ಪುರಾತನ ಜೀವಂತ ಸಮಾಧಿ

ರಾಮನಗರ ಜಿಲ್ಲೆಯ ಮಾಗಡಿ ತಾಲ್ಲೂಕಿನ ಗೆಜ್ಜಗಾರಗುಪ್ಪೆಯಲ್ಲಿ ಪುರಾತನವಾದ ಸರಿ ಸುಮಾರು ಹನ್ನೆರಡನೇ ಶತಮಾನದ್ದು ಎಂದು ಹೇಳಲಾಗುವ ಶ್ರೀ ಮುರಾರಿ ಸ್ವಾಮಿಯ ಜೀವಂತ ಸಮಾಧಿ ಇರುವ ಮಂಟಪವೊಂದಿದ್ದು ಅದನ್ನು ಜೀರ್ಣೋದ್ಧಾರ ಮಾಡಲು ಕುಮಾರಸ್ವಾಮಿ ಎಂಬುವವರು ಮುಂದಾಗಿದ್ದಾರೆ.

 

 

ಮಂಟೇಸ್ವಾಮಿ ಸಮಕಾಲೀನರಂತೆ

ಗೆಜ್ಜಗಾರಗುಪ್ಪೆ ಗ್ರಾಮದ ಹೊರಭಾಗದಲ್ಲಿ ಬಹುತೇಕ ಹಾಳಾದಂತಿರುವ ಹಾಗೂ ಒಂದಕ್ಕೊಂದು ಅಂಟಿಕೊಂಡಿರುವಂತೆ ಮೂರು ಮಾಳಿಗೆಯ ಮಂಟಪಗಳಿದ್ದು ಮಧ್ಯದಲ್ಲಿ ಸ್ವಲ್ಪ ದೊಡ್ಡದಾಗಿರುವ ಮಂಟಪದಲ್ಲಿ ಎರಡು ಸಮಾಧಿಗಳಿವೆ, ಅದರಲ್ಲಿ ಇಪ್ಪತ್ತು ವರ್ಷದ ಹಿಂದೆ ಬಲವಂತವಾಗಿ ಬಲವಂತವಾಗಿ ಜೀವಂತ ಸಮಾಧಿಯಾಗಿದ್ದಾರೆ ಎಂದು ಹೇಳಲಾಗುವ ಮಂಟೇಸ್ವಾಮಿ ಸಮಕಾಲೀನರಾದ ಶ್ರೀ ಮುರಾರಿ ಸ್ವಾಮಿಗಳ ಜೀವಂತ ಸಮಾಧಿ ಎಂದು ಸ್ಥಳೀಯರು ನಂಬಿದ್ದಾರೆ.

 

ಭೂಗತ ಕಲ್ಯಾಣಿ ಪತ್ತೆ

ಬಹುದೊಡ್ಡದಾದ ಅಂದರೆ ಅರ್ಧ ಎಕರೆಗೂ ಹೆಚ್ಚು ವಿಸ್ತೀರ್ಣವಾದ ಕಲ್ಯಾಣಿ ಮಂಟಪದ ಕೂಗಳತೆ ದೂರದಲ್ಲಿ ಇದ್ದು ಸಂಪೂರ್ಣ ಮುಚ್ಚಿಹೋಗಿದೆ, ಅದನ್ನು ಸ್ವಚ್ಛಗೊಳಿಸಿ ಮಂಟಪ ಮತ್ತು ಕಲ್ಯಾಣಿಗೂ ಏನಾದರೂ ಸಂಬಂಧ ಇದೆಯಾ ಎನ್ನುವುದನ್ನು ಇನ್ನಷ್ಟೇ ಮನಗಾಣಬೇಕಾಗಿದೆ.

 

ಮಂಟಪದ ಮುಂದೆಯೂ ಸಮಾಧಿಗಳು

ಮಂಟಪದ ಮುಂದೆ ಎರಡು ಸಮಾಧಿಗಳಿವೆ, ಅವುಗಳ ಮುಂದೆ ಮತ್ತೊಂದು ಮಂಟಪ ಕಟ್ಟಿ ಅದರಲ್ಲೊಂದು ಸಮಾಧಿ ಇದೆ, ಇಪ್ಪತ್ತು ವರ್ಷದಲ್ಲಾದ ಒಂದು ಜೀವಂತ ಸಮಾಧಿ ಹೊರತುಪಡಿಸಿದರೆ ಮತ್ಯಾವ ಸಮಾಧಿಗಳ ಬಗ್ಗೆಯೂ ಸ್ಥಳೀಯರಿಗೆ ಮಾಹಿತಿ ಇಲ್ಲ.

