ಚನ್ನಪಟ್ಟಣದಲ್ಲಿ ಸುಮಾರು 73 ವರ್ಷಗಳ ಹಿಂದೆ ನಿರ್ಮಾಣಗೊಂಡ ಗಾಂಧಿ ಭವನ ಶಿಥಿಲಾವಸ್ಥೆಯಲ್ಲಿದ್ದು,  ಅದರ ಪುನರ್ ನಿರ್ಮಾಣಕ್ಕೆ ಗಮನಹರಿಸುವಂತೆ ಚನ್ನಪಟ್ಟಣ ಜಾಗೃತ ಸಮುದಾಯ ಹಾಗೂ ಗಾಂಧಿ ಅಧ್ಯಯನ ಕೇಂದ್ರದ ಪದಾಧಿಕಾರಿಗಳು ಜಿಲ್ಲಾಧಿಕಾರಿ ಡಾ.ರಾಕೇಶ್ ಕುಮಾರ್ ಅವರಿಗೆ ಮನವಿ ಸಲ್ಲಿಸಿದರು.

ಚನ್ನಪಟ್ಟಣ ದ ಹೃದಯ ಭಾಗದಲ್ಲಿರುವ ಗಾಂಧಿ ಭವನವು ಶಿಥಿಲಗೊಂಡಿದ್ದು, ಅದರ ಜಾಗದ ಬಗ್ಗೆ ಗೊಂದಲವಿದೆ. ನಗರಸಭೆ ಮತ್ತು ತಾಲೂಕು ಕಚೇರಿ ಹಾಗೂ ಟ್ರಸ್ಟ್ ವತಿಯಿಂದ ಮಾಹಿತಿ ಪಡೆದು ಜಾಗವನ್ನು ವಶಕ್ಕೆ ಪಡೆದು, ಜಿಲ್ಲಾಧಿಕಾರಿಗಳ ಖಾತೆಯಲ್ಲಿರುವ 3 ಕೋಟಿ ರೂಪಾಯಿಗಳನ್ನು ಬಳಸಿಕೊಂಡು ನೂತನ ಭವನ ನಿರ್ಮಿಸಿಕೊಡಬೇಕೆಂದು ಒತ್ತಾಯಿಸಿದರು.

ಚನ್ನಪಟ್ಟಣಕ್ಕೆ  ಮಹಾತ್ಮಗಾಂಧಿಯವರು 1928 ರಲ್ಲಿ ಆಗಮಿಸಿದ್ದರು. ಆ ಸಂದರ್ಭದಲ್ಲಿ ಅವರು ಒಂದು ಗುಡಿಸಲು ಇರುವ ಜಾಗವನ್ನು ರಾತ್ರಿ ವಾಸ್ತವ್ಯಕ್ಕೆ ಬಯಸುತ್ತಾರೆ. ಆ ಸಂದರ್ಭದಲ್ಲಿ ರಸ್ತೆ ಪಕ್ಕದಲ್ಲಿದ್ದ ಸೂಕ್ತ

ಎನ್ನಿಸಿದ ಜಾಗ ಈಗ ಗಾಂಧಿಭವನ ಇರುವ ಜಾಗ. ಆಗ ಆರ್ಯಮೂರ್ತಿ ಎಂಬ ಕರಕುಶಲ ತರಬೇತಿ ಕೇಂದ್ರದ ನೌಕರ ಅಲ್ಲಿ ವಾಸವಾಗಿದ್ದರು. ಆ ಸಂದರ್ಭದಲ್ಲಿ ಸಂಘಟಕರು ಅವರನ್ನು ಕೋರಿ ಕೊಂಡಾಗ ಅವರು ಹೆಮ್ಮೆಯಿಂದ ಆ ಗುಡಿಸಲನ್ನು ಬಿಟ್ಟುಕೊಟ್ಟರು.

