ಚನ್ನಪಟ್ಟಣ:ನ/04/20/ಬುಧವಾರ.

ನಗರವೂ ಸೇರಿದಂತೆ ತಾಲೂಕಿನಾದ್ಯಂತ ಅದೆಷ್ಟೋ ಬಾವಿ, ಕೆರೆ, ಕುಂಟೆ, ಕಟ್ಟೆಗಳಿದ್ದು, ಅಂದಿನ ರಾಜಮಹಾರಾಜರು, ಪಾಳೇಗಾರರು ಮತ್ತು ಶ್ರೀಮಂತ ಸಾರ್ವಜನಿಕರು ಜನರ ಕುಡಿಯುವ ನೀರಿಗಾಗಿ ಅವುಗಳನ್ನು ನಿರ್ಮಿಸಿದ್ದರು. ಆದರೆ ಸ್ಥಳೀಯವಾಗಿ ಅವುಗಳನ್ನು ಬಳಸುತ್ತಿದ್ದು, ಸ್ಥಳೀಯರ ಹೆಸರನ್ನೋ, ರಾಜ ಅಥವಾ ಪಾಳೇಗಾರರ ಹೆಸರನ್ನೋ ಇಟ್ಟು ಉಲ್ಲೇಖಿಸುತ್ತಿದ್ದರು. ಆದರೆ ಚನ್ನಪಟ್ಟಣ ನಗರದ ಹೊರಭಾಗದಲ್ಲಿ ಈಗಲೂ ಇರುವ ಈ ಕೆರೆಯನ್ನು ಮಾತ್ರ ಕುಡಿನೀರು ಕಟ್ಟೆ ಎಂದೇ ಅಂದೂ ಮತ್ತು ಇಂದಿಗೂ ಸಂಬೋಧಿಸುತ್ತಲೇ ಬಂದಿರುವುದು ಮಾತ್ರ ಆ ನೀರು ಮತ್ತು ಕಟ್ಟೆಯ ವಿಶೇಷವೇ ಸರಿ.

ಕುಡಿನೀರು ಕಟ್ಟೆಯು ಬರಬರುತ್ತಾ ಕಿರಿದಾಗುತ್ತಾ ಬಂದಂತೆ ಅದರ ಹೆಸರೂ ಸಹ ಕುಡಿನೀರು ಕಟ್ಟೆಯ ಬದಲು ಕುನ್ನೀರ್ ಕಟ್ಟೆಯಾಗಿ ಬದಲಾಯಿತು. ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಬೆಂಗಳೂರು ಮೈಸೂರು ಹೆದ್ದಾರಿ ಮತ್ತು ಎಪಿಎಂಸಿ ಮಾರುಕಟ್ಟೆಗೆಂದು ಒತ್ತುವರಿ ಮಾಡಿಕೊಂಡರೆ ಇತ್ತ ಕೆಲ ಬಲಾಢ್ಯರು ಸಹ ಮೂವತ್ತು ಗುಂಟೆಗೂ ಹೆಚ್ಚು ಜಾಗವನ್ನು ಒತ್ತುವರಿ ಮಾಡಿಕೊಂಡಿದ್ದಾರೆ. ಸಂಬಂಧಿಸಿದ ಅಧಿಕಾರಿಗಳು ಮತ್ತು ಸಿಬ್ಬಂದಿಗಳು ಆಯಾಯ ಇಲಾಖೆಯಲ್ಲಿ ಕೆಲಸ ನಿರ್ವಹಿಸುತ್ತಿದ್ದರೂ ಸಹ ಒತ್ತುವರಿಯಾಗುತ್ತಿದ್ದಂತೆ ಎಚ್ಚೆತ್ತುಕೊಳ್ಳದಿರುವುದು ಅವರ ಮೇಲೆಯೇ ಸಾರ್ವಜನಿಕರು ಅನುಮಾನಪಡುವಂತಾಗಿದೆ.

