ಚನ್ನಪಟ್ಟಣ: ಮೇ 21 22. ಅರಣ್ಯ ನಾಶ ಪಡಿಸಿದರೆ ಬದುಕು ನಾಶವಾಗುತ್ತದೆ, ಪರಿಸರ ಉಳಿಸಿದರೆ ಮಾತ್ರ ಎಲ್ಲರ ಬದುಕು ಬಂಗಾರವಾಗುತ್ತದೆ. ಪ್ರಕೃತಿ ಉಳಿಸಲು ಕೇವಲ ಅರಣ್ಯ ಇಲಾಖೆ ಅಷ್ಟೇ ಅಲ್ಲಾ ಪ್ರತಿಯೊಬ್ಬರೂ ಗಿಡಗಳನ್ನು ನೆಟ್ಟು ಉಳಿಸಿ ಬೆಳೆಸಬೇಕು. ಓಝೋನ್ ಪದರ ಸರಿಹೋಗಲು ಪರಿಸರ ಬಹಳ ಮುಖ್ಯ. ಮನುಷ್ಯ ಸೇರಿದಂತೆ ಪ್ರತಿಯೊಂದು ಜೀವಿಯೂ ಬದುಕುಳಿಯಬೇಕಾದರೆ ಪ್ರಕೃತಿ ಸಮತೋಲನ ಮುಖ್ಯವಾಗುತ್ತದೆ ಎಂದು ಹಿಂದುಳಿದ ವರ್ಗಗಳ ಕಲ್ಯಾಣ ಇಲಾಖೆಯ ಆಯುಕ್ತರಾದ ಕೆ ಎ ದಯಾನಂದ ತಿಳಿಸಿದರು.

ಅವರು ಇಂದು ಅರಣ್ಯ ಪರಿಸರ ಮತ್ತು ಜೀವಿಶಾಸ್ತ್ರ ಇಲಾಖೆಯ ಸಹಯೋಗದಲ್ಲಿ ಮುಕುಂದರಾವ್ ಲೋಕಂಡೆ ನೇತೃತ್ವದಲ್ಲಿ ಕುವೆಂಪು ಕಾಲೇಜು ಬಳಿ ಹಮ್ಮಿಕೊಂಡಿದ್ದ ಬರಡು ಪ್ರದೇಶಗಳಲ್ಲಿ ಅರಣ್ಯೀಕರಣದ ನೂತನ ತಂತ್ರಜ್ಞಾನದ ಅಳವಡಿಕೆಯ ಅಧ್ಯಯನ ಕೇಂದ್ರ ಕಾರ್ಯಕ್ರಮ ಉದ್ಘಾಟನಾ ಸಮಾರಂಭದಲ್ಲಿ ಮಾತನಾಡಿದರು.

ಪರಿಸರ ಎಂದರೆ ಅದೊಂದು ಪುನರ್ಜನ್ಮ ಪುನರ್ಜನ್ಮ ಎಂದರೆ ಮರುಹುಟ್ಟಲ್ಲ. ಮರು ಹುಟ್ಟು ಬಂದಿರುವ ಯಾವುದೇ ಉದಾಹರಣೆಗಳಿಲ್ಲ. ಅದಕ್ಕೆ ಸಾಕ್ಷಿಯು ಇಲ್ಲಾ. ಸಾವಿರ ವರ್ಷಗಳ ಹಿಂದೆ ಸಮಾಜಕ್ಕಾಗಿ ಬದುಕಿ ಹೋದವರ ನೆನಪು ನಮಗೆ ಇದೆ. ಸ್ವಾತಂತ್ರ್ಯಕ್ಕಾಗಿ ಬಲಿದಾನಗೈದವರ ಹೆಸರು ಹೇಳಿದ ತಕ್ಷಣ ಅವರ ಮುಖ ನಮ್ಮ ಕಣ್ಮುಂದೆ ಬರುತ್ತದೆ ಅದೇ ಪುನರ್ಜನ್ಮ. ಸಮಾಜಕ್ಕಾಗಿ ಗತಿಸಿದವರ ಹೆಸರು ನಮಗೆ ನೆನಪಿದೆ ಎಂದಾಗ ನಮ್ಮ ನೆನಪು ಮುಂದಿನ ಪೀಳಿಗೆಗೆ ಉಳಿದುಕೊಳ್ಳುವಂತೆ ನಾವು ಕೆಲಸ ಮಾಡಬೇಕು. ಅದರಲ್ಲೂ ವಿಶೇಷವಾಗಿ ಪರಿಸರ ಉಳಿಸುವ ಕೆಲಸ ಮಾಡಿದರೆ ಹೆಸರಿನ ಜೊತೆಗೆ ಅವರಿಗೆ ಉಸಿರು ಕೊಟ್ಟಂತಾಗುತ್ತದೆ ಎಂದು ತಿಳಿಸಿದರು.