ಆದಾದ ಕೆಲವು ತಿಂಗಳುಗಳ ನಂತರ ಗಾಂಧಿಯವರ ವಿಚಾರಧಾರೆಗೆ ಮನಸೋತ ಅವರು, ಈ ಜಾಗವನ್ನು ಗಾಂಧಿಯವರ ಹೆಸರಿನಲ್ಲಿ ಸದುಪಯೋಗ ಪಡಿಸಿಕೊಳ್ಳಿ ಎಂದು ಆಗಿನ ಸ್ವಾತಂತ್ರ್ಯ ಹೋರಾಟದ

ಮುನ್ನೆಲೆಯಲ್ಲಿದ್ದ ವಿ.ವೆಂಕಟಪ್ಪನವರ ವಶಕ್ಕೆ ಬಿಟ್ಟುಕೊಟ್ಟರು.

ಆದಾದ ನಂತರ ವಿ.ವೆಂಕಟಪ್ಪನವರು ಹಾಗೂ ಅವರ ಸಹವರ್ತಿಗಳ ಪರಿಶ್ರಮದಿಂದ ಆಗಿನ ಮೈಸೂರು ರಾಜ್ಯದ ಮುಖ್ಯಮಂತ್ರಿ ಚೆಂಗಲ ರಾಯರೆಡ್ಡಿಯವರು 29-04-1950 ರಲ್ಲಿ ಅಲ್ಲಿ ಭವನ ಕಟ್ಟಲು ಅಸ್ಥಿಭಾರ ಹಾಕಿದರು.

30-10-1954ರಲ್ಲಿ ಆಗಿನ ಮಹಾರಾಜರಾಗಿದ್ದ  ಶ್ರೀ ಜಯರಾಮರಾಜೇಂದ್ರ ಒಡೆಯರ್ ಅವರು ಅದನ್ನು ಉದ್ಘಾಟಿಸಿದರು.ಈಗ ಆ ಭವನಕ್ಕೆ ಸರಿ ಸುಮಾರು 70 ವರ್ಷಗಳಾಗಿವೆ.

ಕಳೆದ 3 ವರ್ಷಗಳಿಂದಲೂ ಆ ಜಾಗದಲ್ಲಿ ಅನೇಕ ಕಾರ್ಯಕ್ರಮಗಳು ನಿಗದಿಯಾಗಿ, ಕಾರ್ಯಕ್ರಮ ಮಾಡಲು ಅದರ ಈಗಿನ ನಿರ್ವಹಣೆ ಮಾಡುವವರಿಂದ ಅವಕಾಶ ಸಿಕ್ಕಿಲ್ಲ.

ಈ ಭವನಕ್ಕೆ ಕಾಯಕಲ್ಪ ಆಗಬೇಕು, ಅದು ಸದ್ಯಕ್ಕೆ ಯಾರ ವಶದಲ್ಲಿ ಇದೆ ಬಯಲಾಗಲಿ ಎಂದು ಮಾಧ್ಯಮಗಳು ಬರೆದಿದ್ದೂ ಉಂಟು. ಕಳೆದ ವರ್ಷ ಈ ಭವನ ಸಾರ್ವಜನಿಕರಿಗೆ ಉಪಯೋಗವಾಗಲಿ ಎಂದು ಗಾಂಧಿ ಜಯಂತಿಯ ಸಂದರ್ಭದಲ್ಲಿ ಜಾಗೃತ ನಾಗರೀಕರು ಸತ್ಯಾಗ್ರಹ ಮಾಡಿದ್ದೂ ಸಹ ಉಂಟು.

