ಅಜ್ಞಾನದಿಂದ ಸು ಜ್ಞಾನ ದೆಡೆಗೆ ಸಾಗುವುದೇ ಶಿವರಾತ್ರಿ ಹಬ್ಬ, ಈ ಹಬ್ಬದ ದಿನದಂದು ಶಿವನ ಪ್ರತಿರೂಪದ ಎಲ್ಲಾ ದೇವಾಲಯಗಳಲ್ಲದೇ ಅನೇಕ ಬೇರೆಬೇರೆಯ ದೇವಾಲಯಗಳಲ್ಲೂ ಸಹ ವಿಶೇಷ ಪೂಜೆ ನಡೆಯುತ್ತದೆ, ಬೆಳಿಗ್ಗೆ ಬ್ರಾಹ್ಮಿ ಮುಹೂರ್ತದಲ್ಲಿ ಆರಂಭಗೊಳ್ಳುವ ಪೂಜೆ ರಾತ್ರಿ ಪೂರಾ ಜಾಗರಣೆ ಮಾಡುವ ಭಕ್ತಾಧಿಗಳಿಗೆ ದೇವರ ಹಾಡು, ತತ್ವ ಪದ, ಜಾನಪದ ಗೀತೆಗಳು ಮತ್ತು ಭಜನೆಗಳ ರಸದೌತಣದೊಟ್ಟಿಗೆ ಮಾರನೆಯ ದಿನ ಮಂಗಳಾರತಿ ಮಾಡುವುದರೊಂದಿಗೆ ಮುಕ್ತಾಯಗೊಳ್ಳುತ್ತದೆ.

ನಗರದ ಮಳೂರು ಗ್ರಾಮದ ತೋಟವೊಂದರಲ್ಲಿ ಪ್ರತಿಷ್ಠಾಪನೆಗೊಂಡಿರುವ ಜಲಕಂಠೇಶ್ವರ ಹೆಸರಿನ ಲಿಂಗ ವೂ ಬಹಳ ವಿಶೇಷ ವಾದದ್ದು, ಈ ಲಿಂಗಕ್ಕೆ ಯಾವುದೇ ದೇವಸ್ಥಾನವಾಗಲಿ, ಕೊನೇಪಕ್ಷ ಮೇಲ್ಛಾವಣಿಯಾಗಲಿ ಇಲ್ಲ, ಮುಕ್ತವಾಗಿರುವ ಈ ಲಿಂಗಕ್ಕೆ ಭಕ್ತಾಧಿಗಳು ಪೂಜೆ ಸಲ್ಲಿಸಿ ಪುನೀತರಾದರು.

ಪಕ್ಕದಲ್ಲಿಯೇ ಇರುವ ಶ್ರೀ ಅರ್ಕೇಶ್ವರ ದೇವಾಲಯವೂ ಪುರಾತನ ಕಾಲದ ದೇವಸ್ಥಾನ ವಾಗಿದ್ದು ಭಕ್ತರು ದರ್ಶನಗೈದು ಪ್ರಸಾದ ಸ್ವೀಕರಿಸಿದರು.

ಕೋಟೆಯಲ್ಲಿ ಪ್ರತಿಷ್ಠಾಪನೆಗೊಂಡಿರುವ ಶ್ರೀ ಕಾಶಿ ವಿಶ್ವೇಶ್ವರ ದೇವಾಲಯವೂ ಸಹ ಪುರಾತನ ಇತಿಹಾಸ ಹೊಂದಿದ್ದು ಶ್ರೀ ಸ್ವಾಮಿಯ ವಿಗ್ರಹವನ್ನು ಕಾಶಿಯಿಂದಲೇ ತಂದು ಪ್ರತಿಷಪನೆ ಮಾಡಿರುವುದು ವಿಶೇಷ, ನಂಬಿ ಬಂದವರ ಕೈ ಬಿಡದ ಕಾಶಿ ವಿಶ್ವೇಶ್ವರ ಸ್ವಾಮಿ ಗೆ ಬೆಳಿಗ್ಗೆಯಿಂದ ರಾತ್ರಿವರೆಗೂ ಸಹಸ್ರಾರು ಭಕ್ತರು ಸಾಲಿನಲ್ಲಿ ನಿಂತು ದರ್ಶಿಸಿ ಪ್ರಸಾದ ಸ್ವೀಕರಿಸಿದರು.

