗಾಂಗಗಳನ್ನು ಊನ ಮಾಡಿಕೊಂಡವರು, ಜೀವನಪರ್ಯಂತ ಹಾಸಿಗೆ ಹಿಡಿದವರು, ಪ್ರಜ್ಞಾಹೀನರಾದವರ ಸಂಖ್ಯೆಯು ಲತಾ ದುಪ್ಪಟ್ಟಾಗಿವೆ. ಪೋಲೀಸರು ದಂಡ ಹಾಕುತ್ತಾರೆ ಎಂಬ ನೆಪಕ್ಕಾಗಿ ನೀವು ಹೆಲ್ಮೆಟ್ ಧರಿಸುವುದು ಬೇಡ. ನಿಮ್ಮ ಪ್ರಾಣ ರಕ್ಷಣೆಗಾಗಿ, ನಿಮ್ಮನ್ನೇ ನಂಬಿರುವ ನಿಮ್ಮ ಸಕುಟುಂಬಕ್ಕಾಗಿ ನೀವು ಹೆಲ್ಮೆಟ್ ಧರಿಸಿ ವಾಹನ ಚಲಾಯಿಸಬೇಕು ಎಂದು ಐಪಿಎಸ್ ಅಧಿಕಾರಿ ತಾಲ್ಲೂಕಿನ ಉಪ ಪೋಲಿಸ್ ಅಧೀಕ್ಷಕ ರಾಮರಾಜನ್ ಸಾರ್ವಜನಿಕರಿಗೆ ತಿಳಿಹೇಳಿದರು.

ಅವರು ಇಂದು ನಮ್ಮ ಪತ್ರಿಕೆಗೆ ಟ್ರಾಫಿಕ್ ದಂಡ ಕುರಿತು ಹೇಳಿಕೆ ನೀಡಿ ಮಾತನಾಡಿದರು.

ಕೊರೊನಾ ಸಮಯದಲ್ಲಿ ನಾವು ಸಹ ಕಾನೂನನ್ನು ಸ್ವಲ್ಪ ಸಡಿಲ ಬಿಟ್ಟು, ಹೆಲ್ಮೆಟ್ ಧರಿಸದಿರುವ ಸವಾರರಿಗೆ ವಿನಾಯಿತಿ ನೀಡಿದ್ದೆವು. ಆದರೆ ಮುಂದೆ ಹೀಗಾಗುವುದಿಲ್ಲ. ಹೆಲ್ಮೆಟ್ ಧರಿಸದ ಸವಾರರು, ವಾಹನಗಳ ದಾಖಲಾತಿಗಳು ಸಮರ್ಪಕವಾಗಿ ಇಲ್ಲದಿರುವವರು ಮತ್ತು ವಾಹನ ವಿಮೆ ಇಲ್ಲದಿರುವವರ ವಿರುದ್ದ ಸರ್ಕಾರದ ನಿಯಮದ ಪ್ರಕಾರ ದಂಡ ಹಾಕುತ್ತಿದ್ದೇವೆ. ಸವಾರರು ತಪ್ಪು ಮಾಡಿಯೂ ಸಹ ದಂಡ ಕಟ್ಟದಿರುವುದು, ಪೋಲೀಸರ ಜೊತೆಗೆ ವಾದ ಮಾಡುವುದು ಮತ್ತು ರಾಜಕೀಯ ಬಲಾಢ್ಯರ ಕಡೆಯಿಂದ ಕರೆ ಮಾಡಿಸುವುದು ಮಾಡುತ್ತಾರೆ. ಇದು ಸರಿಯಾದ ಕ್ರಮವಲ್ಲ. ದಂಡ ವಿಧಿಸಿದ ನಂತರ ಹಣ ನೀಡಿ ರಶೀದಿ ಪಡೆಯಬೇಕು. ಹಣಕ್ಕೂ ರಶೀದಿಗೂ ವ್ಯತ್ಯಾಸ ಕಂಡರೆ ಕೂಡಲೇ ಹಿರಿಯ ಅಧಿಕಾರಿಗಳ ಗಮನಕ್ಕೆ ತರಬೇಕು ಎಂದರು.

