ಅನುಮೋದನೆಗೊಂಡ ಎರಡೇ ದಿನಕ್ಕೆ ಸಂಪೂರ್ಣ ಪಾವತಿ

ಜಿಲ್ಲಾ ಪಂಚಾಯತ್ ತುಂಡು ಗುತ್ತಿಗೆಯಲ್ಲಿ ಎರಡು ತಂಗುದಾಣಗಳಿಗೆ ತಲಾ ಎರಡು ಲಕ್ಷ ರೂಪಾಯಿಗಳ ತುಂಡು ಗುತ್ತಿಗೆ ಪಡೆದು ಕಾಮಗಾರಿ ಮಾಡದೇ ಅನುಮೋದನೆಗೊಂಡ ಎರಡೇ ದಿನಕ್ಕೆ ಹಣ ಪಾವತಿ ಮಾಡಿಕೊಂಡು ನಾಲ್ಕು ಲಕ್ಷ ರೂಪಾಯಿಗಳನ್ನು ನುಂಗಿ ನೀರು ಕುಡಿದಿರುವುದು ಸಾಬೀತಾಗಿದೆ.

ಹರಿಸಂದ್ರ ಮತ್ತು ನೀಲಸಂದ್ರ ತಂಗುದಾಣ

ಸಾತನೂರು ರಸ್ತೆಯ ಹರಿಸಂದ್ರ ಗೇಟ್ ತಂಗುದಾಣ ಮತ್ತು ನೀಲಸಂದ್ರ ಗೇಟ್ ತಂಗುದಾಣಗಳನ್ನು  ಅಭಿವೃದ್ಧಿ ಪಡಿಸಲೋಸುಗ ಜಿಲ್ಲಾ ಪಂಚಾಯತ್ ಅನುದಾನದಲ್ಲಿ ೨೦೧೭/೧೮ ನೇ ಸಾಲಿನಲ್ಲಿ ತುಂಡು ಗುತ್ತಿಗೆ ಪಡೆದಿದ್ದು ಶೇಕಡಾ ೯೫ ಕ್ಕೂ ಹೆಚ್ಚು ಭಾಗ ಕೆಲಸ ಮಾಡದೆ ಬಿಲ್ ಪಡೆದಿರುವುದು ಗುತ್ತಿಗೆದಾರ ಮತ್ತು ಇಂಜಿನಿಯರ್ ಗಳ ಸೇವಾ ಕರ್ತವ್ಯವನ್ನು ತೋರಿಸುತ್ತದೆ.

ಎರಡು ತಂಗುದಾಣಗಳ ಅಷ್ಟೂ ಕೆಲಸ ಎರಡೇ ದಿನದಲ್ಲಿ!?

ತುಂಡು ಗುತ್ತಿಗೆಯ ಸಂಖ್ಯೆ ೯೦೩/೧೭/೧೮ ರ ಅನ್ವಯ ಎಂ ಎಸ್ ಕಿರಣಕುಮಾರ್ ಎಂಬುವವರು ಗುತ್ತಿಗೆ ಪಡೆದಿದ್ದು, ಇದರ ಉಸ್ತುವಾರಿ ಇಂಜಿನಿಯರ್ ಆಗಿ ಶಂಕರ್ ಎಂಬುವವರು ಕೆಲಸ ನಿರ್ವಹಿಸಿದ್ದಾರೆ. ೨೦/೦೩/೨೦೧೮ ರಂದು ಅನುಮೋದನೆ ಪಡೆದರೆ ೨೨/೦೩/೨೦೧೮ ರಂದು ಅಂದರೇ ಕೇವಲ ಎರಡೇ ದಿನಗಳಲ್ಲಿ ಸಂಪೂರ್ಣ ಹಣ ಪಡೆದಿರುವುದರ ಹಿಂದೆ ಯಾರ ಕೈವಾಡವಿದೆ ಎಂಬುದನ್ನು ಪತ್ತೆ ಹಚ್ಚಿ ತಪ್ಪಿತಸ್ಥ ಅಧಿಕಾರಿಗಳು ಮತ್ತು ಗುತ್ತಿಗೆದಾರರಿಗೆ ಕಾನೂನು ಚುರುಕು ಮುಟ್ಟಿಸಬೇಕಾಗಿದೆ.

ಅಳತೆಯಲ್ಲೂ ಮೋಸ

ಹರಿಸಂದ್ರ ಬಸ್ ತಂಗುದಾಣ ಇರುವ ವಾಸ್ತವ ಅಳತೆ ೭.೫*೩.೪ ಆದರೆ ಬಿಲ್ ನಲ್ಲಿ ತೋರಿಸಿರುವುದು ೮*೪.೧ ಮೀಟರ್.

ನೀಲಸಂದ್ರ ತಂಗುದಾಣ ಅಳತೆ ೭.೬*೩*೫ ಇದ್ದರೆ ಬಿಲ್ ನಲ್ಲಿ ೮*೪.೧ ಮೀಟರ್ ಎರಡಕ್ಕೂ ಪಡೆದಿರುವ ಒಟ್ಟು ಹಣ ೧,೯೭,೮೨೮*೨=೩,೯೫,೬೫೬ ರೂಪಾಯಿಗಳು.