ಜೀವಂತ ಸಮಾಧಿಯ ಎರಡು ಭಾಗಗಳಲ್ಲಿ ಮಾಳಿಗೆ ಮಂಟಪಗಳು ಮತ್ತು ಕಲ್ಲಿನ ಕಾಂಪೌಂಡ್

ಮುರಾರಿ ಸ್ವಾಮಿಗಳ ಮಂಟಪದ ಆಜೂಬಾಜು ಎರಡು ಕಲ್ಲಿನ ಮಂಟಪಗಳಿದ್ದು ಅವುಗಳನ್ನು ಯಾಕೆ ನಿರ್ಮಿಸಲಾಗಿತ್ತು, ಎಂಬುದನ್ನು ಕಂಡುಕೊಳ್ಳಬೇಕಾಗಿದೆ.

ಹಾಗೆ ಮಂಟಪದ ಸುತ್ತಲೂ ಕಲ್ಲು ಮತ್ತು ಮಣ್ಣು ಸೇರಿಸಿ ನಿರ್ಮಿಸಿರುವ ಕಾಂಪೌಂಡ್ ಈಗಲೂ ಅಚ್ಚುಕಟ್ಟಾಗಿ ಸ್ಥಿರವಾಗಿ ನಿಂತಿರುವುದು ಅಚ್ಚರಿ ಮೂಡಿಸುತ್ತದೆ.

 

ತಾಳೆಗರಿಯ ಓಲೆ ಮತ್ತು ಪಿಟೀಲು

ಅದೇ ಗ್ರಾಮದ ಪ್ರಮುಖರೊಬ್ಬರ ಮನೆಯಲ್ಲಿ ಎರಡು ಕಟ್ಟು ತಾಳೆಗರಿಗಳು ಸಿಕ್ಕಿದ್ದು ಅವುಗಳು ಅವರ ಸುಪರ್ದಿಯಲ್ಲಿ ಭದ್ರವಾಗಿವೆ, ಆ ತಾಳೆಯೋಲೆಯಲ್ಲಿರುವ ಅಕ್ಷರಗಳನ್ನು ಭೇದಿಸಿ ಅದು ಮಹಾರಾಜರ ಕಾಲದ್ದ, ಕೆಂಪೇಗೌಡರ ಕಾಲದ್ದ ಅಥವಾ ಮುರಾರಿ ಸ್ವಾಮಿಗಳಿಗೆ ಸಂಬಂಧಿಸಿದ್ದ ಎಂದು ಸಂಶೋಧನೆ ಮಾಡಿಸಿ ಸತ್ಯಾಂಶವನ್ನು ಕಂಡುಕೊಳ್ಳಬೇಕಾಗಿದೆ.

ತಾಳೆಗರಿ ಸಂಗ್ರಹಿಸಿರುವವರ ಮನೆಯಲ್ಲಿ ಜರ್ಮನಿ ದೇಶದ್ದು ಎಂದು ಹೇಳಲಾಗುವ ನೂರು ವರ್ಷಕ್ಕೂ ಹಳೆಯದಾದ ಪಿಟೀಲು ಇದ್ದು ತುಂಬಾ ಆಕರ್ಷಕವಾಗಿದೆ.

 

ಕುಮಾರಸ್ವಾಮಿ ಯವರಿಗೆ ಶುಭವಾಗಲಿ 

ಈ ಗದ್ದುಗೆಯನ್ನು ಪೂಜಿಸಲು ಅನೇಕಮಂದಿ ಮುಂದಾಗಿದ್ದು ಇದುವರೆಗೂ ಯಾರೂ ಕೂಡ ನೆಲೆ ನಿಲ್ಲಲಾಗಿಲ್ಲ, ಹಾಗೂ ಸಂಪೂರ್ಣ ನಾಶವಾಗಿ ಹೋಗಿದ್ದಾರೆ ಎಂದು ಗ್ರಾಮಸ್ಥರು ಹೇಳುತ್ತಾರೆ, ಇದರ ನಡುವೆ ಶ್ರೀ ಕುಮಾರಸ್ವಾಮಿಯವರು ಅವುಗಳ ಜೀರ್ಣೋದ್ಧಾರಕ್ಕಾಗಿ ಮುಂದಡಿಯಿಟ್ಟಿರುವುದು ಶ್ಲಾಘನೀಯ.

ಸ್ಥಳೀಯ, ಗ್ರಾಮಸ್ಥರು, ಪ್ರಾಚ್ಯವಸ್ತು ಇಲಾಖೆ ಹಾಗೂ ಇತಿಹಾಸ ಸಂಶೋಧಕರ ನೆರವು ಪಡೆದು ಈ ರೀತಿಯ ಪುರಾತನವಾದವುಗಳನ್ನು ರಕ್ಷಿಸುವುದು ಎಲ್ಲರ ಕರ್ತವ್ಯ.

ಮುನ್ನುಡಿ ಬರೆದಿರುವ ಕುಮಾರಸ್ವಾಮಿಯವರಿಗೆ ಶುಭವಾಗಲಿ.

 

ಗೋ ರಾ ಶ್ರೀನಿವಾಸ...

ಮೊ: 9845856139.