ಕಾರ್ಯಕ್ರಮದ ರೂವಾರಿ ಮುಕುಂದರಾವ್ ಲೋಕಂಡೆ ಯವರು ಮಾತನಾಡಿ ಮನೆಗೊಂದು ಗಿಡವಲ್ಲಾ, ವ್ಯಕ್ತಿಗೊಂದು ಗಿಡ ನೆಡಬೇಕು. ಆ ಗಿಡವನ್ನು ಮನೆಯ ಸದಸ್ಯರಂತೆ ಅಕ್ಕರೆಯಿಂದ ನೋಡಿಕೊಂಡರೆ ಮಾತ್ರ ಅದು ಹೆಮ್ಮರವಾಗುತ್ತದೆ. ಮನೆಯ ಬಳಿ ಜಾಗ ಇದ್ದವರೆಲ್ಲರೂ ಒಂದೊಂದು ಗಿಡ ನೆಡಿ. ಅದಕ್ಕೆ ನೀವು ನೀರು ಹಾಕಲು ಸಮಯ ಮೀಸಲಿಡುವುದು ಬೇಡ ಪ್ರತಿಬಾರಿ ಊಟ ಮಾಡಿದ ನಂತರ ಗಿಡದ ಗುಂಡಿಯಲ್ಲಿ ಕೈ ತೊಳೆಯಿರಿ. ಇದು ನಿಮ್ಮ ಮುಂದಿನ ಪೀಳಿಗೆಗೆ ಉಸಿರು ತುಂಬಲು ನೀವು ನೀಡುವಂತಹ ಕೊಡುಗೆ ಎಂದು ಮಕ್ಕಳಿಗೆ ಕಿವಿಮಾತು ಹೇಳಿದರು.

ಕಳೆದ ಇಪ್ಪತ್ತು ವರ್ಷಗಳಲ್ಲಿ ಹಿಂದೆ ಬಹುತೇಕ ಬರಡಾಗಿದ್ದ ಇದೇ ಚಿಕ್ಕಮಣ್ಣುಗುಡ್ಡೆ ಪ್ರದೇಶದಲ್ಲಿ ನಿರಂತರವಾಗಿ ಹದಿನಾಲ್ಕು ಲಕ್ಷ ಬೀಜಗಳನ್ನು ಹಾಕಿದ್ದು ಇಂದು ಹಸಿರುಮಯವಾಗಿರಲು ಸಾಧ್ಯವಾಗಿದೆ ಎಂದು ಸಂತಸ ವ್ಯಕ್ತಪಡಿಸಿದರು.

ಉಪ ಅರಣ್ಯ ಸಂರಕ್ಷಣಾಧಿಕಾರಿ ವಿ ದೇವರಾಜು ಮಾತನಾಡಿ ನಾಡಿಗಿಂತ ಕಾಡು ಮೂರು ಪಟ್ಟು ಹೆಚ್ಚಿರಬೇಕು. ಆಗ ಮಾತ್ರ ಪ್ರಕೃತಿ ಸಮತೋಲನ ಕಾಯ್ದುಕೊಳ್ಳಲು ಸಾಧ್ಯವಾಗುತ್ತದೆ. ಇತ್ತೀಚಿಗೆ ಕಾಡು ಅಭಿವೃದ್ಧಿ ಹೊಂದುತ್ತಿರುವುದರಿಂದ ಪ್ರಾಣಿಗಳ ಸಂಖ್ಯೆ ಹೆಚ್ಚುತ್ತಿದೆ. ಅದೇ ರೀತಿ ನಾಡಿಗೆ ಬರುವುದು ಹೆಚ್ಚಾಗುತ್ತಿದೆ. ಇದನ್ನು ಶಾಶ್ವತವಾಗಿ ತಡೆಗಟ್ಟಲು ಸೂಕ್ತ ಕ್ರಮ ಕೈಗೊಳ್ಳಲಾಗುತ್ತಿದೆ. ಚಿತ್ರಗಳಲ್ಲಿ ನೋಡಬೇಕಾದಂತಹ ಪ್ರಾಣಿಗಳನ್ನು ನಾವು ಸ್ಥಳೀಯವಾಗಿ ನೋಡಲಾಗುತ್ತಿದೆ. ಪ್ರತಿಯೋರ್ವ ವ್ಯಕ್ತಿಯು ಪರಿಸರ ಕಾಳಜಿ ವಹಿಸಿದರೆ ಮಾತ್ರ ಕಾಡು ಉಳಿಯಲು ಸಾಧ್ಯ ಎಂದರು. ಕಾಡಿನಿಂದ ಆಚೆ ಬರುವ ಪ್ರಾಣಿಗಳಿಂದ ರೈತ ಬೆಳೆದ ಬೆಳೆ ನಾಶವಾಗುತ್ತಿದೆ. ಪ್ರಾಣಹಾನಿಯೂ ಉಂಟಾಗುತ್ತಿದೆ.

ಕಾರ್ಯಕ್ರಮದಲ್ಲಿ ಜಿಲ್ಲಾ ಹಿಂದುಳಿದ ವರ್ಗಗಳ ಕಲ್ಯಾಣಾಧಿಕಾರಿ ಶಿವಪ್ರಿಯ ಬಿ ಕಡೆಚೂರ್, ತಾಲ್ಲೂಕು ಅಧಿಕಾರಿ ಎನ್ ಮೋಹನ್, ಒನ್ ಭೂಮಿ ಫೌಂಡೇಶನ್ ನ ನವನೀತ್, ಕುಂಬಾಪುರ ಬಾಬು ಅರಣ್ಯ ಇಲಾಖೆಯ ಸಿಬ್ಬಂದಿಗಳು, ಬಾಲು ಪಬ್ಲಿಕ್ ಸ್ಕೂಲ್ ನ ಪ್ರೌಢಶಾಲಾ ವಿದ್ಯಾರ್ಥಿಗಳು ಮತ್ತು ಶಿಕ್ಷಕರು ಉಪಸ್ಥಿತರಿದ್ದರು. ವಿದ್ಯಾರ್ಥಿಗಳಿಗೆ ಅರಣ್ಯಕ್ಕೆ ಸಂಬಂಧಿಸಿದ ಉಪನ್ಯಾಸ ಸೇರಿದಂತೆ ವಿವಿಧ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗಿತ್ತು.

ಗೋ ರಾ ಶ್ರೀನಿವಾಸ...

ಮೊ:9845856139.