ಚನ್ನಪಟ್ಟಣ: ನಗರದ ಪಾರ್ವತಿ ಟಾಕೀಸ್ ಬಳಿ ಇರುವ ಬಾಲು ಆಸ್ಪತ್ರೆ ಯಲ್ಲಿ ವೈದ್ಯರ ನಿರ್ಲಕ್ಷ್ಯ ದಿಂದ ಹೆರಿಗೆ ಸಮಯದಲ್ಲಿ ತಾಯಿ ಮೃತ ಪಟ್ಟಿದ್ದಾರೆ ಎಂದು ಸಂಬಂಧಿಕರು, ಮಳೂರು ಪಟ್ಟಣ ಗ್ರಾಮ, ಬೇವೂರು ಗ್ರಾಮ, ದೇವರಹೊಸಹಳ್ಳಿ ಗ್ರಾಮ ಮತ್ತು ಸಾರ್ವಜನಿಕರಿಂದ ಆಸ್ಪತ್ರೆ ಮುಂದೆ ಧರಣಿ ನಡೆಸಿ ನ್ಯಾಯಕ್ಕಾಗಿ ಕಣ್ಣೀರಿಟ್ಟ ದೃಶ್ಯ ನೆರೆದವರ ಮನ ಕಲಕುವಂತಿತ್ತು.

ಕಳೆದ ವರ್ಷ ಮಳೂರು ಪಟ್ಟಣ ಗ್ರಾಮದ ಯುವತಿ ದೀಕ್ಷಿತಾ (೨೨) ಎಂಬುವರನ್ನು ಬೇವೂರು ಗ್ರಾಮದ ರಾಮಕೃಷ್ಣೇಗೌಡ ಎಂಬುವವರಿಗೆ ಮದುವೆ ಮಾಡಿಕೊಡಲಾಗಿತ್ತು, ಹಲವಾರು ತಿಂಗಳಿನಿಂದಲೂ ಇದೇ ಆಸ್ಪತ್ರೆ ಯಲ್ಲಿ ಪರೀಕ್ಷಿಸುತ್ತಿದ್ದು, ಹೆರಿಗೆ ಸಮಯಕ್ಕಾಗಿ ನಿನ್ನೆ ರಾತ್ರಿ ೦೫/೦೫/೧೯ ರ ಭಾನುವಾರ ಸಂಜೆ ಆಸ್ಪತ್ರೆ ಗೆ ದಾಖಲಿಸಿದ್ದು ತಡರಾತ್ರಿ ಹನ್ನೊಂದರ ಸಮಯದಲ್ಲಿ ಸಹಜ ಹೆರಿಗೆ ಆಗಿದೆ, ಈ ಸಂದರ್ಭದಲ್ಲಿ ಕೂಸು ನೋಡುವ ಮೊದಲೇ ತಾಯಿ ಮೃತ ಪಟ್ಟಿರುವುದು, ಹೆರಿಗೆಗೆ ಅಗತ್ಯ ಕ್ರಮ ಕೈಗೊಳ್ಳದಿರುವುದರಿಂದ ಬಾಣಂತಿ ಮೃತಳಾಗಿದ್ದಾರೆ ಎಂಬುದು ಸಂಬಂಧಿಕರ ಆಕ್ರೋಶಕ್ಕೆ ಕಾರಣವಾಗಿತ್ತು.

ಆಸ್ಪತ್ರೆ ಮೇಲೆ ಇದುವರೆಗೂ ಹಲವಾರು ದೂರು ದಾಖಲು, ಅಧಿಕಾರಿಗಳಿಂದ ನಿರ್ಲಕ್ಷ್ಯ

ಬಾಲು ಆಸ್ಪತ್ರೆಯಲ್ಲಿ ಭ್ರೂಣ ಪರೀಕ್ಷೆ ಸೇರಿದಂತೆ ಗರ್ಭಿಣಿಯರು ಮತ್ತು ನವಜಾತ ಶಿಶುಗಳು ವೈದ್ಯರ ನಿರ್ಲಕ್ಷ್ಯದಿಂದ ಸಾವನ್ನಪ್ಪಿದ್ದು ಜಿಲ್ಲಾಧಿಕಾರಿ ಮತ್ತು ಸಂಬಂಧಿಸಿದ ಇಲಾಖೆಗಳಲ್ಲಿ ದೂರು ದಾಖಲಾಗಿದ್ದು ಇನ್ನೂ ಬಗೆಹರಿದಿಲ್ಲ.

