ಚನ್ನಪಟ್ಟಣದಲ್ಲಿ ನ್ಯಾಯಾಲಯ ಆರಂಭಗೊಂಡು ನಲವತ್ತು ವರ್ಷಗಳು ಸಂದಿವೆ, ಚನ್ನಪಟ್ಟಣದಲ್ಲಿ ವಿ ವೆಂಕಟಪ್ಪನವರ ಆದಿಯಾಗಿ, ಡಿ ಟಿ ರಾಮು, ವರದೇಗೌಡ, ಸಾದತ್ ಅಲಿಖಾನ್, ಯೋಗೇಶ್ವರ್ ಅಶ್ವಥ್ ಸೇರಿದಂತೆ ಅನೇಕ ಶಾಸಕರು, ಮಂತ್ರಿಗಳು ಆಗಿಹೋಗಿದ್ದರೂ ಸಹ ತಾಲ್ಲೂಕಿನಲ್ಲಿ ಒಂದು ನ್ಯಾಯಾಲಯದ ಸ್ವಂತ ಕಟ್ಟಡ ನಿರ್ಮಿಸಲು ನಲವತ್ತು ವಸಂತಗಳನ್ನು ತೆಗೆದುಕೊಂಡಿದ್ದು ನಾಚಿಕೆಗೇಡಿನ ಸಂಗತಿಯಾಗಿದ್ದರು ಇಂದಾದರು ಕಟ್ಟಡ ನಿರ್ಮಾಣವಾಗಿದೆಯಲ್ಲ ಎಂಬುದೇ ಖುಷಿಯ ವಿಚಾರ.

ಮೂವತ್ತು ವರ್ಷ ಗೀತಾ, ಹತ್ತು ವರ್ಷ ಫರಾ ಬಿಲ್ಡಿಂಗ್

೧೯೭೮ ರಂದು ನಗರದ ಹೃದಯ ಭಾಗವಾದ ಬೆಂಗಳೂರು ಮೈಸೂರು ಹೆದ್ದಾರಿಯ ಈಗಿನ ಎಸ್ ಬಿ ಐ ಬ್ಯಾಂಕ್ ಪಕ್ಕದಲ್ಲಿರುವ ಮಾಜಿ ಶಾಸಕ ಎಂ ವರದೇಗೌಡರ *ಗೀತಾ ಬಿಲ್ಡಿಂಗ್* ನಲ್ಲಿ ಆರಂಭವಾದ ನ್ಯಾಯಾಲಯವೂ ಮೂವತ್ತು ದಶಕಗಳ ಕಾಲ ಕಾರ್ಯನಿರ್ವಹಿಸಿ ಸ್ಥಳವಕಾಶದ ಕೊರತೆಯಿಂದ ರೈಲ್ವೆ ನಿಲ್ದಾಣ ರಸ್ತೆಯ *ಫರಾ ಬಿಲ್ಡಿಂಗ್* ಗೆ ಸ್ಥಳಾಂತರಗೊಂಡಿತು.

ಇಲ್ಲಿಯೂ ಹತ್ತು ವರ್ಷಗಳ ಕಾಲ ಕಾರ್ಯನಿರ್ವಹಿಸಿದ ನ್ಯಾಯಾಲಯವೂ ನಾಳೆ ಅಂದರೆ ೦೨/೦೨/೨೦೧೯ ರಂದು ಬೆಂಗಳೂರು ಮೈಸೂರು ಹೆದ್ದಾರಿಯ ಪಕ್ಕದಲ್ಲಿ ನೂತನವಾಗಿ ನಿರ್ಮಿಸಿದ ಹೊಸ ಕಟ್ಟಡ ಉದ್ಘಾಟನೆಯಾದ ಎರಡು ದಿನದ ತರುವಾಯ ಅಂದರೆ ೦೪/೦೨/೨೦೧೯ ರ ಸೋಮವಾರದಿಂದ ಕಾರ್ಯಾರಂಭ ಮಾಡಲಿದೆ.

ವಕೀಲರ ಸಂಘದಿಂದ ಮನವಿ

ವಕೀಲರ ಸಂಘದಿಂದಲೂ ಸಹ ಸಭೆ ನಡೆಸಿ ಈ ಮೇಲಿನ ಹೇಳಿಕೆಯನ್ನು ಅಧಿಕೃತವಾಗಿ ಘೋಷಿಸಿದರು, ಕಾರ್ಯನಿಮಿತ್ತ ಗೈರುಹಾಜರಾಗಿದ್ದ ವಕೀಲರ ಸಂಘದ ಅಧ್ಯಕ್ಷ ಕೆ ಟಿ ತಿಮ್ಮೇಗೌಡರ ಉಪಸ್ಥಿತಿಯಲ್ಲಿ ಉಪಾಧ್ಯಕ್ಷ ಎಂ ಕೆ ನಿಂಗಪ್ಪ, ಹರೀಶ್, ಹೇಮಂತ್, ಸುನಿಲ್ ರಾಜೇ ಅರಸು ಮತ್ತು ಸತೀಶ್ ರವರು ಹಾಜರಿದ್ದು ಸಾರ್ವಜನಿಕರು ಯಾವುದೇ ಊಹಾಪೋಹಗಳಿಗೆ ಕಿವಿಗೊಡದೆ ಕಾರ್ಯಕ್ರಮದಲ್ಲಿ ಭಾಗವಹಿಸಬೇಕೆಂದು ಮನವಿ ಮಾಡಿದರು.

