ಚನ್ನಪಟ್ಟಣ: ಕಷ್ಟಪಟ್ಟು ದುಡಿದು ಮನೆ, ಒಂದಷ್ಟು ಆಸ್ತಿಯನ್ನು ಕೊಳ್ಳಲು ಹಾಗೂ ಕಷ್ಟಕ್ಕಾಗಿಯೋ, ಹೆಚ್ಚಿನ ಉದ್ದಿಮೆಗಾಗಿಯೋ ಮಾಡಿಟ್ಟ ಆಸ್ತಿಯನ್ನು ಮಾರುವವರು ದಿನಗಟ್ಟಲೆ ಕಾಯುವುದನ್ನು ತಪ್ಪಿಸಲೆಂದೇ ನೋಂದಣಿ ಮತ್ತು ಮುದ್ರಾಂಕಗಳ ಇಲಾಖೆಯನ್ನು ಜನಸ್ನೇಹಿಯನ್ನಾಗಿಸುವ ಸಲುವಾಗಿ ಕಾವೇರಿ 2.0 ತಂತ್ರಾಂಶವನ್ನು ಅನುಷ್ಟಾನಕ್ಕೆ ತರಲಾಗಿದೆ. ಮಾರುವವರು, ಕೊಳ್ಳುವವರ ಜೊತೆಗೆ ಹಲವಾರು ದಾಖಲೆಗಳನ್ನು ಮನೆಯಲ್ಲೇ ಕುಳಿತು ಆನ್‌ಲೈನ್ ಮೂಲಕ ಪಡೆಯಲು ಸಹ ಈ ತಂತ್ರಾಂಶ ಉಪಯುಕ್ತವಾಗಿದೆ ಎಂದು ಜಿಲ್ಲಾ ನೋಂದಣಾಧಿಕಾರಿ ಸವಿತಾಲಕ್ಷ್ಮಿ ತಿಳಿಸಿದರು. ಅವರು ನಗರದ ನೋಂದಣಿ ಕಚೇರಿಯಲ್ಲಿ ಕಾವೇರಿ 2.0 ತಂತ್ರಾಂಶಕ್ಕೆ ಚಾಲನೆ ನೀಡಿ ಮಾತನಾಡಿದರು.

ಕಾವೇರಿ 2.0 ತಂತ್ರಾಂಶವನ್ನು ಇದೇ ವರ್ಷದ ಮಾರ್ಚ್ ತಿಂಗಳಿನಲ್ಲಿ ಆರಂಭಿಸಲಾಗಿದ್ದು, ರಾಜ್ಯದಲ್ಲಿ ಈಗಾಗಲೇ ಹಲವಾರು ಕಚೇರಿಗಳಲ್ಲಿ ಕಾರ್ಯ ನಿರ್ವಹಿಸುತ್ತಿದೆ. ಈ ತಂತ್ರಾಂಶವು ಜನಸ್ನೇಹಿ ನೋಂದಣಿ ವ್ಯವಸ್ಥೆಯಾಗಿದೆ. ಅರ್ಜಿದಾರರಿಗೆ ಸುಲಭ ಹಾಗೂ ಸರಳವಾಗಿ ನೋಂದಣಿ ಮಾಡಿಕೊಳ್ಳಲು ಸಹಾಯ ಮಾಡುತ್ತಿದ್ದು, ಸಂಪೂರ್ಣ ಆನ್‌ಲೈನ್ ಆಗಿದೆ. ಸರ್ವರ್ ಡೌನ್ ಸಹ ಆಗುವುದಿಲ್ಲ ಎಂದರು. 

ನೋಂದಣಿಯಾದ ನಂತರ ಪ್ರತಿಯನ್ನು ನೇರವಾಗಿ ಪಡೆಯಬಹುದು ಅಥವಾ ಡಿಜಿ ಲಾಕರ್ ತಂತ್ರಾಂಶದಲ್ಲಿಯೂ ಸಹ ಪ್ರತಿ ಲಭ್ಯವಿರುತ್ತದೆ. ಈ ತಂತ್ರಾಂಶದ ಸಹಾಯದಿಂದ ನ್ಯಾಯಾಲಯಗಳಲ್ಲಿ ದಾಖಲಾಗಿರುವ ಪ್ರಕರಣಗಳ ಮಾಹಿತಿಯು ಲಭ್ಯವಾಗಲಿದೆ. ಅಲ್ಲದೇ ಇ-ಆಸ್ತಿ ಮತ್ತು ಇ-ಸ್ವತ್ತು ಸಹ ಜೋಡಣೆಯಾಗಿರುತ್ತದೆ ಎಂದು ತಿಳಿಸಿದರು.

ಅರ್ಜಿ ಸಲ್ಲಿಸಿದ ನಂತರ ತಿದ್ದುಪಡಿ ಮಾಡಲು ಸಹ ಕಾವೇರಿ 2.0 ತಂತ್ರಾಂಶದಲ್ಲಿ ಅವಕಾಶ ಕಲ್ಪಿಸಲಾಗಿದೆ. ಇನ್ನು ಮುಂದೆ ಕೆ2 ಚಲನ್ ಪಡೆದು ನೋಂದಣಿ ಕಾರ್ಯಮಾಡುವುದನ್ನು ಸ್ಥಗಿತಗೊಳಿಸಲಾಗಿದೆ ಎಂದು ತಿಳಿಸಿದರು.

