ಹೆಣ್ಣೊಂದು ಕಲಿತರೆ ಶಾಲೆಯೊಂದು ತೆರೆದಂತೆ ಎಂಬ ನಾಣ್ಣುಡಿಯಂತೆ ಹೆಣ್ಣು ಸುಸಂಸ್ಕೃತಳಾದರೆ ತನ್ನ ಮನೆ ಅಲ್ಲದೆ ಇಡೀ ಪ್ರಪಂಚವೇ ಸುಸಂಸ್ಕೃತ ಜಗತ್ತು ಆಗುತ್ತದೆ, ಎಂದು ಆದಿಚುಂಚನಗಿರಿ ಮಹಾಸಂಸ್ಥಾನ ದ ಪೀಠಾಧ್ಯಕ್ಷರಾದ ಪರಮಪೂಜ್ಯ ಜಗದ್ಗುರು ಡಾ ನಿರ್ಮಲಾನಂದನಾಥ ಸ್ವಾಮೀಜಿ ಗಳು ತಮ್ಮ ಆಶೀರ್ವಚನದಲ್ಲಿ ತಿಳಿಸಿದರು.

ಅವರು ರಾಮನಗರ ಅರ್ಚಕರಹಳ್ಳಿ ಯಲ್ಲಿರುವ ಆದಿಚುಂಚನಗಿರಿ ಶಾಖಾ ಮಠದಲ್ಲಿ ಆಯೋಜಿಸಿದ್ದ ೨೨ ನೇ ರಾಜ್ಯ ಮಟ್ಟದ ಮಹಿಳಾ ಜನ ಜಾಗೃತಿ ತರಬೇತಿ ಶಿಬಿರವನ್ನು ಉದ್ಘಾಟಿಸಿ ಆಶೀರ್ವಚನ ನೀಡಿದರು.

ಶಾಲೆಗಳಲ್ಲಿ ಪಠ್ಯ ಪುಸ್ತಕದ ವಿಷಯಗಳನ್ನು ಕಲಿಸಲಾಗುತ್ತದೆ, ಗಣಿತದ ಸೂತ್ರಗಳನ್ನು, ವಿಜ್ಞಾನದ ಆವಿಷ್ಕಾರ ಗಳನ್ನು, ಇತಿಹಾಸದ ಪರಂಪರೆಯನ್ನು ಕಲಿಸಿ, ತಾವುಗಳು ಪರೀಕ್ಷೆಯಲ್ಲಿ ಉತ್ತೀರ್ಣರಾಗಿ ಉದ್ಯೋಗ ಮಾಡಲು ಕಲಿಸಿಕೊಡಲಾಗುತ್ತದೆ.

ಇಂತಹ ಶಿಬಿರಗಳಲ್ಲಿ ಬದುಕನ್ನು ರೂಪಿಸುವ, ಜಗತ್ತನ್ನು ಅರ್ಥೈಸಿಕೊಳ್ಳುವ ಸುಸಂಸ್ಕೃತ ಪಾಠಗಳನ್ನು ಅನುಭವಿ ಹಿರಿಯರಿಂದ, ಪೂಜ್ಯರಿಂದ, ಶಿಕ್ಷಕರಿಂದ ಕಲಿಸಿಕೊಡಲಾಗುತ್ತದೆ, 

ನಿಮ್ಮ ಭವಿಷ್ಯದ ಬದುಕು ಸಫಲಗೊಳ್ಳಲು ಸಹಕಾರಿಯಾಗುತ್ತದೆ.

ಜಗತ್ತಿನ ಸಮಸ್ಯೆಗಳು ಹೊರಗಿನಿಂದ ಬರುವುದಿಲ್ಲ, ಅವು ನಮ್ಮೊಳಗೆ ಇರುತ್ತವೆ, ಸುಖದಲ್ಲಿ ಬೆಳೆದ ಮಕ್ಕಳು ನೆರಳಿನಲ್ಲಿ ಬೆಳೆದ ಸಸಿಗಳಂತೆ, ಅವುಗಳು ಬಿಸಿನಲ್ಲಿ ಇಟ್ಟಾಗ ಬೇಗನೆ ಸೊರಗುತ್ತವೆ, ಅದೇ ಬಿಸಿಲಿನಲ್ಲಿ ಬೆಳೆದ ಸಸಿಗಳು ಹೊಂದಿಕೊಳ್ಳುತ್ತವೆ, ಹಾಗೆಯೇ ಕಷ್ಟದಲ್ಲಿ ಬೆಳೆದ ಮಕ್ಕಳು ಎಲ್ಲಾ ವರ್ಗಕ್ಕೂ ಹೊಂದಿಕೊಳ್ಳುತ್ತಾರೆ, ಈ ಶಿಬಿರವೂ ಸಹ ನಿಮ್ಮ ಬೌದ್ಧಿಕ ಮಟ್ಟವನ್ನು ಹೆಚ್ಚಿಸುತ್ತದೆ ಎಂದರು.