ನೂತನ ನ್ಯಾಯಾಲಯ ಕಟ್ಟಡದ ಜಾಗ ವಿವಾದದಲ್ಲಿ

ಆರು ಎಕರೆ ಹತ್ತು ಗುಂಟೆ ಜಾಗದಲ್ಲಿ ನ್ಯಾಯಾಲಯದ ಕಟ್ಟಡ ನಿರ್ಮಾಣ ಆಗಿದ್ದು, ಅಷ್ಟು ಜಾಗದ ಬದಲು ಮುಸ್ಲಿಂ ಸಮುದಾಯದವರಿಗೆ ಅಷ್ಟೇ ಜಾಗ ಮತ್ತು ಅಭಿವೃದ್ಧಿಗೆಂದು ಹಣವನ್ನು ಸಹ ಕೊಟ್ಟಿದ್ದಾರೆಂದು ಹಿಂದೂಪರ ಸಂಘಟನೆಯ ಪದಾಧಿಕಾರಿಗಳು ಹೇಳಿದರೆ, ವಕ್ಪ್ ಮಂಡಳಿಯವರು ನಮಗೆ ಮೋಸ ಮಾಡಿದ್ದಾರೆ, ಅವರು ಸದ್ಯ ನಾಲ್ಕು ಎಕರೆ ಮಾತ್ರ ಮಾರಾಟ ಮಾಡಿದ್ದು ಮಿಕ್ಕ ಎರಡು ಎಕರೆ ಹತ್ತು ಗುಂಟೆ ಜಮೀನು ನಮಗೆ ಸೇರಿದ್ದು ನಾವು ಕಾಂಪೌಂಡ್ ನಿರ್ಮಿಸುತ್ತೇವೆ ಎಂದು ಮುಸ್ಲಿಂ ಸಮುದಾಯದ ಪದಾಧಿಕಾರಿಗಳು ತಿಳಿಸುತ್ತಾರೆ, ಇವರಿಬ್ಬರ ಹೊರತಾಗಿ ಮಂಗಳವಾರಪೇಟೆಯ ಗ್ರಾಮಸ್ಥರು ಅನಾದಿಕಾಲದಿಂದಲೂ ನಾವು ಸಂಕ್ರಾಂತಿ ಹಬ್ಬವನ್ನು ಇಲ್ಲಿ ಆಚರಿಸುತ್ತಿದ್ದು ಈ ಜಾಗ ನಮಗೆ ಮೀಸಲು ಎಂದು ಪ್ರತಿಪಾದಿಸುತ್ತಿದ್ದಾರೆ.

ಅಧಿಕಾರಿಗಳು ಮತ್ತು ಮುಖಂಡರು ಚರ್ಚಿಸಿ ಬಗೆಹರಿಸಿ

ಅಧಿಕಾರಿಗಳು ಮತ್ತು ಸಾಮಾಜಿಕ ಹೊಣೆಗಾರಿಕೆಯ ಮುಖಂಡರು ಚರ್ಚಿಸಿ ಶಾಶ್ವತವಾಗಿ, ಶೀಘ್ರವಾಗಿ ಸಮಸ್ಯೆಯನ್ನು ಬಗೆಹರಿಸಿಕೊಂಡರೆ ಒಳ್ಳೆಯದು, ನಮ್ಮ ತಾಲ್ಲೂಕು ಕೆಟ್ಟದ್ದಕ್ಕಾಗಿ ಇತಿಹಾಸ ನಿರ್ಮಿಸುವುದು ಬೇಡ, ತೊಂಭತ್ತರ ದಶಕದ ಕಪ್ಪು ಚುಕ್ಕೆಯನ್ನೇ ಇನ್ನೂ ಅಳಿಸಲಾಗಿಲ್ಲ, ನಾವೆಲ್ಲರೂ ಒಂದು ಎಂಬ ಮನೋಭಾವ ಮೂಡಿಸಲು ಇದು ಸಕಾಲವಾಗಿದೆ.

ಗೋ ರಾ ಶ್ರೀನಿವಾಸ...

ಮೊ:9845856139.