ಪ್ರತಿಭಟನೆ, ಸತ್ಯಾಗ್ರಹ ಮತ್ತು ಧಿಕ್ಕಾರಗಳಿಗೆ ವೇದಿಕೆಯಾಗುತ್ತಿದ್ದ ತಾಲ್ಲೂಕು ಕಛೇರಿಯಲ್ಲಿ ಇಂದು ಅಭಿನಂದನೆಗಳ ಸುರಿಮಳೆ

ನಲವತ್ಮೂರು ವರ್ಷಗಳ ಗೇಣಿ ಹೋರಾಟ ಮತ್ತು ಮೂವತ್ತೆಂಟು ವರ್ಷಗಳ ಸಾಗುವಳಿ‌ ಹೋರಾಟ ನೆನೆಗುದಿಗೆ ಬಿದ್ದಿದ್ದು ಕೇವಲ ಆರು ತಿಂಗಳ ಹಿಂದೆ ತಾಲ್ಲೂಕಿಗೆ ನೇಮಕವಾದ ತಹಶಿಲ್ದಾರ್ ಯೋಗಾನಂದರವರು ಆಗಮಿಸಿದ ನಂತರ ಜಿಲ್ಲಾಧಿಕಾರಿಗಳಾದ ಕ್ಯಾಪ್ಟನ್ ಡಾ ರಾಜೇಂದ್ರ ರವರ ಆದೇಶದ ಮೇರೆಗೆ ಕೇವಲ ಎರಡು ತಿಂಗಳ ಅವಧಿಯಲ್ಲಿ ಕೆಲವು ಅಧಿಕಾರಿಗಳ ತಂಡ ಕೆಲಸ ಮಾಡಿ ರೈತರಿಗೆ ಸಾಗುವಳಿ ಚೀಟಿ ನೀಡಿದ ಹಿನ್ನೆಲೆಯಲ್ಲಿ ತಹಶಿಲ್ದಾರ್ ಯೋಗಾನಂದ ಮತ್ತು ಇನ್ನಿತರೆ ಅಧಿಕಾರಿಗಳಿಗೆ ರೈತ ಮುಖಂಡ ಸಿ ಪುಟ್ಟಸ್ವಾಮಿ ಮುಂದಾಳತ್ವದಲ್ಲಿ ಗೌರವಿಸಿ ಸನ್ಮಾನಿಸಲಾಯಿತು.

ಸನ್ಮಾನ ಸ್ವೀಕರಿಸಿ ಮಾತನಾಡಿದ ದಂಡಾಧಿಕಾರಿ ಯೋಗಾನಂದರವರು ನಾನು ನನ್ನ ಕರ್ತವ್ಯ ಮಾಡಿದ್ದೇನೆ, ಬಹುತೇಕ ರೈತರ ಕಛೇರಿಯಾದ ತಾಲ್ಲೂಕು ಕಛೇರಿಯಲ್ಲಿ ರೈತರ ಕೆಲಸ ಮಾಡಬೇಕಾದ ಕರ್ತವ್ಯ ಅಧಿಕಾರಿಗಳದ್ದು, ಒಂದು ಬಾರಿ ಬಂದು ಮನವಿ ಕೊಟ್ಟರೇ ಮತ್ತೊಂದು ಬಾರಿ ತಾಲ್ಲೂಕು ಕಛೇರಿಗೆ ಅವರು ಬರದಂತೆ ಕೆಲಸ‌ಮಾಡಿಕೊಡಬೇಕಾದ್ದು ನಮ್ಮ ಜವಾಬ್ದಾರಿ ಎಂದರು.

ಈ ಹಿಂದೆಯೂ ಸಹ ಕನಕಪುರ ತಾಲೂಕಿನಲ್ಲಿ ಕೆಲಸ ನಿರ್ವಹಿಸಿದ ಸಂದರ್ಭದಲ್ಲಿ ಕಾಡಿನಲ್ಲಿ ವಾಸಿಸುತಿದ್ದ ೯೫೦ ಮಂದಿಗೆ ಇನ್ನಿತರ ಬಡ ಕುಟುಂಬದ ೨,೦೫೦ ಮಂದಿ ಸೇರಿದಂತೆ ೩,೦೦೦ ಮಂದಿಗೆ ಸಾಗುವಳಿ ಜಮೀನನ್ನು ಮಾಡಿಕೊಟ್ಟಿರುವುದು ನನ್ನ ವೃತ್ತಿ ಜೀವನದಲ್ಲಿ ಅತ್ಯಂತ ಖುಷಿಯ ವಿಷಯವಾಗಿದೆ, ಇದೇ ರೀತಿ ಯಾವುದೇ ತಾಲ್ಲೂಕಿನಲ್ಲಿ ಕೆಲಸ ನಿರ್ವಹಿಸದರೂ ಸಹ ರೈತರ ಕೆಲಸ ಕ್ಕೆ ಮೊದಲ ಆದ್ಯತೆ ನೀಡುವುದಾಗಿ ತಿಳಿಸಿದರು.