ಬೆಂಗಳೂರಿನ ವಿಜಯನಗರ ಶಾಖಾ ಮಠದ ಸೌಮ್ಯನಾಥ ಸ್ವಾಮೀಜಿ ಮಾತನಾಡಿ ಹೆಣ್ಣು ಮಕ್ಕಳ ಶಿಬಿರಗಳು ಮುಂದಿನ ಭವಿಷ್ಯ ರೂಪಿಸುವ ಕೇಂದ್ರಗಳಿದ್ದಂತೆ, ಇಲ್ಲಿ ಮುಂದಿನ ಶೈಕ್ಷಣಿಕ, ಉದ್ಯೋಗ, ಶಿಸ್ತು ಸಂಯಮಗಳನ್ನು ಕಲಿಸಿಕೊಡುತ್ತದೆ, ಈ ಶಿಬಿರದಲ್ಲಿ ನಡೆಯುವ ಎಲ್ಲಾ ಉಪನ್ಯಾಸಗಳನ್ನು ತಮ್ಮ ಬದುಕಿನಲ್ಲಿ ಅಳವಡಿಸಿಕೊಳ್ಳಬೇಕೆಂದು ಶಿಬಿರಾರ್ಥಿಗಳಿಗೆ ಕರೆ ನೀಡಿದರು.

ಗಣ್ಯರನ್ನು ಸ್ವಾಗತಿಸಿ ಪ್ರಾಸ್ತಾವಿಕ ನುಡಿಗಳನ್ನಾಡಿದ ರಾಮನಗರ ಶಾಖಾ ಮಠದ ಕಾರ್ಯದರ್ಶಿ ಅನ್ನದಾನೇಶ್ವರನಾಥ ಸ್ವಾಮೀಜಿ ಯವರು ಕಳೆದ ಇಪ್ಪತ್ತೆರಡು ವರ್ಷಗಳಿಂದ ಶಿಬಿರವನ್ನು ಆಯೋಜಿಸಲಾಗುತ್ತಿದೆ, ಗಂಡು ಮಕ್ಕಳಿಗೆ ಆದಿಚುಂಚನಗಿರಿ ಯಲ್ಲಿ, ಹೆಣ್ಣು ಮಕ್ಕಳಿಗೆ ರಾಮನಗರ ಶಾಖಾ ಮಠದಲ್ಲಿ ಆಯೋಜಿಸಲಾಗುತ್ತಿದೆ, ಮುಂದಿನ ದಿನಗಳಲ್ಲಿ ಹೆಚ್ಚೆಚ್ಚು ಮಹಿಳೆಯರು ಮತ್ತು ಹೆಣ್ಣು ಮಕ್ಕಳು ಈ ಶಿಬಿರದಲ್ಲಿ ಪಾಲ್ಗೊಂಡು ನೀವು ಶಿಬಿರದಲ್ಲಿ ಕಲಿತ ಎಲ್ಲಾ ಒಳ್ಳೆಯದನ್ನು ಬೇರೆಯವರಿಗೂ ತಿಳಿಸಿ ಹೇಳಬೇಕೆಂದು ಮಕ್ಕಳಿಗೆ ತಿಳಿ ಹೇಳಿದರು.

ಕಾರ್ಯಕ್ರಮದಲ್ಲಿ ಹಾಸನ ಶಾಖಾ ಮಠದ ಶಂಭುನಾಥ ಸ್ವಾಮೀಜಿ, ಚಿಕ್ಕಬಳ್ಳಾಪುರ ದ ಮಂಗಳನಾಥ ಸ್ವಾಮೀಜಿ, ಶಿಬಿರದ ಮುಖ್ಯ ಶಿಕ್ಷಕ ನರಸಿಂಹಯ್ಯ ಮತ್ತು ಆದಿಚುಂಚನಗಿರಿ ಶಿಕ್ಷಣ ಸಂಸ್ಥೆಯ ಡಾ ಎ ಟಿ ಶಿವರಾಮೇಗೌಡ ಭಾಗವಹಿಸಿದ್ದರು.

ರಾಜ್ಯದ ಅನೇಕ ಜಿಲ್ಲೆಯ ಎಂಟು ನೂರಕ್ಕೂ ಹೆಚ್ಚು ಶಾಲಾ ಮಕ್ಕಳು, ಶಿಕ್ಷಕಿಯರು, ಮಹಿಳೆಯರು ಮತ್ತು ಬಿಜಿಎಸ್ ವಲ್ಡ್೯ ಸ್ಕೂಲ್ಸ್ ಸಿಬ್ಬಂದಿಗಳು ಭಾಗವಹಿಸಿದ್ದರು.

ಗೋ ರಾ ಶ್ರೀನಿವಾಸ...

ಮೊ:9845856139.