ನಮ್ಮ ದೇಶದಲ್ಲಿ ಬಡ ಜನರೂ ಇದ್ದಾರೆ. ಅವರ ಬಳಿಯೂ ವಾಹನಗಳಿವೆ. ಆದರೆ ಟ್ರಾಫಿಕ್ ನಿಯಮಗಳನ್ನು ಗಾಳಿಗೆ ತೂರಿ, ತಮ್ಮಿಷ್ಟದಂತೆ ನಡೆಯುತ್ತಾರೆ. ಕನಿಷ್ಠ ಐನೂರು ರೂಪಾಯಿ ದುಡಿಯುವ ವ್ಯಕ್ತಿ ಅಷ್ಟನ್ನೂ ದಂಡವಾಗಿ ಪಾವತಿಸಿ ಬರಿಗೈಯ್ಯಲ್ಲಿ ಮನೆಗೆ ತೆರಳಬೇಕಾಗುತ್ತದೆ. ಅದರ ಬದಲು, ವರ್ಷಕ್ಕೊಮ್ಮೆ ವಿಮೆ, ಒಂದು ಬಾರಿ ಪೂರ್ಣಪ್ರಮಾಣದ ದಾಖಲೆ, ಉತ್ತಮ ಹೆಲ್ಮೆಟ್ ಧರಿಸಿದರೆ ಅವನ ಸಂಪಾದನೆ ಅವನ ಬಳಿಯೇ ಉಳಿಯುತ್ತದೆ. ನಾವು ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುವಾಗ ಆಗುವ ಅಪಘಾತಗಳಿಗೂ, ಸಡಿಲಬಿಟ್ಟಾಗ ಆಗುವ ಅಪಘಾತಗಳಿಗೂ ಹೋಲಿಸಿದಾಗ ಅಪಘಾತಗಳ ಸಂಖ್ಯೆಯು ದ್ವಿಗುಣವಾಗಿವೆ. ಕಾನೂನು ಎಲ್ಲರಿಗೂ ಒಂದೇ ಆಗಿರುವುದರಿಂದ ಕಟ್ಟುನಿಟ್ಟಾಗಿ ಪಾಲೀಸಲೇ ಬೇಕು ಎಂದರು.

ಅಪಘಾತದಲ್ಲಿ ಮೊದಲು ಪೆಟ್ಟು ಬೀಳುವುದು ತಲೆಗೆ, ಅರ್ಧ ಹೆಲ್ಮೆಟ್, ಕ್ಯಾಪ್ ರೀತಿಯ ಹೆಲ್ಮೆಟ್, ಬೇಡ. ಐಎಸ್ಐ ದೃಢೀಕರಿಸಿದ, ತಲೆ ಸಂಪೂರ್ಣ ಮುಚ್ಚಿಕೊಳ್ಳುವಂತಹ ಹೆಲ್ಮೆಟ್ ಧರಿಸಿ, ಪೋಲೀಸರು ದಂಡ ಹಾಕುತ್ತಾರೆ ಎಂಬ ಒಂದೇ ಕಾರಣದಿಂದ ಹೆಲ್ಮೆಟ್ ಧರಿಸುವುದು ಬೇಡ. ಜಿಲ್ಲಾದ್ಯಂತ ಇನ್ನೂ ಮುಂದೆ ತುಂಬಾ ಹೆಚ್ಚಿನ ರೀತಿಯಲ್ಲಿ ಟ್ರಾಫಿಕ್ ನಿಯಮ ಉಲ್ಲಂಘನೆಯಾಗದಂತೆ ತಡೆಯಲು ಕಟ್ಟುನಿಟ್ಟಿನ ಕ್ರಮ ತೆಗೆದುಕೊಳ್ಳುತ್ತೇವೆ. ಅವರು ಗೊತ್ತು, ಇವರು ಪರಿಚಯ ಎಂದು ಪೋನ್ ಮಾಡಿಕೊಡುವುದು ಬೇಡ. ಅಧಿಕಾರಿಗಳು ಸಹ ಆ ಸಮಯದಲ್ಲಿ ಕರೆ ಸ್ವೀಕರಿಸುವುದಿಲ್ಲ. ಅದೂ ಅಪರಾಧವಾಗುತ್ತದೆ. ನಿಮ್ಮ ಭವಿಷ್ಯದ ಉತ್ತಮ ಜೀವನಕ್ಕಾಗಿ ನೀವು ನಿಯಮಗಳನ್ನು ಪಾಲಿಸಿ ಎಂದು ರಾಮರಾಜನ್ ರವರು ಸವಾರರಿಗೆ ಎಚ್ಚರಿಕೆಯ ಜೊತೆಗೆ ಸಂದೇಶ ರವಾನಿಸಿದರು.

ಗೋ ರಾ ಶ್ರೀನಿವಾಸ...

ಮೊ:9845856139.