ನಮ್ಮ ದೇಶದ ಸಂವಿಧಾನದಲ್ಲಿ ಸಮಾನತೆಯ ದೃಷ್ಟಿಯಿಂದ ಪುರುಷರಿಗೆ ಏನೇನು ಅಧಿಕಾರ ಇದೆಯೋ ಅಷ್ಟೇ ಅಧಿಕಾರ ಪ್ರತಿ ಹೆಣ್ಣಿಗೂ ಇದೆ, ಕಾನೂನಿನ ಜ್ಞಾನವನ್ನು ಈಗಿನಿಂದಲೇ ಅಳವಡಿಸಿಕೊಂಡರೆ ಭವಿಷ್ಯದ ಬದುಕಿನಲ್ಲಿ ಬರುವ ಎಡರುತೊಡರುಗಳನ್ನು ನಿವಾರಿಸಿಕೊಳ್ಳಬಹುದು ಎಂದು ರಾಮನಗರ ದ ಹಿರಿಯ ಸಿವಿಲ್ ನ್ಯಾಯಾಧೀಶರಾದ ಶ್ರೀಮತಿ ಅನಿತಾ ರವರು ಮಕ್ಕಳಿಗೆ ತಿಳಿಸಿಕೊಟ್ಟರು.

ಅವರು ಆದಿಚುಂಚನಗಿರಿ ಮಹಾಸಂಸ್ಥಾನ ಅರ್ಚಕರಹಳ್ಳಿ ಶಾಖಾ ಮಠದಲ್ಲಿ ಹಮ್ಮಿಕೊಂಡಿದ್ದ ೨೨ ನೇ ಮಹಿಳಾ ಜನ ಜಾಗೃತಿ ತರಬೇತಿ ಶಿಬಿರದಲ್ಲಿ ಶಿಬಿರಾರ್ಥಿಗಳಿಗೆ ಕಾನೂನು ಅರಿವಿನ ಬಗ್ಗೆ ಜಾಗೃತಿ ಮೂಡಿಸಿದರು.

ಇಂದು ತಂದೆಯ ಆಸ್ತಿಯಲ್ಲಿ ಹೆಣ್ಣುಮಕ್ಕಳಿಗೂ ಸಮಾನ ಹಕ್ಕಿದೆ, ಮೊದಲು ಕೀರ್ತಿಗೊಬ್ಬ ಮಗ, ಆರತಿಗೊಬ್ಬಳು ಮಗಳು ಎಂದಿದ್ದ ಸರ್ಕಾರದ ಘೋಷಣೆಯನ್ನು ಇಂದು ಆಸ್ತಿಗೊಬ್ಬ ಮಗ, ಆಶ್ರಯಕ್ಕೊಬ್ಬ ಮಗಳು ಎಂದು ಮಾರ್ಪಡಿಸುವ ಕಾಲ ಒದಗಿ ಬಂದಿದೆ ಎಂದು ಮಾರ್ಮಿಕವಾಗಿ ನುಡಿದರು.

ಇಂದಿನ ಕಾಲಘಟ್ಟದಲ್ಲಿ ಬಹುತೇಕ ಎಲ್ಲಾ ಮಕ್ಕಳು ದ್ವಿಚಕ್ರ ವಾಹನ ಚಲಾಯಿಸುತ್ತಾರೆ, ಆದರೆ ಯಾರೂ ಸಹ ಪರವಾನಗಿ ಪಡೆದಿರುವುದಿಲ್ಲ, ಕಾರಣ ಅವರ ವಯಸ್ಸು ಹದಿನೆಂಟು ದಾಟದಿರುವುದರಿಂದ ಅವರಿಗೆ ಪರವಾನಗಿ ನೀಡುವುದಿಲ್ಲ, ಆದ್ದರಿಂದ ಯಾವ ಮಕ್ಕಳು ಸಹ ಯಾವುದೇ ಮೋಟಾರು ವಾಹನಗಳನ್ನು ಚಲಾಯಿಸಬಾರದು, ಹಾಗೊಂದು ವೇಳೆ ಚಲಾಯಿಸಿ ಅಪಘಾತವಾದರೆ ಅದರ ಸಂಪೂರ್ಣ ಹೊರೆಯನ್ನು ಪೋಷಕರು ಹೊರಬೇಕೆಂಬ ಕಾನೂನು ಬಂದಿದೆ ಎಂದು ಮಕ್ಕಳು ಮತ್ತು ಪೋಷಕರಿಗೆ ಎಚ್ಚರಿಕೆ ನೀಡಿದರು.