ಕೆಲವರನ್ನು ಕೇಳಿದರೆ ಇದು ಬೆಂಗಳೂರಿನ ಗೋಖಲೆ ಟ್ರಸ್ಟ್ ವಶದಲ್ಲಿದೆ ಎಂದು ಹೇಳುತ್ತಾರೆ, ಮತ್ತೆ ಕೆಲವರು ವಿ.ವೆಂಕಟಪ್ಪನವರ ಕಾಲದಲ್ಲಿ ಒಂದು ಸ್ಥಳೀಯ ಟ್ರಸ್ಟ್ ಮಾಡಿದ್ದರು ಎಂದು ಹೇಳುತ್ತಾರೆ. ಆದರೆ ಟ್ರಸ್ಟಿಗಳಲ್ಲಿ ಒಬ್ಬರನ್ನು ಬಿಟ್ಟು ಉಳಿದವರೆಲ್ಲರೂ ಕಾಲವಶವಾಗಿದ್ದಾರೆ. ಈ ಸಂಬಂಧ ಶಾಸಕ ಕುಮಾರಸ್ವಾಮಿಯವರು, ಜಿಲ್ಲಕಾರಿಗಳ ಗಮನಕ್ಕೆ ತಂದು, ಅದರ ಮಾಹಿತಿಯನ್ನು ಸಂಗ್ರಹ ಮಾಡಿ ಎಂದು ಹೇಳಿದ್ದು ಉಂಟು.

ಜಿಲ್ಲಾಧಿಕಾರಿಗಳು ವಾರ್ತಾ ಮತ್ತು ಸಾರ್ವಜನಿಕರ ಸಂಪರ್ಕ ಇಲಾಖೆಯ ಸಹಾಯಕ ನಿರ್ದೇಶಕರಿಗೆ ಸೂಚಿಸಿ, ಅದರ ಮಾಹಿತಿ ತೆಗೆಯಲು ಹೇಳಿದ್ದರು. ಆಮೇಲೆ ಸಹಾಯಕ ನಿರ್ದೇಶಕರು ಇದಕ್ಕೆ 3 ಕೋಟಿ ಹಣ ನಿಗದಿ ಪಡಿಸಿಕೊಂಡಿರುವುದಾಗಿಯೂ, ಸುಂದರವಾದ 2 ಅಂತಸ್ತಿನ  ಕಟ್ಟಡ ಕಟ್ಟುವುದಾಗಿಯೂ ಹೇಳಿದ್ದರು. ಅದಾದ ನಂತರ ಯಾವುದು ಏನಾಯಿತು ಎಂದು ತಿಳಿಯುತ್ತಿಲ್ಲ. ಹಲವು ಬಾರಿ ಜಿಲ್ಲಾಕಾರಿಗಳ ಗಮನಕ್ಕೆ ತಂದು, ಅವರು ಹಲವು ಬಾರಿ ಸಭೆ ನಡೆಸುವ ದಿನಾಂಕ ನಿಗದಿ ಮಾಡಿದ್ದೂ ಉಂಟು. ಆದರೆ ಸಭೆ ನಡೆಯಲಿಲ್ಲ. ಈಗ ನೀವು ಈ ವಿಷಯವನ್ನು ಕೈಗೆತ್ತಿಕೊಂಡು ಗಾಂಧಿಭವನವನ್ನು ಪುನರ್  ನಿರ್ಮಾಣ ಮಾಡುವುದರ ಮೂಲಕ ಗಾಂಧಿಗೆ ಗೌರವ ತಂದು ಕೊಡುವಂತೆ ಪದಾಧಿಕಾರಿಗಳು ಮನವಿ ಮಾಡಿದರು.

ಈ ವೇಳೆ ಗಾಂಧಿ ಅಧ್ಯಯನ ಕೇಂದ್ರ ಪ್ರೊ.ಅಬಿದಾ ಬೇಗಂ, ಪತ್ರಕರ್ತರಾದ ಗೋ.ರಾ.ಶ್ರೀನಿವಾಸ್ , ಮಹೇಶ್ ಮೆಂಗಳ್ಳಿ ಮತ್ತಿತರರು ಹಾಜರಿದ್ದರು.

ಗೋ ರಾ ಶ್ರೀನಿವಾಸ...

ಮೊ:9845856139.