ತಾಲ್ಲೂಕು ಕೆರೆಗಳಿಗೆ ನೀರು ತುಂಬಿಸದಿರಲು ಏನು ಕಾರಣ ಎಂಬುದರ ಬಗ್ಗೆ ಇಂದು ತಾಲ್ಲೂಕು ಪಂಚಾಯತ್ ಸಭಾಂಗಣದಲ್ಲಿ ಕರೆದಿದ್ದ ಜೆ ಡಿ ಎಸ್ ಮತ್ತು ತಾಲ್ಲೂಕಿನ ಹಿರಿಯ ಮುಖಂಡರ ಸಭೆಯನ್ನು ಮುಖ್ಯಮಂತ್ರಿಗಳ ವಿಶೇಷ ಅಧಿಕಾರಿ ಕೃಷ್ಣಪ್ಪ ಮತ್ತು ಕಾವೇರಿ ನೀರಾವರಿ ಇಂಜಿನಿಯರ್ ವೆಂಕಟೇಗೌಡರ ಅಧ್ಯಕ್ಷತೆಯಲ್ಲಿ ಆಯೋಜಿಸಲಾಗಿತ್ರು.

ಜೆ ಡಿ ಎಸ್ ನ ಬಹುತೇಕ ಎಲ್ಲಾ ನಾಯಕರು ಇಂಜಿನಿಯರ್ ವೆಂಕಟೇಗೌಡರ ಮೇಲೆ ಹಲವಾರು ಕಾರಣಗಳನ್ನು ನೀಡುವುದರ ಮೂಲಕ ಮಾತಿನ ವಾಗ್ಬಾಣಗಳನ್ನು ಹರಿಯಬಿಡುವುದರ ಮೂಲಕ ವೆಂಕಟೇಗೌಡರನ್ನು ನಿರುತ್ತರಾಗುವಂತೆ ಮಾಡಿದರು.

ಬಹುತೇಕ ಜೆ ಡಿ ಎಸ್ ನ ಮುಖಂಡರೆಲ್ಲರೂ ಹಿಂದಿನ ಶಾಸಕರಿದ್ದಾಗ ಇದೇ ವೆಂಕಟೇಗೌಡರು ಎಲ್ಲಾ ಕೆರೆಗಳಿಗೂ ನೀರು ತುಂಬಿಸುತಿದ್ದು, ಈಗ ಕೇಳಿದರೆ ಸಬೂಬು ಹೇಳುತಿದ್ದಾರೆ. ಇದ್ದರೆ ಇರಿ, ಇಲ್ಲಾಂದರೆ ಬೇರೆ ಕಡೆ ಹೋಗಲಿ ಎಂದು ಕೆಲವು ನಾಯಕರು ಎದ್ದು ನಿಂತು ರೋಷವಾಗಿ ನುಡಿದರು.

ಹಿರಿಯ ರೈತ ಮುಖಂಡ ಸಿ ಪುಟ್ಟಸ್ವಾಮಿ ಮಾತನಾಡಿ ಈ ಸಮಸ್ಯೆಗಳು ಶೀಘ್ರವಾಗಿ ಬಗೆಹರಿಯಬೇಕೆಂದರೆ ಕೆಲವು ಮಾರ್ಪಾಡುಗಳನ್ನು ಮಾಡಿಕೊಳ್ಳುವಂತೆ ಸಲಹೆ ನೀಡಿದರು.

ಈಗ ಒಂದೂವರೆ ಟಿಎಂಸಿ ನೀರು ಸರಬರಾಜಿಗೆ ಅನುಮತಿ ಇದ್ದು, ಕೆರೆಗಳು ಹೆಚ್ಚಾಗಿರುವುದರಿಂದ ಎರಡೂವರೆ ಟಿಎಂಸಿ ನೀರನ್ನು ಬಳಸಿಕೊಳ್ಳಲು ಅನುಮತಿ ಪಡೆಯಿರಿ.

ದಂಡಾಧಿಕಾರಿ, ಪೋಲಿಸ್ ಅಧಿಕಾರಿ, ವಿದ್ಯುತ್ ಸಂಪರ್ಕ ಅಧಿಕಾರಿ ಮತ್ತು ಪಂಚಾಯ್ತಿ ಅಧಿಕಾರಿಗಳನ್ನು ಸೇರಿಸಿಕೊಂಡು ಸಮಿತಿ ಮಾಡಿ.

ಸತ್ತೇಗಾಲ ಮತ್ತು ಮೇಕೇದಾಟು ಸೇರಿದಂತೆ ಇನ್ನಿತರ ಯೋಜನೆಗಳ ಬಗ್ಗೆ ಗಮನಹರಿಸಿ.