ಮಹಾತ್ಮ ಗಾಂಧಿ ರಸ್ತೆಯ ಡೂಂ ಲೈಟ್ ಸರ್ಕಲ್ ನಲ್ಲಿರುವ ನೀಲಕಂಠೇಶ್ವರ ಸ್ವಾಮಿ ಕಣ್ವ ಕ್ಷೇತ್ರ ಎಂದೇ ಪ್ರಸಿದ್ಧ, ಈ ಸನ್ನಿಧಾನಕ್ಕೆ ಐದುಸಾವಿರ ವರ್ಷಗಳ ಇತಿಹಾಸ ಹಾಗೂ ದೇವಾಲಯದ ಕಟ್ಟಡಕ್ಕೆ ೧,೩೦೦ ವರ್ಷಗಳ ಇತಿಹಾಸವಿದೆ, ಈ ದೇವಸ್ಥಾನಕ್ಕೆ ಕಣ್ವ ಮಹರ್ಷಿಗಳು ನಿತ್ಯಾರಾಧನೆಗೆ ಬರುತ್ತಿದ್ದರು ಎಂಬ ಪ್ರತೀತಿ ಇದೆ ಎಂದು ಅರ್ಚಕ ರವೀಂದ್ರ ದೀಕ್ಷಿತ್ ಹೇಳುತ್ತಾರೆ, ಈ ದೇವಾಲಯಕ್ಕೂ ಸಹ ಭಕ್ತಾಧಿಗಳು ಸರತಿ ಸಾಲಿನಲ್ಲಿ ನಿಂತು ದರ್ಶನ ಮಾಡಿದರು.

ನಗರದ ಹೃದಯ ಭಾಗದಲ್ಲಿರುವ ಕೊಲ್ಲಾಪುರದಮ್ಮನ ದೇವಾಲಯದಲ್ಲಿ ಅನೇಕ ರೀತಿಯ ದೇವರ ವಿಗ್ರಹಗಳನ್ನು ತಾತ್ಕಾಲಿಕವಾಗಿ ಪ್ರತಿಷ್ಠಾಪಿಸಿದರು, ನಗರದ ಹೊರವಲಯದಲ್ಲಿನ ಮಹದೇಶ್ವರ ದೇವಸ್ಥಾನದಲ್ಲಿ ತಾತ್ಕಾಲಿಕವಾಗಿ ನಿರ್ಮಿಸಿಕೊಂಡಿರುವ ಜಾಗದಲ್ಲೇ ಮೂರ್ತಿಗೆ ಅಲಂಕರಿಸಿ ಪೂಜಿಸಿದರು, ಭಕ್ತಾದಿಗಳು ಪ್ರಸಾದ ಹಂಚುವ ಮೂಲಕ ತಮ್ಮ ಭಕ್ತಿ ಮೆರೆದರು.

ಶಿವಪ್ಪನ ಮಠ ಮತ್ತು ಕೂಡ್ಲೂರು ಗ್ರಾಮದ ಮಂಗಳೇಶ್ವರ ದೇವಸ್ಥಾನದಲ್ಲಿ ವಿಜೃಂಭಣೆಯಿಂದ ಪೂಜಿಸಿ ಭಕ್ತರು ಕೃತಾರ್ಥರಾದರು.

ಗೋ ರಾ ಶ್ರೀನಿವಾಸ...

ಮೊ:9845856139.