ಸುಖಜೀವನ ನಮ್ಮದಾಗಬೇಕೆಂದರೆ ವಿದ್ಯಾರ್ಥಿ ಇದ್ದಾಗ ಓದು, ಯುವಕರಿದ್ದಾಗಿ ದುಡಿಮೆ ಇವೆಲ್ಲದರ ನಡುವೆ ಸಮಾಜಕ್ಕಾಗಿ ಕೆಲಸಮಯ ಮೀಸಲಿಟ್ಟರೆ ವಯಸ್ಸಾದ ನಂತರ ಸುಖ ಜೀವನ ನಡೆಸಬಹುದು ಎಂದು ಭಾರತೀಯ ನಿವೃತ್ತ ಯೋಧ ಅಂಕನಹಳ್ಳಿ ತಿಮ್ಮೇಗೌಡ ಅಭಿಪ್ರಾಯಪಟ್ಟರು.

ಅವರು ನಗರದ ಬಾಲು ಪಬ್ಲಿಕ್ ಶಾಲೆಯ ಸರ್ ಎಂ ವಿಶ್ವೇಶ್ವರಯ್ಯ ಸಭಾಂಗಣದಲ್ಲಿ ಏರ್ಪಡಿಸಿದ್ದ ಕರ್ನಾಟಕ ದಂಡಿನ ಮಾರಮ್ಮ ರೈತ ಸಂಘ ಉದ್ಘಾಟನಾ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡಿದರು.

ಕಕಜವೇ ಅಧ್ಯಕ್ಷ ರಮೇಶ್ ಗೌಡ ಮಾತನಾಡಿ ಇಂದು ವ್ಯವಸ್ಥೆ ಹದಗೆಟ್ಟಿದೆ, ರಾಜಕೀಯ, ಪೋಲಿಸ್ ಇಲಾಖೆ, ಸಾರ್ವಜನಿಕ ಇಲಾಖೆಗಳಲ್ಲಿ ಭ್ರಷ್ಟಾಚಾರ ಎಗ್ಗಿಲ್ಲದೆ ನಡೆಯುತ್ತಿದೆ, ರೈತರ ಗೋಳು ಹೇಳಲಾಗದಷ್ಟು ಶೋಚನೀಯವಾಗಿದೆ, ರಿಯಲ್ ಎಸ್ಟೇಟ್ ದಂಧೆ ರೈತರ ಪಾಲಿಗೆ ಮಾರಕವಾಗಿದೆ, ಇವೆಲ್ಲವನ್ನು ಪ್ರಶ್ನಿಸಲು, ಪ್ರತಿಭಟಿಸಲು ಹಾಗೂ ಹಿತರಕ್ಷಣೆಗಾಗಿ ಸಂಘಟನೆಗಳು ಬೇಕಾಗಿವೆ ಈ ನಿಟ್ಟಿನಲ್ಲಿ ಸಂಘವು ಯಶಸ್ಸು ಕಾಣಲಿ ಎಂದು ಶುಭಕೋರಿದರು.

ಖಾಸಗಿ ಅನುದಾನರಹಿತ ಶಾಲೆಗಳ ಒಕ್ಕೂಟದ ಅಧ್ಯಕ್ಷ ವೆಂಕಟಸುಬ್ಬಯ್ಯಚೆಟ್ಟಿ ಮಾತನಾಡಿ ನಮ್ಮಲೆಲ್ಲರೂ ತಮ್ಮ ಮಕ್ಕಳು ಡಾಕ್ಟರ್ ಇಂಜಿನಿಯರ್ ಆಗಬೇಕೆಂದು ಆಸೆ ಪಡುತ್ತಾರೆ, ಜಮೀನ್ದಾರ ಸಹಿತ ನನ್ನ ಮಗ ರೈತನಾಗಲಿ ಎಂದು ಆಸೆ ಪಡುವುದಿಲ್ಲ, ಇನ್ನು ಮುಂದೆ ನಮ್ಮ ರೈತರು ತಮ್ಮ ಮಕ್ಕಳನ್ನು ರೈತರನ್ನಾಗಿ ಮಾಡಲು ಉತ್ತೇಜನ ನೀಡಿದರೆ ಒಳಿತು ಎಂದು ಅಭಿಪ್ರಾಯ ವ್ಯಕ್ತಪಡಿಸಿದರು.

ಸಂಘದ ಅಧ್ಯಕ್ಷ ಕೃಷ್ಣೇಗೌಡ ಮಾತನಾಡಿ ದೇಶದ ಗಡಿ ಕಾಯಲು ಸೈನಿಕ ಬೇಕು, ಜೀವಸಂಕುಲವನ್ನು ಸಾಕಲು ರೈತ ಬೇಕು, ಆದರೆ ಇಂದು ರೈತನಿಗೆ ಸಂಕಷ್ಟ ಎದುರಾಗಿದೆ ಅವನ ಬೆಂಬಲಕ್ಕೆ ಸರ್ಕಾರ ಎಂದೂ ನಿಲ್ಲುತ್ತಿಲ್ಲ, ರೈತನಿಗೆ ಸಾಲ ಮನ್ನಾ ಬೇಕಿಲ್ಲ, ಅವನಿಗೆ ವೈಜ್ಞಾನಿಕ ಬೆಲೆ ನೀಡಿದರೆ ಸಾಕು ಎಂದರು.

ನಮ್ಮ ಸಂಘಟನೆ ರೈತರಿಗೆ ಸಾರ್ವಜನಿಕರಿಗೆ ಮುಕ್ತವಾಗಿದ್ದು ನ್ಯಾಯಬದ್ದವಾಗಿ ದೊರಕಬೇಕಾದ ಸೌಲಭ್ಯಗಳನ್ನು ಒದಗಿಸಲು ಬದ್ದವಾಗಿದೆ ಎಂದರು.

ಇದೇ ವೇಳೆ ಕೆಲವು ರೈತರು ಹಸಿರು ಟವೆಲ್ ಧರಿಸುವ ಮೂಲಕ ಸಂಘಟನೆಗೆ ಸೇರಿದರು.

ವೇದಿಕೆಯಲ್ಲಿ ಹಿರಿಯ ವಕೀಲ ಟಿ ಎಂ ಲಕ್ಷ್ಮಣ್ ಸೇರಿದಂತೆ ಸಂಘದ ಪದಾಧಿಕಾರಿಗಳು ಭಾಗವಹಿಸಿದ್ದರು.

"ಇತ್ತೀಚೆಗೆ ರೈತ ಸಂಘವು ಅನೇಕ ಹೋಳುಗಳಾಗಿ ರಾಜ್ಯದಲ್ಲೇ ಆರು ಮತ್ತೊಂದು ಬಣಗಳಿದ್ದು ಜಿಲ್ಲಾ ಮತ್ತು ತಾಲ್ಲೂಕು ಮಟ್ಟದಲ್ಲಿ ಹತ್ತಾರು ಬಣಗಳಾಗಿ ವಿಂಗಡಣೆಯಾಗಿವೆ, ಈ ಸಂಘವು ಹತ್ತರಲ್ಲಿ ಮತ್ತೊಂದಾಗದೆ ಸ್ವಹಿತಕ್ಕೆ ಬಲಿಕೊಡದೆ ರೈತರಿಗೆ ಗಟ್ಟಿದನಿಯಾಗಲಿ ಎಂದು ಪತ್ರಿಕೆ ಆಶಿಸುತ್ತದೆ."

ಗೋ ರಾ ಶ್ರೀನಿವಾಸ...

ಮೊ; 9845856139.