ಒಟ್ಟಾರೆ ದುಡ್ಡು ಕೊಟ್ಟು ಕೊಂಡುಕೊಳ್ಳಬಹುದು ಎಂಬ ನಿರ್ಧಾರ ತಳೆಯುವುದು, ವೈದ್ಯರೇ ಎರಡನೇ ದೇವರು ಎಂಬುದನ್ನು ಸುಳ್ಳಾಗಿಸುತ್ತಿರುವುದು ವೈದ್ಯಲೋಕಕ್ಕೆ ಅಪಮಾನ.

ಸಿಎಂ ಕ್ಷೇತ್ರದಲ್ಲಿ ಹೆರಿಗೆ ತಜ್ಞರಿಲ್ಲದ ಆಸ್ಪತ್ರೆಗಳು

ನಗರದಲ್ಲಿ ಇರುವ ಬಹುತೇಕ ಎಲ್ಲಾ ನರ್ಸಿಂಗ್ ಹೋಂಗಳಲ್ಲಿ ಹೆರಿಗೆ ಮಾಡಿಸುತ್ತಾರೆ, ಅದರಲ್ಲೂ ಸಿಜೇರಿಯನ್ ಗೆ ಒತ್ತು ಕೊಡುತ್ತಾರೆ, ಆದರೆ ಬಹುತೇಕ ಆಸ್ಪತ್ರೆಗಳಲ್ಲಿ ಹೆರಿಗೆ ತಜ್ಞರೇ ಇಲ್ಲದಿರುವುದು ವಿಪರ್ಯಾಸ, ಕೆಲವು ಹಿರಿಯ ವೈದ್ಯರು ಅನುಭವದ ಆಧಾರದ ಮೇಲೆ ಹೆರಿಗೆ ಮಾಡಿಸಿದರೆ ಕೆಲವೊಮ್ಮೆ ತೀರಾ ಅಗತ್ಯ ಇದ್ದರೆ ಹೊರಗಿನಿಂದ ತಜ್ಞರನ್ನು ಕರೆಸಿಕೊಳ್ಳುತ್ತಾರೆ.

ಹೆರಿಗೆ ತಜ್ಞರಿಲ್ಲದೆ ಹೆರಿಗೆ ಮಾಡಿಸುವ ಆಸ್ಪತ್ರೆ ಯ ಮಾಲೀಕರು, ಅದಕ್ಕೆ ಪರವಾನಗಿ ಕೊಟ್ಟ ಮಹನೀಯರು ಇಬ್ಬರೂ ಸಹ ಮುಖ್ಯಮಂತ್ರಿ ಕ್ಷೇತ್ರಕ್ಕೆ ನಿಧಾನ ವಿಷವಿದ್ದಂತೆ.

