ಪರ್ಯಾಯ ಮಾರ್ಗ ಸೂಚಿಸುವಂತೆ ಮನವಿ ಮಾಡುತ್ತಿರುವ ಮುಖಂಡರು

ದಂಡಾಧಿಕಾರಿಗಳ ಖಡಕ್ ಉತ್ತರ

ಒತ್ತುವರಿಯಾಗಿರುವ ರಾಜಕಾಲುವೆಯನ್ನು ಯಾವುದೇ ಕಾರಣಕ್ಕೂ ತೆರವುಗೊಳಿಸದೆ ಬಿಡುವುದಿಲ್ಲ, ಮೇಲಿನ ಅಧಿಕಾರಿಗಳಿಂದ ಆದೇಶ ಬಂದಿರುವುದರಿಂದ ನಾಳೆಯಿಂದಲೇ ತೆರವು ಕಾರ್ಯಾಚರಣೆ ನಡೆಯಲಿದೆ ಎಂದು ತಾಲ್ಲೂಕಿನ ದಂಡಾಧಿಕಾರಿ ಯೋಗಾನಂದ ತಿಳಿಸಿದರು.

ನಗರದ ಸಾತನೂರು ರಸ್ತೆಯ ಮಹದೇಶ್ವರ ಬಡಾವಣೆಯಲ್ಲಿ ಹಾದುಹೋಗಿರುವ ರಾಜಕಾಲುವೆ ಸ್ಥಳ ಪರಿಶೀಲನೆ ವೇಳೆ ಅಲ್ಲಿನ ನಿವಾಸಿಗಳಿಗೆ ರಾಜಕಾಲುವೆ ತೆರವುಗೊಳಿಸಲು ಸ್ಪಂದಿಸುವಂತೆ ಸೂಚಿಸಿದರು.

ಬಡಾವಣೆ ನಿರ್ಮಾತೃ ವಿರುದ್ಧ ಮೊಕದ್ದಮೆ !?

ಕೊತ್ತನಹಳ್ಳಿ ಕೆರೆ (ಈಗಿನ ಬಸ್ ಡಿಪೋ, ಸಾಮಾನ್ಯ ಅರಣ್ಯ ಇಲಾಖೆ ಮತ್ತು ವಿದ್ಯಾರ್ಥಿ ನಿಲಯಕ್ಕೆ ಹಸ್ತಾಂತರಿಸಿರುವ ಜಾಗ) ಯಿಂದ ಬೀಡಿ ಕಾಲೋನಿ ಕಡೆಯಿಂದ ಹರಿದುಬರುವ ನಾಲೆಯೇ ರಾಜ ಕಾಲುವೆಯಾಗಿದ್ದು ಆ ಕಾಲುವೆಯನ್ನು ಮುಚ್ಚಿ ನಿವೇಶನಗಳನ್ನು ಹಂಚಿರುವುದರಿಂದ ಅಮಾಯಕರು ಮೋಸ ಹೋಗಿರುವುದು ಖಚಿತವಾಗಿದೆ. ನಗರದ ರಿಯಲ್ ಎಸ್ಟೇಟ್ ಉದ್ಯಮಿ ಗೌತಮ್ ಬಡಾವಣೆ ನಿರ್ಮಿಸಿ ಈ ನಿವೇಶನಗಳನ್ನು ಹಂಚಿದ್ದು ಅವರ ಮೇಲೆ ಮೊಕದ್ದಮೆ ದಾಖಲಿಸುವುದಾಗಿ ಮೋಸ ಹೋಗಿರುವ ನಿವಾಸಿಗಳು ತಿಳಿಸಿದರು.

ಬದಲಿ ಮಾರ್ಗ, ಸಂಧಾನ ವಿಫಲ

ನಿವಾಸಿಗಳು ಮತ್ತು ಕೆಲವು ಮುಖಂಡರು ಬಡಾವಣೆಯಲ್ಲಿ ಚರ್ಚಿಸಿ ನಂತರ ತಹಶಿಲ್ದಾರ್ ಮತ್ತು ಮುಖ್ಯಮಂತ್ರಿಗಳ ವಿಶೇಷಾಧಿಕಾರಿಯನ್ನು ಭೇಟಿ ಮಾಡಿ ಪರ್ಯಾಯ ಮಾರ್ಗದ ಬಗ್ಗೆ ಚರ್ಚಿಸಲಾಗಿ ಅಲ್ಲಿಯೂ ಸಹ ಇದೇ ಉತ್ತರವನ್ನು ನೀಡಿರುವುದಾಗಿ ತಿಳಿದು ಬಂತು. ಮನೆ ಮತ್ತು ನಿವೇಶನ ಹೊರತುಪಡಿಸಿ ಖಾಲಿ ಇರುವ ಜಾಗದಲ್ಲಿ ಕಾಲುವೆ ನಿರ್ಮಿಸಲು ಮಾಡಿದ ಮನವಿಗೆ ಇದು ಸಾಧ್ಯವಾಗದ ಮಾತು, ಇನ್ನು ನೂರು ವರ್ಷವಾದರು ತೆರವುಗೊಳಿಸಲೇ ಬೇಕು, ರಾಜಕಾಲುವೆಯನ್ನು ಬದಲಿ ಮಾರ್ಗದಲ್ಲಿ ನಿರ್ಮಿಸಲಾಗುವುದಿಲ್ಲ. ನಾಳೆಯಿಂದ ಖಾಲಿ ಇರುವ ಕಡೆ ಕಾಲುವೆ ಮಾಡುತ್ತೇವೆ, ಮುಂದೆ ನೀವೆ ತೆರವುಗೊಳಿಸಿಕೊಡಬೇಕೆಂದು ಸೂಚಿಸಿದರು.