ನಮ್ಮ ದೇಶಗಳಲ್ಲಿ ಮಗು ಹುಟ್ಟಿದ ನಂತರ ಗಳಿಗೆ, ಗಂಟೆ, ಜಾತಕ ನೋಡಿ ಹೆಸರಿಡುತ್ತಾರೆ, ಆದರೆ ವಿದೇಶಗಳಲ್ಲಿ ಮಗು ಹುಟ್ಟುವ ಮೊದಲೆ ಇಂತಹ ಹೆಸರಿಡಬೇಕೆಂದು ಸಂಕಲ್ಪ ಮಾಡಿಕೊಂಡು ಅದೇ ಹೆಸರಿಡುತ್ತಾರೆ, ಈ ರೀತಿಯ ಮೌಢ್ಯಗಳು ತೊಲಗಬೇಕೆಂದರೆ ನಿಮಗೆ ಸಂವಿಧಾನದ ಅರಿವು ಇರಬೇಕು.

ಪೋಷಕರಾದವರು ಮಗು ಹುಟ್ಟಿದಾಗ ಜನನ ಪ್ರಮಾಣ ಪತ್ರ ಮತ್ತು ಮರಣಾನಂತರ ಮರಣ ಪ್ರಮಾಣ ಪತ್ರವನ್ನು ಸಂಬಂಧಿಸಿದ ಕಛೇರಿಗಳಲ್ಲಿ ತಪ್ಪದೇ ಮಾಡಿಸಿಟ್ಟುಕೊಳ್ಳಬೇಕು, ಅದು ಮುಂದಿನ ಎಲ್ಲಾ ವ್ಯವಹಾರಗಳಿಗೂ ಅನುಕೂಲವಾಗಲಿದೆ,  ಮಕ್ಕಳು ಓದಿನ ಬಗ್ಗೆ ಎಷ್ಟು ಗಮನ ಕೊಡುತ್ತೀರೋ ಅಷ್ಟೇ ಗಮನವನ್ನು ಪರಿಸರ ಕಾಳಜಿಯಲ್ಲೂ ಹೊಂದಬೇಕು, ಇಂದು ಮನುಷ್ಯನ ದುರಾಸೆಯಿಂದ ಕೆರೆ, ಕಟ್ಟೆ, ನದಿ ಮತ್ತು ಗೋಮಾಳಗಳು ಕಣ್ಮರೆಯಾಗುತ್ತಿವೆ ಎಂದು ಮಕ್ಕಳಿಗೆ ಮನದಟ್ಟು ಮಾಡಿಕೊಟ್ಟು ಅವರ ಜೊತೆ ಸಂವಾದ ನಡೆಸಿ ಶಿಬಿರಾರ್ಥಿಗಳ ಮನಗೆದ್ದರು.

ಸಾನಿಧ್ಯ ವಹಿಸಿ ಆಶೀರ್ವಚನ ನೀಡಿದ ಮಂಗಳೂರಿನ ಶಾಖಾ ಮಠದ ಸ್ವಾಮೀಜಿಗಳಾದ ಧರ್ಮಪಾಲನಾಥ ಸ್ವಾಮೀಜಿಗಳು ಮಹಾಭಾರತದ ಕರ್ಣನ ರಹಸ್ಯ ಜನ್ಮ ವೃತ್ತಾಂತವನ್ನು ಎಳೆಎಳೆಯಾಗಿ ಬಿಡಿಸಿ ಹೇಳುವ ಮೂಲಕ ಮಕ್ಕಳಿಗೆ ಜ್ಞಾನದ ಮಾರ್ಗದರ್ಶನ ನೀಡಿದರು.

ಎಂದಿನಂತೆ ಯೋಗ, ಭಜನೆ, ಇನ್ನಿತರ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿತ್ತು.

ವೇದಿಕೆಯಲ್ಲಿ ರಾಮನಗರ ಶಾಖಾ ಮಠದ ಕಾರ್ಯದರ್ಶಿಗಳಾದ ಶ್ರೀ ಅನ್ನದಾನೇಶ್ವರನಾಥ ಸ್ವಾಮೀಜಿ, ಬಿಜಿಎಸ್ ವಲ್ಡ್೯ ಶಾಲೆಯ ಪ್ರಾಂಶುಪಾಲೆ ಸತ್ಯಲಕ್ಷ್ಮಿ, ವಿಶೇಷ ಆಹ್ವಾನಿತರಾದ  ಪ್ರಜಾ ಟಿವಿ ಜಿಲ್ಲಾ ವರದಿಗಾರ ಅರ್ಕೇಶ್, ಪವರ್ ಟಿವಿ ಜಿಲ್ಲಾ ವರದಿಗಾರ ಪ್ರವೀಣ್ ಮತ್ತು ಪಾದರಹಳ್ಳಿ ರಾಜು ಉಪಸ್ಥಿತರಿದ್ದರು.

ಗೋ ರಾ ಶ್ರೀನಿವಾಸ...

ಮೊ:9845856139.