ಮೇಲ್ನೋಟಕ್ಕೆ ಕಂಡುಬರುವ ಪೂರ್ಣ ವೆಚ್ಚ ನಾಲ್ಕಂಕಿಯನ್ನು ದಾಟುವುದಿಲ್ಲ.

ಕಾಮಗಾರಿ ವಿವರ

ಈ ಎರಡು ತಂಗುದಾಣಗಳಿಗೂ ಪಿಸಿಸಿ, ಕಾಂಕ್ರೀಟ್, ವಿಟ್ರಿಫೈಡ್ ಟೈಲ್ಸ್ ಮತ್ತು ಸ್ಕರ್ಟಿಂಗ್ ಮಾಡಲು ಹಣ ಬಿಡುಗಡೆ ಮಾಡಿಸಿಕೊಂಡಿದ್ದು ಮಾಸಿದ ಬಣ್ಣ ಹೊರತುಪಡಿಸಿದರೆ ಮತ್ಯಾವ ಕಾಮಗಾರಿಯ ಕುರುಹು ಇಲ್ಲಿ ಕಾಣಸಿಗುವುದಿಲ್ಲ. ಜೊತೆಗೆ ನಮೂದಿಸಿರುವಂತೆ ಯಾವ ಕಾಮಗಾರಿಯೂ ನಡೆದಿಲ್ಲ.

ಎಸಿಬಿ ಗೆ ದೂರು

ಸಾಮಾಜಿಕ ಕಾರ್ಯಕರ್ತ ವಂದಾರಗುಪ್ಪೆ ಗ್ರಾಮದ ವಿ ಜಿ ಕೃಷ್ಣೇಗೌಡ ಎಂಬುವವರು ೨೧/೦೧/೨೦೧೯ ರಂದೇ ಜಿಲ್ಲಾ ಪಂಚಾಯತ ಕಾರ್ಯನಿರ್ವಹಣಾಧಿಕಾರಿ, ಮಾನ್ಯ ಜಿಲ್ಲಾಧಿಕಾರಿ ಹಾಗೂ ಪಂಚಾಯತ್ ರಾಜ್ ಇಂಜಿನಿಯರಿಂಗ್ ವಿಭಾಗದ ಕಾರ್ಯಪಾಲಕ ಅಭಿಯಂತರರಿಗೆ ದಾಖಲೆ ಸಮೇತ ಲಿಖಿತ ದೂರು ನೀಡಿದ್ದರು ಸಹ ಯಾವುದೇ ಕ್ರಮ ಕೈಗೊಳ್ಳದಿರುವುದು ಅನುಮಾನಕ್ಕೆಡೆ ಮಾಡಿದೆ.

ಈ ಎಲ್ಲಾ ದಾಖಲೆಗಳ ಸಮೇತ ಎಸಿಬಿ ಗೆ ದೂರು ನೀಡಲಾಗುವುದೆಂದು ನಮ್ಮ ಪತ್ರಿಕೆಗೆ ತಿಳಿಸಿದರು.

ಲಂಚದ ಆಮಿಷ

ಹೇಗೋ ಮಾಹಿತಿ ಪಡೆದ ಇಂಜಿನಿಯರ್ ಮತ್ತು ಗುತ್ತಿಗೆದಾರರು ಪೋನ್ ಮೂಲಕ ಸಂಪರ್ಕಿಸಿ ಮೂರು ದಿನಗಳಲ್ಲಿ ಕೆಲಸ ಮುಗಿಸುತ್ತೇವೆ ಎಂದು ಅವಕಾಶ ಕೋರಿದ್ದರು, ನನಗೂ ಸಹ ಸಂಪೂರ್ಣ ಮಾಹಿತಿ ಬೇಕಾದ್ದರಿಂದ ಕಲೆ ಹಾಕಲು ಸಮಯ ಸಿಕ್ಕಿತ್ತು, ಇದರ ನಡುವೆ ಇಂಜಿನಿಯರ್ ಮತ್ತು ಮತ್ತೊಬ್ಬರು ಬಂದು ಹಣದ ಆಮಿಷವೊಡ್ಡಿದ್ದರು,  ಕಟುವಾಗಿ ತಿರಸ್ಕರಿಸಿ ಸುದ್ದಿಗೆ ಮಹತ್ವ ನೀಡಿದೆ.

ಬಗೆದಷ್ಟೂ ಸಿಗುವ ದಂಧೆಗಳು

ಸಂಬಂಧಿಸಿದ ಅಧಿಕಾರಿಗಳು ಮೀನಮೇಷ ಎಣಿಸದೆ ತನಿಖೆಗೆಒಳಪಡಿಸಿದರೆ ಇನ್ಮಷ್ಟು ಪ್ರಕರಣಗಳು ದೊರೆಯುವುದಲ್ಲಿ ಕಿಂಚಿತ್ತೂ ಅನುಮಾನವಿಲ್ಲ. ಅಧಿಕಾರಿಗಳು ಗುತ್ತಿಗೆದಾರನ ಆಮಿಷ ಮತ್ತು ರಾಜಕಾರಣಿಗಳ ಗುಲಾಮರಾಗದೆ ಇಂತಹ ವಿಷಜಂತುಗಳಿಗೆ ಕಾನೂನು ಚುರುಕು ಮುಟ್ಟಿಸ ಬೇಕಾಗಿದೆ.

ಗೋ ರಾ ಶ್ರೀನಿವಾಸ...

ಮೊ:9845856139.