ತಾಲ್ಲೂಕಿನ ಮಾಕಳಿ ಗ್ರಾಮದ ನಿವೃತ್ತ ಕಂದಾಯ ನಿರೀಕ್ಷಕ ಪುಟ್ಟಲಿಂಗಯ್ಯ ಎಂಬುವವರು ಗ್ರಾಮ ಪಂಚಾಯತಿಯ ಆಸ್ತಿಯನ್ನು ಕಬಳಿಸಿ, ಅಕ್ರಮವಾಗಿ ಮನೆ ನಿರ್ಮಿಸಿಕೊಂಡಿದ್ದಾರೆ. ಇದರ ಬಗ್ಗೆ ದಾಖಲೆಗಳೊಂದಿಗೆ ಪಂಚಾಯತಿ ಅಭಿವೃದ್ಧಿ ಅಧಿಕಾರಿ, ಎಂ ಕೆ ದೊಡ್ಡಿ ಪೋಲೀಸ್ ಠಾಣೆ, ತಾಲ್ಲೂಕು ಪಂಚಾಯತಿ ಕಾರ್ಯನಿರ್ವಾಹಕ ಅಧಿಕಾರಿ, ಜಿಲ್ಲಾ ಪಂಚಾಯತಿ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಮತ್ತು ಜಿಲ್ಲಾಧಿಕಾರಿಗಳಿಗೆ ಲಿಖಿತ ದೂರು ನೀಡಿದರು ಸಹ ಇದುವರೆಗೂ ಸ್ಪಂದಿಸದಿರುವುದು ಅಧಿಕಾರಿಗಳ ಜಾಣನಡೆಯನ್ನು ಪ್ರಶ್ನಿಸುವಂತಾಗಿದೆ. ಶೀಘ್ರವಾಗಿ ಅಧಿಕಾರಿಗಳು ಬಂದು ಪರಿಶೀಲಿಸಿ ಮನೆಯನ್ನು ಉರುಳಿಸಿ, ಅಕ್ರಮದಾರನನ್ನು ಕಾನೂನು ರೀತ್ಯಾ ಶಿಕ್ಷಿಸಿ, ಸರ್ಕಾರದ ಆಸ್ತಿಯನ್ನು ಉಳಿಸಬೇಕು. ಇಲ್ಲವಾದರೆ ತಾಲ್ಲೂಕು ಪಂಚಾಯತಿ ಎದುರು ಉಗ್ರ ಹೋರಾಟ ಹಮ್ಮಿಕೊಳ್ಳುವುದಾಗಿ ಮಾಕಳಿ ಗ್ರಾಮ ಪಂಚಾಯತಿ ಮಾಜಿ ಸದಸ್ಯ ಪುಟ್ಟಲಿಂಗೇಗೌಡ ಮತ್ತು ಸಹವರ್ತಿಗಳು ಎಚ್ಚರಿಕೆ ನೀಡಿದರು.

ಹಿನ್ನೆಲೆ:

ತಾಲ್ಲೂಕಿನ ಮಳೂರು ಹೋಬಳಿಯ ಮಾಕಳಿ ಗ್ರಾಮದ 170/2 ಸರ್ವೇ ನಂಬರಿನಲ್ಲಿ ಶಾನುಭೋಗರ ಇನಾಂತಿಯ ಎರಡು ಎಕರೆ ಮೂವತ್ತು ಗುಂಟೆ ಜಮೀನು ಇದ್ದು, 1954 ನೇ ಇಸವಿಯಲ್ಲಿ ಗ್ರಾಮದ ಇಪ್ಪತ್ತೊಂದು ಮಂದಿಗೆ ನಿವೇಶನಗಳನ್ನು ವಿಂಗಡಿಸಿ ಹಂಚಲಾಗಿತ್ತು. ಉಳಿಕೆಯಾದ 21 ಗುಂಟೆ ಜಮೀನನ್ನು ಗ್ರಾಮ ಪಂಚಾಯತಿಯ ಸುಪರ್ದಿಗೆ ಬಿಟ್ಟು ಕೊಡಲಾಗಿದ್ದು, ಆ ಜಾಗದಲ್ಲಿ ಸಮುದಾಯ ಭವನ ಮತ್ತು ಪಶು ಚಿಕಿತ್ಸಾಲಯ ನಿರ್ಮಿಸಲು ಉದ್ದೇಶಿಸಲಾಗಿತ್ತು. ಆದರೆ 2007 ನೇ ಇಸವಿಯಲ್ಲಿ ಶಿವಲಿಂಗಯ್ಯ ಬಿನ್ ಚನ್ನೇಗೌಡ ಹಾಗೂ ಅವರ ತಾಯಿ ದೇವೀರಮ್ಮ ಮತ್ತು ಸಹೋದರ ನಾಗೇಶ್ ಹಾಗೂ ವಿಶ್ವೇಶ್ವರಯ್ಯ ಎಂಬುವರ ಹೆಸರಲ್ಲಿ ನಕಲಿ ದಾಖಲೆ ಸೃಷ್ಟಿಸಿ, ಆ ಜಾಗವನ್ನು ಕಬಳಿಸಿಲು ಯತ್ನಿಸಿದ್ದು, ಅಂದಿನ ಗ್ರಾಮ ಪಂಚಾಯತಿ ಅಧ್ಯಕ್ಷರಾಗಿದ್ದ ಗೋವಿಂದಯ್ಯ, ಸದಸ್ಯರಾದ ಪುಟ್ಟಲಿಂಗೇಗೌಡ, ಕೆಂಪೇಗೌಡ, ಈರೇಗೌಡ, ಶಿವರಾಜು, ಮತ್ತು ಚಿಕ್ಕೋನು ಎಂಬುವವರು ಸೇರಿ ಉಚ್ಚ ನ್ಯಾಯಾಲಯದಲ್ಲಿ ಸಾರ್ವಜನಿಕ ಹಿತಾಸಕ್ತಿ ಕೇಸು ದಾಖಲಿಸಿದ್ದರು.