ಚನ್ನಪಟ್ಟಣ ದ ನೋಂದಣಾಧಿಕಾರಿ ಕಛೇರಿಯು ವಿಸ್ತಾರವಾಗಿಲ್ಲದಿರುವುದರಿಂದ ಇಲಾಖೆಯಲ್ಲಿ ಮೂಲಭೂತ ಸೌಕರ್ಯಕ್ಕೆ ಹೆಚ್ಚು ಒತ್ತು ನೀಡಲಾಗುತ್ತಿಲ್ಲ. ಬಹುತೇಕ ಎಲ್ಲಾ ರಾಜ್ಯದ ಹಲವಾರು ಕಚೇರಿಗಳಲ್ಲಿ ಈಗಾಗಲೇ ಕಾಯ್ದಿರಿಸಲಾದ ಕೊಠಡಿ, ಶಿಶು ಪಾಲನ ಸ್ಥಳ, ಅವಶ್ಯವಿರುವ ಕಡೆ ಲಿಫ್ಟ್, ವಿಶೇಷಚೇತನರಿಗೆ ವೀಲ್ಹ್ ಚೇರ್‌ಗಳ ವ್ಯವಸ್ಥೆ, ನೋಂದಣಿ ಪ್ರದೇಶ, ಶೌಚಾಲಯಗಳನ್ನು ನಿರ್ಮಿಸಲಾಗಿದೆ. ಇಲ್ಲಿಯೂ ಸರ್ಕಾರ ಉತ್ತಮ ಜಾಗ ನೀಡಿದರೆ ಅಗತ್ಯ ಸೌಲಭ್ಯಗಳನ್ನು ಕಲ್ಪಿಸಲಾಗುತ್ತದೆ. ಉತ್ತಮ ಜಾಗಕ್ಕಾಗಿ ಸರ್ಕಾರಕ್ಕೆ ಮನವಿ ಮಾಡಲಾಗಿದ್ದು, ಸ್ಪನ್ ಸಿಲ್ಕ್ ಮಿಲ್ ನಲ್ಲಿ ನೀಡಿದ ಜಾಗ ನೆನೆಗುದಿಗೆ ಬಿದ್ದಿದೆ. ನಗರಸಭೆ, ಪ್ರಾಧಿಕಾರ ಅಥವಾ ರೆವಿನ್ಯೂ ಜಾಗವನ್ನು ಸಂಬಂಧಿಸಿದವರು ನೀಡಲು ಕೋರಲಾಗಿದೆ ಎಂದರು.

ಕಾವೇರಿ 2.0 ತಂತ್ರಾಂಶದ ಕುರಿತು ಈಗಾಗಲೇ ಸಹಾಯವಾಣಿ ಸಹ ಸ್ಥಾಪಿಸಲಾಗಿದ್ದು, ಸಂಖ್ಯೆ: 080-68265316 ಯಾಗಿದೆ. ನೋಂದಣಿ ಮತ್ತು ಮುದ್ರಾಂಕ ಇಲಾಖೆಯಲ್ಲಿ ದಸ್ತಾವೇಜು ನೋಂದಣಿ, ಸಾಮಾನ್ಯ ಅಧಿಕಾರ ಪತ್ರ, ಚರ ಮತ್ತು ಸ್ಥಿರಾಸ್ತಿ ಅಡಮಾನ ಪತ್ರಗಳು, ಗುತ್ತಿಗೆ ಒಪ್ಪಂದ ಕರಾರು, ಮರಣ ಶಾಸನಗಳು, ದಾನ, ವಿಭಾಗ ಪತ್ರಗಳು, ಇಸಿ ಮತ್ತು ಸಿಸಿ ಇತ್ಯಾದಿಗಳನ್ನು ಇನ್ನು ಮುಂದೆ ಕಾವೇರಿ ತಂತ್ರಾಂಶದ ಮುಖಾಂತರವೇ ನೋಂದಣಿ ಮಾಡಿಕೊಳ್ಳಬಹುದು ಎಂದು ಹೇಳಿದರು. 

ಕಾರ್ಯಕ್ರಮದಲ್ಲಿ ಉಪನೋಂದಣಾಧಿಕಾರಿ ಮೇನಕಾ, ಸೀಡಾಕ್ ಇಂಜಿನಿಯರ್ ಲೋಕೇಶ್, ಸಿಬ್ಬಂದಿ ವರ್ಗ, ಪತ್ರ ಬರಹಗಾರರು ಹಾಗೂ ನೋಂದಣಿಗಾಗಿ ಬಂದಿದ್ದ ಗ್ರಾಹಕರು ಉಪಸ್ಥಿತರಿದ್ದರು.

ಗೋ ರಾ ಶ್ರೀನಿವಾಸ...

ಮೊ:9845856139.