ಈ ಹಿಂದೆ ತಾಲ್ಲೂಕಿನಲ್ಲಿ ಕರ್ತವ್ಯ ನಿರ್ವಹಿಸುತ್ತಿದ್ದ ತಹಶಿಲ್ದಾರ್ ಸುದರ್ಶನ್ ರವರಿಗೆ ಹಿಂದೂ ಜಾಗರಣಾ ವೇದಿಕೆಯ ಕಾರ್ಯಕರ್ತರು, ಒತ್ತುವರಿ ತೆರವುಗೊಳಿಸಲು ಮನವಿ ಮಾಡಿದ ನಂತರ ಸರ್ವೇ ಮಾಡಿಸಿ ಅಳತೆ ಕಲ್ಲು ನೆಡಿಸಿದ್ದರು. ನಂತರ ಬಂದ ತಹಶಿಲ್ದಾರ್ ನಾಗೇಶ್ ರವರು, ಒತ್ತುವರಿ ತೆರವುಗೊಳಿಸಲು ಮುಂದಡಿಯಿಡುವ ಮೊದಲೇ ಒತ್ತುವರಿದಾರರು, ಉಚ್ಚ ನ್ಯಾಯಾಲಯದಿಂದ ತಡೆಯಾಜ್ಞೆ ತಂದಿದ್ದು ತಾಲ್ಲೂಕು ಆಡಳಿತವೂ ಜಿಲ್ಲಾಧಿಕಾರಿಗಳಿಗೆ ಮತ್ತು ಸರ್ಕಾರಕ್ಕೆ ಪತ್ರ ಬರೆದು ತಡೆಯಾಜ್ಞೆ ತೆರವುಗೊಳಿಸಲು ಮನವಿ ಮಾಡಿರುವುದಾಗಿ ತಿಳಿದುಬಂದಿದೆ.

ಇನ್ನೂ ಕುಡಿಯುವ ನೀರಿನ ಕಟ್ಟೆ ಅಥವಾ ಕೆರೆಯ ರಸ್ತೆ ಬದಿ ಮತ್ತು ಏರಿಯ ಮೇಲೆ ನಿರ್ಮಿಸಿರುವ ಉದ್ಯಾನವನವಂತೂ ಪುಂಡುಪೋಕರಿಗಳ ತಾಣವಾಗಿ ಬದಲಾಗಿದೆ.

ಉದ್ಯಾನವನ್ನು ನಿರ್ಮಿಸಿದ ಹೊಸದರಲ್ಲಿ ಹಲವಾರು ಮಂದಿ ಮುಂಜಾನೆ ಮತ್ತು ಗೋಧೂಳಿ ಸಮಯದಲ್ಲಿ ವಾಯುವಿಹಾರ ಮಾಡುತ್ತಿದ್ದರು. ಉದ್ಯಾನ ಮೇಲ್ವಿಚಾರಣೆ ಹೊತ್ತ ಇಲಾಖೆಯು ಕೈಚೆಲ್ಲಿರುವುದರಿಂದ ಇದ್ದೊಂದು ಕೊಠಡಿಯ ಮೇಲ್ಛಾವಣಿಯೂ ಹೊಡೆದು ಸೋರುತ್ತಿದೆ. ಕೊಠಡಿಯು ಅನೈತಿಕ ತಾಣವಾಗಿ, ಹೆಂಡ ಸಾರಾಯಿ ಸಿಗರೇಟು ಬೀಡಿಗಳ ಕಮಟು ವಾಸನೆಯಿಂದ ಗಬ್ಬು ನಾರುತ್ತಿದೆ.

ಸುಂದರ ಉದ್ಯಾನಕ್ಕೆಂದು ನೆಟ್ಟು ಬೆಳೆಸಿರುವ ಅಲಂಕಾರಿಕ ಗಿಡಗಳು ಬೆಳೆದು ನಿಂತಿದ್ದು, ವಾಯುವಿಹಾರಿಗಳು ನಡೆದು ಹೋಗದಷ್ಟು ದಟ್ಟವಾಗಿ ಬೆಳೆದು ನಿಂತಿವೆ.

ನಗರದಲ್ಲಿ ಬೆರಳೆಣಿಕೆಯ ಉದ್ಯಾನಗಳಿದ್ದು, ಎಲ್ಲವೂ ಸಹ ನಿರ್ವಹಣೆ ಇಲ್ಲದೆ, ಸಾರ್ವಜನಿಕರಿಗೆ ಉಪಯೋಗವಾಗದೆ ಪುಂಡುಪೋಕರಿಗಳ ತಾಣವಾಗುತ್ತಿರುವುದು ಚನ್ನಪಟ್ಟಣ ನಗರಿಗರ ದುರಾದೃಷ್ಟವೋ ಅಥವಾ ಇಲಾಖೆಗಳ ಬೇಜಾವಾಬ್ದಾರಿಯೋ ಇಲ್ಲ ಸ್ಥಳೀಯ ಜನಪ್ರತಿನಿಧಿಗಳ ಉಡಾಳತನವವೋ ಗೊತ್ತಿಲ್ಲ.

ಗೋ ರಾ ಶ್ರೀನಿವಾಸ...

ಮೊ:9845856139.