ಮನವಿಗೆ ಮಾರ್ಗೋಪಾಯ

ಬಡಾವಣೆ ನಿರ್ಮಿಸಲು ಅನುಮತಿ ನೀಡಿದ ಅಂದಿನ ಅಧಿಕಾರಿಗಳೇ ಹೊಣೆ ಎಂದು ದೂರಿದ ಅಲ್ಲಿನ ನಿವಾಸಿಗಳ ಉತ್ತರಿಸಿದ ದಂಡಾಧಿಕಾರಿ ತಪ್ಪು ಯಾರೇ ಮಾಡಿದರೂ ತಪ್ಪೇ ಅವರಿಗೆ ಕಾನೂನುರೀತ್ಯಾ ನೋಟಿಸ್ ಜಾರಿ ಮಾಡಿ ಉತ್ತರ ಪಡೆಯಲಾಗುವುದು, ಹಾಗೂ ಬಡಾವಣೆ ನಿರ್ಮಾತೃ ವಿರುದ್ಧ ನೀವುಗಳು ಮೊಕದ್ದಮೆ ಹೂಡಿದರೆ ಪರಿಹಾರ ದೊರಕಬಹುದು ಎಂದು ಸಲಹೆ ನೀಡಿದರು.

ಶೆಟ್ಟಿಹಳ್ಳಿ ಕೆರೆಯೂ ಸರ್ವೇ ಆಗಿದೆ

ಕೆರೆ, ಕಟ್ಟೆ, ಅರಣ್ಯ ಮತ್ತು ನದಿ ದಂಡೆಯನ್ನು ಯಾರೂ ಸಹ ಒತ್ತುವರಿ ಮಾಡಬಾರದು, ಮಾಡಿದರೆ ಅದು ಅಪರಾಧವಾಗುತ್ತದೆ, ನಗರದ ಶೆಟ್ಟಿಹಳ್ಳಿ ಕೆರೆಯನ್ನು ಕಳೆದ ವಾರ ಅಳತೆ ಮಾಡಿಸಿದ್ದೇನೆ, ಅಕ್ರಮವಾಗಿ ಒತ್ತುವರಿ ಮಾಡಿರುವವರಿಗೆ ನೋಟೀಸ್ ಕೊಡಲು ಕ್ರಮಕೈಗೊಳ್ಳಲಾಗಿದೆ, ತಾಲ್ಲೂಕಿನಾದ್ಯಂತ ಇರುವ ಸರ್ಕಾರಿ ಭೂಮಿಯನ್ನು ಯಾರೇ ಒತ್ತುವರಿ ಮಾಡಿದರು ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಎಚ್ಚರಿಸಿದರು.

ನಮ್ಮ ವರದಿಗೆ ದಕ್ಕಿದ ನ್ಯಾಯ

(ನಗರದ ಶೆಟ್ಟಿಹಳ್ಳಿ ಒತ್ತುವರಿ ಮತ್ತು ಕಸದ ಸಮಸ್ಯೆಗೆ)

ಬಯಲುಸೀಮೆ ಮತ್ತು sanmitra.co.in

ಪತ್ರಿಕೆಯಲ್ಲಿ ವರದಿ ಮಾಡಿದ್ದಲ್ಲದೆ ಹಲವು ಬಾರಿ ತಹಶಿಲ್ದಾರರಿಗೆ ಖುದ್ದಾಗಿ ವಿವರಣೆ ನೀಡಿ ಮನವಿ ಮಾಡಲಾಗಿತ್ತು, ಸ್ಪಂದಿಸಿದ ಅಧಿಕಾರಿ ಯೋಗಾನಂದರವರು ಸರ್ವೇ ಮಾಡಿಸಿ ಒತ್ತುವರಿ ತೆರವುಗೊಳಿಸಲು ಮುಂದಾಗಿರುವುದಕ್ಕೆ ಪತ್ರಿಕೆಯು ಅಭಿನಂದಿಸುತ್ತದೆ.)

ತಹಶಿಲ್ದಾರರ ವೀಕ್ಷಣೆಯ ಸಂದರ್ಭದಲ್ಲಿ ನಗರಸಭೆ ಸದಸ್ಯ ಜೆಸಿಬಿ ಲೋಕೇಶ್, ಜೆಡಿಎಸ್ ತಾಲ್ಲೂಕು ಅಧ್ಯಕ್ಷ ಜಯಮುತ್ತು, ಎ ಜಿ ಸ್ವಾಮಿ, ಮಂಜು, ರಾಮಕೃಷ್ಣ, ರಾಕೇಶ್, ಅಭಿ, ಮಹೇಶ್, ಯೋಗೇಶ್ ಸೇರಿದಂತೆ ಬಡಾವಣೆಯ ನಿವಾಸಿಗಳು‌ ಹಾಜರಿದ್ದರು.

ಗೋ ರಾ ಶ್ರೀನಿವಾಸ...

ಮೊ:9845856139.