2008 ರಿಂದ 2015 ರವರೆಗೆ ಕೇಸು ನಡೆದು, ನಂತರ ಚನ್ನಪಟ್ಟಣದ ಜೆಎಂಎಫ್ ಸಿ ನ್ಯಾಯಾಲಯಕ್ಕೆ ವರ್ಗಾಯಿಸಲಾಯಿತು. ಸದರಿ ನ್ಯಾಯಾಲಯದಲ್ಲಿ ಪ್ರಕರಣ ಸಂಖ್ಯೆಯ ಓ ಎಸ್ 183/15 ರ ಪ್ರಕಾರ 08/09/2015 ರಂದು ರಾಜಿ ಮಾಡಿಕೊಂಡು, ಶಿವಲಿಂಗಯ್ಯ ಮತ್ತು ಸಂಬಂಧಿಕರಿಗೆ 70×90 ರ ಅಳತೆಯ ಆರು ಗುಂಟೆ ಜಮೀನು ಬಿಟ್ಟು, ಉಳಿದ ಹದಿನೈದು ಗುಂಟೆ ಜಮೀನನ್ನು ಗ್ರಾಮ ಪಂಚಾಯತಿ ಜಾಗವೆಂದು ನ್ಯಾಯಾಲಯವು ಆದೇಶ ಹೊರಡಿಸಿತ್ತು. ಈ ಆದೇಶವು ಅಂದಿನ ಗ್ರಾಮ ಪಂಚಾಯತಿ ಅಧ್ಯಕ್ಷರಾಗಿದ್ದ ಲಕ್ಷ್ಮಮ್ಮ ಮತ್ತು ಉಪಾಧ್ಯಕ್ಷೆ ವರಲಕ್ಷ್ಮಮ್ಮ ಹಾಗೂ ಸದಸ್ಯರ ಸಮ್ಮುಖದಲ್ಲಿ ಪಂಚಾಯತಿಯ ಸಾಮಾನ್ಯ ಸಭೆಯ ಕಡತದಲ್ಲಿ ದಾಖಲಾಗಿದೆ ಎಂದು ತಿಳಿಸಿದರು.

ಆರು ತಿಂಗಳ ಹಿಂದೆ ನಿವೃತ್ತ ಕಂದಾಯ ನಿರೀಕ್ಷಕ ಪುಟ್ಟಲಿಂಗಯ್ಯ ಬಿನ್ ಆರ್ಮುನಿ ಕೆಂಪೀರೇಗೌಡ (ಹಾಲಿ ಬೆಂಗಳೂರು ವಾಸಿ) ಎಂಬುವವರು ಅಕ್ರಮವಾಗಿ ಮನೆ ನಿರ್ಮಿಸಲು ಮುಂದಾಗಿದ್ದು, ಅಂದಿನ ಅಭಿವೃದ್ಧಿ ಅಧಿಕಾರಿಗಳು ಸದರಿ ಜಾಗವು ಗ್ರಾಮ ಪಂಚಾಯತಿಗೆ ಸೇರಿದ್ದು, ಅತಿಕ್ರಮ ಪ್ರವೇಶ ಮಾಡಿದರೆ  ಕಠಿಣ ಶಿಕ್ಷೆಗೆ ಗುರಿಯಾಗುತ್ತೀರಿ ಎಂದು ಫಲಕ ಹಾಕಿದ್ದರು. ಸ್ವಲ್ಪ ಸಮಯ ಸುಮ್ಮನಿದ್ದು ಗ್ರಾಮ ಪಂಚಾಯತಿ ಚುನಾವಣಾ ಸಂದರ್ಭದಲ್ಲಿ ಬೋರ್ಡ್ ಕಿತ್ತೆಸೆದು, ಮಣ್ಣು ಹಾಕಿಸಿ ಮನೆ ನಿರ್ಮಿಸಿಕೊಂಡಿದ್ದಾರೆ. ಗ್ರಾಮ ಪಂಚಾಯತಿ ಅಧಿಕಾರಿಗಳು ಮತ್ತು ಚುನಾಯಿತ ಪ್ರತಿನಿಧಿಗಳು ಕಂಡು ಕಾಣದಂತೆ ಜಾಣಗುರುಡು ಪ್ರದರ್ಶಿಸುತ್ತಿದ್ದಾರೆ. ಇದನ್ನೆಲ್ಲಾ ಗಮನಿಸಿ ಎಲ್ಲಾ ಹಂತದ ಅಧಿಕಾರಿಗಳಿಗೆ ಲಿಖಿತ ದೂರು ನೀಡಿದರೂ ಸಹ ಎಚ್ಚೆತ್ತುಕೊಳ್ಳದಿರುವುದು ಆಡಳಿತಾಧಿಕರಿಗಳು ಯಾರ ಪರವಿದ್ದಾರೆ ಎಂಬ ಗುಮಾನಿ ಬರುತ್ತಿದೆ. ಮಾರ್ಚಿ ತಿಂಗಳಿನಲ್ಲಿ ಅಧಿಕಾರಿಗಳು ಕಾನೂನು ಕ್ರಮ ಕೈಗೊಳ್ಳದಿದ್ದರೆ ಉಗ್ರ ಹೋರಾಟ ಹಮ್ಮಿಕೊಳ್ಳಲಾಗುವುದು ಎಂದು ಅವರು ಎಚ್ಚರಿಕೆ ನೀಡಿದರು.

ಗೋ ರಾ ಶ್ರೀನಿವಾಸ...

ಮೊ:9845856139.