ಕುಂಡ ಮತ್ತು ಗಾಜು ಪುಡಿಪುಡಿ

ಈ ವೇಳೆ ಹೆರಿಗೆ ಸಮಯದಲ್ಲಿ ರಕ್ತವೂ ಸಹ ಆಸ್ಪತ್ರೆಯಲ್ಲಿ ಲಭ್ಯವಿರಲಿಲ್ಲ, ಅವರ ತಪ್ಪನ್ನು ಮುಚ್ಚಿಕೊಳ್ಳುವುದಕ್ಕೋಷ್ಕರ ಹೃದಯ ಘಾತ ಆಗಿದೆ ಎಂದು ಸಬೂಬು ಹೇಳಿ ರಾತ್ರಿ ಹೋದ ವೈದ್ಯರು ಇಷ್ಟು ಹೊತ್ತಾದರು ಬರದಿದ್ದರಿಂದ ಆಕ್ರೋಶಗೊಂಡ ಸಂಬಧಿಗಳು ಹೂವಿನ ಕುಂಡಗಳು, ಕಿಟಕಿಯ ಗಾಜುಗಳನ್ನು ಒಡೆದು ಕೋಪ ಹೊರಹಾಕಿದರು. ಪೋಲಿಸರನ್ನು ಧಿಕ್ಕರಿಸಿದ ಮಹಿಳೆಯರು ವೈದ್ಯೆ ಶೈಲಜಾ ಕೊಠಡಿಗೆ ನುಗ್ಗಲು ಪ್ರಯತ್ನ ಮಾಡಿದರು.

ಒಂದು ಕರೆಗೆ ಓಗೊಟ್ಟು ಬಂದ ನೂರಕ್ಕೂ ಹೆಚ್ಚು ಪೋಲಿಸರು

ಕೇವಲ ಒಂದು ಪೋನ್ ಮಾಡಿದ ಆಸ್ಪತ್ರೆ ಯ ಮಾಲಿಕನಿಗೆ ನೂರಕ್ಕೂ ಕ್ಕೂ ಹೆಚ್ಚು ಪೋಲಿಸ್ ಸಿಬ್ಬಂದಿ ಕಳುಹಿಸಿ ಭದ್ರತೆ ಒದಗಿಸಿ, ಇಷ್ಟು ಸಮಯವಾದರೂ ಕಾರಣಕರ್ತ ವೈದ್ಯರನ್ನು ಸ್ಥಳಕ್ಕೆ ಕರೆಸದೆ ಇರುವುದರಿಂದ ಪೋಲಿಸರ ವಿರುದ್ಧ ಸಾರ್ವಜನಿಕರು ತಿರುಗಿಬಿದ್ದರು, ಒಬ್ಬ ಇಸ್ಪೀಟು ಆಡುವವನನ್ನು, ಸಣ್ಣ ಕಳ್ಳತನ ಮಾಡಿದವನನ್ನು ಬೀದಿಯಲ್ಲಿ ನಿಲ್ಲಿಸಿ ಮಾನ ಹರಾಜು ಹಾಕುತ್ತೀರಿ ! ಇಲ್ಲಿ ಕೊಲೆ ಮಾಡಿದ ವೈದ್ಯರ ಪರ ನಿಂತಿದ್ದೀರಿ ಎಂದು ದೂಷಿಸಿದರು.

ಹೆರಿಗೆ ವೈದ್ಯೆಯೇ ಅಲ್ಲ, ಪರವಾನಗಿ ರದ್ದು ಮಾಡಿ

ಬಾಲು ಆಸ್ಪತ್ರೆ ಯ ವೈದ್ಯೆ ಶೈಲಜಾ ಸುಬ್ಬಯ್ಯ ಚೆಟ್ಟಿ ಯವರು ಎಂಬಿಬಿಎಸ್ ವೈದ್ಯರಾಗಿದ್ದು ಹೆರಿಗೆ (ಗೈನಾಕಾಲಜಿ) ವೈದ್ಯರಾಗಿಲ್ಲದಿದ್ದರೂ ಹೇಗೆ ಹೆರಿಗೆ ಮಾಡಿಸಿದರು, ಇದಕ್ಕೆ ಪರವಾನಗಿ ನೀಡಿದ ಅಧಿಕಾರಿಗಳನ್ನು ಅಮಾನತ್ತು ಮಾಡಬೇಕು, ಜಿಲ್ಲಾಧಿಕಾರಿ, ಜಿಲ್ಲಾ ವೈದ್ಯಾಧಿಕಾರಿಗಳು ಮತ್ತು ಸಾವಿಗೆ ಕಾರಣರಾದ ವೈದ್ಯರು ಸ್ಥಳಕ್ಕೆ ಬರಬೇಕೆಂದು ಪಟ್ಟು ಹಿಡಿದರು.

