ಚನ್ನಪಟ್ಟಣ.ಏ.೦೫: ತಾಲ್ಲೂಕಿನ ನೀಲಸಂದ್ರ ಗ್ರಾಮದ ಹೊರವಲಯದಲ್ಲಿರುವ ಶ್ರೀ ಭೈರವೇಶ್ವರ ಸ್ವಾಮಿ ದೇವಾಲಯದಲ್ಲಿ ಕಳ್ಳತನವಾಗಿದ್ದು ಈ ಸಂಬಂಧ ಅರ್ಚಕ ಸೇರಿದಂತೆ ನಾಲ್ವರು ಆರೋಪಿಗಳ ವಿರುದ್ಧ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಎಫ್‌ಐಆರ್ ದಾಖಲಾಗಿದೆ.

ಕಳೆದ ವಾರವಷ್ಟೇ ಶ್ರೀ ಭೈರವೇಶ್ವರ ಸ್ವಾಮಿ ಜಾತ್ರಾ ಮಹೋತ್ಸವವು ನಡೆದಿತ್ತು. ದೇವಸ್ಥಾನದಲ್ಲಿ ಅಳವಡಿಸಿದ್ದ ಸಿಸಿ ಕ್ಯಾಮರಾವನ್ನು ಆರೋಪಿಗಳು ಕೈಯಿಂದ ಮುಚ್ಚಿ ದೇವಸ್ಥಾನದಲ್ಲಿದ್ದ ಸುಮಾರು ೭೦ ಸಾವಿರ ಮೌಲ್ಯದ ೫೦೦ ಗ್ರಾಂ ಬೆಳ್ಳಿ ಕಳಸ ಹಾಗೂ ೩೫೦ ಗ್ರಾಂ ತೂಕದ ೩೫ ಬೆಳ್ಳಿ ನಾಣ್ಯಗಳನ್ನು ಆರೋಪಿಗಳು ಕಳವು ಮಾಡಿದ್ದಾರೆ. ಈ ಸಂಬಂಧ ದೇವಸ್ಥಾನದ ವೀರಭದ್ರಯ್ಯ ನವರ ಮಗ ನಾಗೇಶ್ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.

ಆರೋಪಿಗಳಾದ ಸೆಣಬನಹಳ್ಳಿ ಗ್ರಾಮದ ಪ್ರಭಾಕರ್, ಅದೇ ಗ್ರಾಮದ ಯೋಗೇಶ್ ಹಾಗೂ ಕಿರಣ್ ಮತ್ತು ಮೊಳೆದೊಡ್ಡಿ ಗ್ರಾಮದ ಚಂದು ಎಂಬುವವರು ಕಳೆದ ಶನಿವಾರ ತಡರಾತ್ರಿ ಈ ಕೃತ್ಯ ಎಸಗಿದ್ದಾರೆ ಎಂದು ಎಫ್‌ಐಆರ್‌ನಲ್ಲಿ ದಾಖಲಿಸಲಾಗಿದೆ.

ಕಳೆದ ತಿಂಗಳು ೨೭ರಿಂದ ಏ.೦೧ರ ವರೆಗೆ ಜಾತ್ರಾ ಮಹೋತ್ಸವ ನಡೆದಿತ್ತು. ದೇವಸ್ಥಾನದ ಅರ್ಚಕರನ್ನಾಗಿ ಸೆಣಬನಹಳ್ಳಿ ಗ್ರಾಮದ ಯಧುಕುಮಾರ್ ಅವರನ್ನು ನೇಮಕ ಮಾಡಲಾಗಿತ್ತು. ಶನಿವಾರ ತಡರಾತ್ರಿ ಅದೇ ಗ್ರಾಮದ ಪ್ರಭಾಕರ್ ಎಂಬುವವರು  ಯಧುಕುಮಾರ್ ಅವರಿಗೆ ಫೋನ್ ಮಾಡಿ ಪೂಜೆ ಮಾಡಿಸಲು ಬೆಂಗಳೂರಿನಿಂದ ಭಕ್ತಾಧಿಗಳು ಬಂದಿದ್ದು ದೇವಸ್ಥಾನದ ಕೀ ಬೇಕು ಎಂದು ಪಡೆದುಕೊಂಡು ಹೋಗಿದ್ದಾರೆ.

ಈ ಸಂಬಂಧ ಯಧುಕುಮಾರ್ ಅವರು ವೀರಭದ್ರಯ್ಯನವರಿಗೆ ವಿಷಯ ತಿಳಿಸಿದಾಗ, ಇಷ್ಟು ತಡರಾತ್ರಿ ದೇವಸ್ಥಾನಕ್ಕೆ ಯಾರೂ ಬರುವುದಿಲ್ಲವೆಂದು ತಮ್ಮ ಮಗನಿಗೆ ದೇವಸ್ಥಾನದ ಬಳಿ ಹೋಗಿ ಪರಿಶೀಲಿಸಿಕೊಂಡು ಬರಲು ಹೇಳಿದ್ದಾರೆ.