ಅಧ್ಯಕ್ಷತೆ ವಹಿಸಿ ಮಾತನಾಡಿದ ಹಿರಿಯ ರೈತ ಮುಖಂಡ ಸಿ ಪುಟ್ಟಸ್ವಾಮಿ ಯವರು ರೈತರ ನ್ಯಾಯಯುತ ಕೆಲಸವನ್ನು ಸೀಮಿತ ಅವಧಿಯಲ್ಲಿ ಮಾಡಿಕೊಟ್ಟರೆ ರೈತರೇ ತಮ್ಮ ಬಳಿ ಬಂದು ಸನ್ಮಾಸುತ್ತಾರೆ ಎಂಬುದಕ್ಕೆ ಈ ಸಮಾರಂಭ ಒಂದು ಉದಾಹರಣೆ, ನಲವತ್ತೆರಡು ವರ್ಷಗಳ ಹೋರಾಟದ ಫಲವಾಗಿ ಜಿಲ್ಲಾಧಿಕಾರಿಗಳ ಆದೇಶದ ಮೇರೆಗೆ ತಹಶಿಲ್ದಾರ್ ಮತ್ತು ತಂಡವು ಕೆಲವೇ ತಿಂಗಳುಗಳಲ್ಲಿ ಕೆಲಸ ನಿರ್ವಹಿಸಿದ್ದು ನಿಜಕ್ಕೂ ಶ್ಲಾಘನೀಯ, ಇಂದು ತಾಲ್ಲೂಕು ಆಡಳಿತ ಮಾಡಿರುವ ಕೆಲಸ ಜಿಲ್ಲಾ ಆಡಳಿತ ಮತ್ತು ಸರ್ಕಾರಕ್ಕೂ ಗೌರವ ತರುತ್ತದೆ ಎಂದು ಬಣ್ಣಿಸಿದರು.

ಸನ್ಮಾನಿತ ಅಧಿಕಾರಿಗಳು ಮಾತನಾಡಿ ಇದು ನಮ್ಮೆಲ್ಲರ ಕರ್ತವ್ಯವಾಗಿದ್ದರೂ ಇಷ್ಟು ವರ್ಷ ತಡವಾಗಿದ್ದಕ್ಕೆ ಬೇಸರವಾಗಿದೆ, ಇಂದು ನೀವು ಕೊಡುತ್ತಿರುವ ಗೌರವ ಸನ್ಮಾನಗಳು ನಮ್ಮ ಜವಾಬ್ದಾರಿಯನ್ನು ಹೆಚ್ಚಿಸಿವೆ, ಮುಂದೆಯೂ ಸಹ ಹೆಚ್ಚಿನ ಪ್ರಮಾಣದಲ್ಲಿ ಕೆಲಸ ಮಾಡುತ್ತೇವೆ ಎಂದು ತಿಳಿಸಿದರು.

ಇದೇ ವೇಳೆ ತಹಶಿಲ್ದಾರ್ ಯೋಗಾನಂದ, ಉಪ ತಹಶಿಲ್ದಾರ್ ಮಧುಕುಮಾರ್, ಶಿರಸ್ತೇದಾರ ಮಹದೇವಯ್ಯ, ಆಹಾರ ನಿರೀಕ್ಷಕ ಮಲ್ಲಿಕಾರ್ಜುನ, ಕಂದಾಯ ನಿರೀಕ್ಷಕ ಮೋಹನ್, ಸರ್ವೇಯರ್ ನಾಗರಾಜು, ದರ್ಖಾಸ್ತು ವಿಭಾಗದ ಹರೀಶ್, ಗ್ರಾಮ ಲೆಕ್ಕಿಗ ರಘು ರವರನ್ನು ಅರಳಾಳುಸಂದ್ರ ಮತ್ತು ಗೊಲ್ಲರದೊಡ್ಡಿ ಯ ಸಾಗುವಳಿವಗೇಣಿ ರೈತರು ಸನ್ಮಾನಿಸಿದರು.

ಈ ಸಂದರ್ಭದಲ್ಲಿ ವಿ ಎಂ ನಾಗರಾಜು, ಚಂದ್ರೇಗೌಡ, ವೆಂಕಟೇಶ್, ಕೆಂಚೇಗೌಡ, ಶಿವಲಿಂಗಯ್ಯ, ಶಿವಮ್ಮ ಹಾಗೂ ಅನೇಕ ರೈತರು ಭಾಗವಹಿಸಿದ್ದರು.

ಗೋ ರಾ ಶ್ರೀನಿವಾಸ...

ಮೊ:9845856139.