೨೦೧೪ ರಲ್ಲಿ ಸಿ ಟು (C2 point) ಗೆ ಟೆಂಡರ್ ಕರೆದಿದ್ದು ಇನ್ನೂ ಆಗದಿರಲು ಕಾರಣ ಏನು ಅದಕ್ಕೆ ಪರಿಹಾರ ಹುಡುಕಿ ಶೀಘ್ರವಾಗಿ ಜಾರಿಗೊಳಿಸಲಿ.

ಮೋಟಾರು ಮತ್ತು ಪಂಪ್ ಗೆ ಸಂಬಂಧಿಸಿದಂತೆ ಯಾರು ಅಕ್ರಮವಾಗಿ ನಡೆದುಕೊಂಡರೆ ಯಾರೇ ಆಗಲಿ ಕಾನೂನು ಕ್ರಮ ಕೈಗೊಳ್ಳಿ.

ಪ್ರತಿಯೊಬ್ಬರಿಗೂ ನೀರಿಗೆ ಸಂಬಂಧಿಸಿದಂತೆ ಒಂದು ದೂರವಾಣಿ ಸಂಖ್ಯೆಯನ್ನು ಶಾಶ್ವತವಾಗಿ ನೀಡಬೇಕು ಎಂದು ಸಿ ಪುಟ್ಟಸ್ವಾಮಿ ಸಲಹೆ ನೀಡಿದರು.

ಇದನ್ನೆಲ್ಲಾ ಕೇಳಿಸಿಕೊಂಡ ನಂತರ ಮಾತನಾಡಿದ ವೆಂಕಟೇಗೌಡರು ತಾಂತ್ರಿಕ ಕಾರಣಗಳು ಅನೇಕ ಇವೆ, ಆದರೆ ಇದನ್ನು ಅರ್ಥಮಾಡಿಕೊಳ್ಳುವವರು ಕಡಿಮೆ, ಏನಾದರೂ ಆಗಲಿ ಎಲ್ಲವನ್ನೂ ಸರಿಪಡಿಸಿ ನವೆಂಬರ್ ಹದಿನೈದರೊಳಗಾಗಿ ಎಲ್ಲಾ ಕೆರೆಗಳನ್ನು ತುಂಬಿಸಲಾಗುವುದು ಎಂದು ಭರವಸೆ ನೀಡಿದರು.

ವಿಶೇಷ ಅಧಿಕಾರಿ ಕೃಷ್ಣಪ್ಪ ಮಾತನಾಡಿ ರೈತ ಮುಖಂಡ ಸಿ ಪುಟ್ಟಸ್ವಾಮಿ ಯವರ ಸಲಹೆಗಳು ಸೂಕ್ತವಾಗಿದ್ದು ಅದನ್ನು ಅಧಿಕಾರಿಗಳ ಜೊತೆ ಚರ್ಚಿಸಿ ಕ್ರಮಕೈಗೊಳ್ಖತ್ತೇನೆ, ಹಾಗೆ ಜೆಡಿಎಸ್ ಮುಖಂಡರಲ್ಲಿ ಅನೇಕ ವಿಷಯಗಳನ್ನು ಅರಿಯಲು ಆಸೆ ಪಟ್ಟಿದ್ದೆ, ಆದರೆ ಸಂಪೂರ್ಣ ವಿಷಯಗಳನ್ನಾಗಲಿ ನೀಲಿ ನಕ್ಷೆಯನ್ನಾಗಲಿ ಕೊಡುತ್ತಾರೆಂದು ನಿರೀಕ್ಷಿಸಿದ್ದೆ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ಮುಂದಿನ ಸಭೆಯಲ್ಲಿ ಜೆಡಿಎಸ್ ಮುಖಂಡರು ಇನ್ನೂ ಹೆಚ್ಚಿನ ಪ್ರಮಾಣದಲ್ಲಿ ಬಂದು ಒಗ್ಗೂಡಿ ಅನೇಕ ಸಮಸ್ಯೆಗಳ ಬಗ್ಗೆ ಸೂಕ್ತ ದಾಖಲೆ ನೀಡಿ ಜನರ ಸಮಸ್ಯೆಗಳನ್ನು ಪರಿಹರಿಸಲು ಕೈಜೋಡಿಸಿ ಎಂದು ಕರೆ ನೀಡಿದರು.

 

ಗೋ ರಾ ಶ್ರೀನಿವಾಸ...

ಮೊ; 9845856139