ಅವರ ಮಗ ನಾಗೇಶ್ ದೇವಸ್ಥಾನದ ಬಳಿ ಬಂದಾಗ ಹೊರಗಡೆ ಚಂದು ಇದ್ದು, ಅವರನ್ನು ಪ್ರಶ್ನಿಸಿದಾಗ ಒಳಗಡೆ ಪ್ರಭಾಕರ್ ಕಿರಣ್, ಯೋಗೇಶ್ ಪೂಜೆ ಮಾಡುತ್ತಿದ್ದಾರೆ ಎಂದು ತಿಳಿಸಿದ್ದಾರೆ. ಸ್ವಲ್ಪ ಹೊತ್ತಿನ ನಂತರ ಅವರು ದೇವಸ್ಥಾನದ ಹೊರಗಡೆ ಬಂದಾಗ ಪ್ರಶ್ನಿಸಿದಾಗ ಪೂಜೆ ಮಾಡುತ್ತಿದ್ದಾಗಿ ತಿಳಿಸಿದ್ದಾರೆ, ಅವರ ಕೈನಲ್ಲಿ ಒಂದು ಬಿಳಿ ಕವರ್ ಇರುವುದಾಗಿ ಅವರು ಗುರುತು ಹಚ್ಚಿದ್ದಾರೆ.

ಕಳೆದ ಭಾನುವಾರ ದೇವಸ್ಥಾನದ ಅರ್ಚಕ  ಕುಮಾರ್ ಪೂಜೆ ಮಾಡಲು ದೇವಸ್ಥಾನಕ್ಕೆ ಹೋದ ಸಂದರ್ಭದಲ್ಲಿ ಕಳ್ಳತನವಾಗಿರುವ ಘಟನೆ ಬೆಳಕಿಗೆ ಬಂದಿದೆ.

ದೇವಸ್ಥಾನದ ಕೀ ಪಡೆದ ಆರೋಪಿಗಳು ಒಳಹೋಗಿ, ಅಲ್ಲಿದ್ದ ಸಿಸಿ ಕ್ಯಾಮರವನ್ನು ತಮ್ಮ ಕೈಯಿಂದ ಮರೆಮಾಚಿ ಕಳ್ಳತನ ಮಾಡಿರುವುದು ಸಿಸಿ.ಟಿವಿಯಲ್ಲಿ ರೆಕಾರ್ಡ್ ಹಾಕಿದೆ. ಇಷ್ಟಿದ್ದರೂ ಸಹ ಪೊಲೀಸರು ಐಎಫ್ಆರ್ ದಾಖಲಿಸಲು ಮೀನಾ ಮೇಸ ಎಣಿಸಿದ್ದು ನಡೆದಿದೆ.

ಕಳ್ಳತನ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸ್ ಠಾಣೆಯಲ್ಲಿ ನಗರಸಭಾ ಸದಸ್ಯರೊಬ್ಬರ ನೇತೃತ್ವದಲ್ಲಿ ರಾಜಿ ಸಂಧಾನಕ್ಕೆ ಯತ್ನಿಸಲಾಗಿದೆ. ಈ ವಿಷಯ ಮಾಧ್ಯಮಗಳಲ್ಲಿ ಪ್ರಕಣಗೊಂಡ ನಂತರವಷ್ಟೇ ಪೊಲೀಸರು ಎಫ್‌ಐಆರ್ ದಾಖಲಿಸಿದ್ದಾರೆ.

ದೇವಸ್ಥಾನದಲ್ಲಿ ನಡೆದ ಈ ರೀತಿಯ ಕಳ್ಳತನ ಪ್ರಕರಣಗಳಿಗೇ ರಾಜಿ ಸಂದಾನ ನಡೆದರೆ, ತಪ್ಪಿತಸ್ಥರಿಗೆ ಶಿಕ್ಷೆಯಾಗುವುದು ಎಂದು? ಅಲ್ಲದೆ ಈ ರೀತಿಯ ಪ್ರಕರಣಗಳಿಗೆ ಪೊಲೀಸರ ಮಧ್ಯಸ್ಥಿಕೆಯಲ್ಲಿ ರಾಜಿ ಸಂಧಾನ ನಡೆಸಲು ಕಾನೂನಿನಲ್ಲಿ ಅವಕಾಶವಿದೆಯೇ ಎಂಬ ಪ್ರಶ್ನೆ ಸಾರ್ವಜನಿಕರನ್ನು ಕಾಡುತ್ತಿದೆ.

ಗೋ ರಾ ಶ್ರೀನಿವಾಸ...

ಮೊ:9845856139.