ವಿಧಾನಸಭೆ ಯಲ್ಲಿ ಶೇಕಡಾ ೮೫ ರಿಂದ ೯೦ ರಷ್ಟು ಮತದಾನವಾದರೆ ಲೋಕಸಭಾ ಚುನಾವಣೆಯಲ್ಲಿ ಶೇಕಡಾ ೫೨ ರಿಂದ ೬೦ ಕ್ಕೆ ಕುಸಿಯುತ್ತಿದೆ, ಪ್ರಜ್ಞಾವಂತ ಮತದಾರರು ತಪ್ಪದೇ ಮತ ಚಲಾಯಿಸುವ ಮೂಲಕ ಹಾಗೂ ನಿರಾಸಕ್ತಿ ಹೊಂದಿದ ಮತದಾರರನ್ನು ತಿಳಿ ಹೇಳಿ ಮನವೊಲಿಸುವ ಮೂಲಕ ಹೆಚ್ಚು ಮಂದಿ ಮತದಾನ ಮಾಡುವಂತೆ ಉತ್ಸಾಹಿ ಯುವಕರು ಮತ್ತು ವಿದ್ಯಾರ್ಥಿಗಳು ಪ್ರೇರೇಪಿಸಬೇಕು ಎಂದು ತಾಲ್ಲೂಕು ಪಂಚಾಯತ್ ಕಾರ್ಯನಿರ್ವಹಣಾಧಿಕಾರಿ ರಾಮಕೃಷ್ಣ ತಿಳಿಸಿದರು.

ಅವರು ನಗರದ ಪ್ರಥಮ ದರ್ಜೆ ಕಾಲೇಜಿನ ವಿದ್ಯಾರ್ಥಿಗಳಿಗೆ ಮತದಾನ ಕುರಿತು ಜಾಗೃತಿ ಮೂಡಿಸುವಲ್ಲಿ ವಿದ್ಯಾರ್ಥಿಗಳ ಪಾತ್ರ ದೊಡ್ಡದು ಎಂಬುದರ ಕುರಿತು ಮಾತನಾಡಿದರು.

ಎಷ್ಟೋ ಅಭ್ಯರ್ಥಿಗಳು ಒಂದು ಮತಗಳ ಮೂಲಕ ಗೆದ್ದರೆ ಅದೇ ಅಂತರದಿಂದ ಕೆಲವರು ಸೋತಿದ್ದಾರೆ, ಈ ಅಂತರ ಹೆಚ್ಚಾಗಬೇಕೆಂದರೆ ಮತದಾನವೂ ಸಹ ಶೇಕಡವಾರು ಹೆಚ್ಚಾಗಬೇಕು ಎಂದರು.

ಕ್ಷೇತ್ರ ಶಿಕ್ಷಣಾಧಿಕಾರಿ ಆರ್ ಎಸ್ ಸೀತಾರಾಮು ರವರು ಭಾರತದ ಪ್ರಜೆಗಳಾದ ನಾವು ಪ್ರಜಾಪ್ರಭುತ್ವ ಉಳಿಸಲೋಸುಗ ಯಾವುದೇ ಆಮಿಷಕ್ಕೆ ಒಳಗಾಗದೇ, ನಿರಾಸಕ್ತಿ ತೋರದೆ, ವಂಚಿತ ಮತದಾರರನ್ನು ಮತದಾನ ಮಾಡಿಸುವ ಮೂಲಕ ಮತದಾನದಲ್ಲಿ ಪಾಲ್ಗೊಳ್ಳುತ್ತೇವೆ ಎಂಬ ಪ್ರತಿಜ್ಞಾವಿಧಿ ಬೋಧಿಸಿದರು.

ಸಹಾಯಕ ಚುನಾವಣಾಧಿಕಾರಿ ಡಾ ಯತೀಶ್ ಉಲ್ಲಾಳ ಕಾಲ್ನಡಿಗೆ ಜಾಥಾ ಕ್ಕೆ ಚಾಲನೆ ನೀಡಿ ಮಾತನಾಡುತ್ತಾ ದೇಶದ ೫೪೩ ರಾಜ್ಯದ ೨೮ ಲೋಕಸಭಾ ಕ್ಷೇತ್ರಕ್ಕೆ ಚುನಾವಣೆ ನಡೆಯಲಿದ್ದು ಈ ಕ್ಷೇತ್ರದಲ್ಲಿ ೨,೦೦೦ ಕ್ಕೂ ಹೆಚ್ಚು ಹೊಸ ಮತದಾರರಿದ್ದು ತಾವುಗಳೆಲ್ಲರೂ ಉತ್ಸಾಹದಿಂದ ಪಾಲ್ಗೊಂಡು ಮತ ಚಲಾಯಿಸಬೇಕೆಂದು ಕರೆ ನೀಡಿದರು.

ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನ ನೂರಕ್ಕೂ ಹೆಚ್ಚು ಮಕ್ಕಳು, ಕಾಲೇಜಿನ ಪ್ರಾಂಶುಪಾಲ ಡಾ ವೆಂಕಟೇಶ್, ಪ್ರಾಚಾರ್ಯ ಡಾ ಮಧುಸೂದನಚಾರ್ಯಜೋಷಿ, ಪಶು ಇಲಾಖೆಯ ಸಹಾಯಕ ಡಾ ಜಯರಾಮು, ಶಿಕ್ಷಕ ವಸಂತಕುಮಾರ, ನಗರಸಭೆಯ ರಜತ್ ಸೇರಿದಂತೆ ಅನೇಕರು ಕಾಲ್ನಡಿಗೆ ಜಾಥಾದಲ್ಲಿ ಪಾಲ್ಗೊಂಡು ಮತದಾನದ ಬಗ್ಗೆ ಜಾಗೃತಿ ಮೂಡಿಸಲಾಯಿತು. ಕಾಲ್ನಡಿಗೆ ಜಾಥಾ ಕಾಲೇಜು ಆವರಣದಿಂದ ಹೆದ್ದಾರಿ, ಹೊಸ ನ್ಯಾಯಾಲಯ, ಕೋಟೆಯ ವರದರಾಜ ಸ್ವಾಮಿ ದೇವಾಲಯ, ಜೆಸಿ ರಸ್ತೆ ಮೂಲಕ ಕಾಲೇಜು ಆವರಣ ತಲುಪಿತು.

ಗೋ ರಾ ಶ್ರೀನಿವಾಸ...

ಮೊ:9845856139.