ರಾಜಿ ಸಂಧಾನಕ್ಕೆ ಮುಖಂಡರ ತೆರೆಮರೆ ಕಸರತ್ತು

ಹಲವಾರು ಮುಖಂಡರು ತೆರೆಮರೆಯಲ್ಲಿ ರಾಜಿ ಮಾಡುವ ಕೆಲಸದಲ್ಲಿ ತೊಡಗಿದ್ದದ್ದು ಹೆಂಗಸರ ಸಹನೆ ಕಟ್ಟೆಯೊಡಲು ಕಾರಣವಾಗಿತ್ತು, ನಮಗೆ ಹಣ ಮುಖ್ಯವಲ್ಲ, ಈ ರೀತಿಯ ತೊಂದರೆ ಯಾವ ಹೆಣ್ಣಿಗೂ ಮತ್ತೆ ಆಗುವುದು ಬೇಡ, ಆಸ್ಪತ್ರೆಗೆ ಬೀಗ ಜಡಿದು ಶಾಶ್ವತ ಪರಿಹಾರ ಕೊಡಿಸಬೇಕೆಂದು ಪಟ್ಟು ಹಿಡಿದರು.

ಹೆಣ್ಮಕ್ಳೇ ಸ್ಟ್ರಾಂಗೂ ಗುರೂ...

ತನ್ನ ಸಂಬಂಧಿಯ ಸಾವಿನ ಸುದ್ದಿ ತಿಳಿದ ಮಹಿಳೆಯರೇ ಆಸ್ಪತ್ರೆಯಲ್ಲಿ ಹೆಚ್ಚು ಗಲಾಟೆ ಮಾಡಿ ತಮ್ಮ ಕರುಳ ನೋವನ್ನು ತೋಡಿಕೊಳ್ಳುವುದರ ಜೊತೆಗೆ ವೈದ್ಯರು ಮತ್ತು ಪೋಲೀಸರ ಮೇಲೆ ಧಿಕ್ಕಾರ ಕೂಗಿದರು, ನಂತರ ನಗರ ಪೋಲಿಸ್ ಸ್ಟೇಷನ್ ಮುಂದೆ ಹೆದ್ದಾರಿ ತಡೆದ ದಿಟ್ಟೆಯರನ್ನು ತೆರವು ಗೊಳಿಸಲು ಪೋಲಿಸರು ಹರಸಾಹಸ ಪಡಬೇಕಾಯಿತು. ಆ ನೋವಿನಲ್ಲೂ ದಿಟ್ಟತನ ಮೆರೆದ ಮಹಿಳೆಯರಿಗೆ ಸಾರ್ವಜನಿಕರು ಪ್ರಶಂಸಿಸಿದರು.

ಕೊನೆಗೂ ರಾಜಿ ಸಂಧಾನ ಯಶಸ್ವಿ !?!

ಸ್ಥಳೀಯ ಮುಖಂಡರು ಮತ್ತು ಹೋರಾಟಗಾರರು ಎನಿಸಿಕೊಂಡವರು ತೆರೆಮರೆಯಲ್ಲಿ ರಾಜಿ ಸಂಧಾನ ಮಾಡುವಲ್ಲಿ ಯಶಸ್ವಿಯಾದರೆಂದು ಬಲ್ಲ ಮೂಲಗಳಿಂದ ತಿಳಿದು ಬಂದಿದೆ, ಒಟ್ಟಾರೆ ಮುಂದಿನ ಮತ್ತೊಂದು ಬಲಿಗಾಗಿ  ಅನುವು ಮಾಡಿಕೊಟ್ಟಂತಾಗಿದ್ದು ಸಾರ್ವಜನಿಕರ ದುರ್ದೈವ.

ಕಕಜವೇ ರಾಜ್ಯಾಧ್ಯಕ್ಷ ರಮೇಶ್ ಗೌಡ, ಜೆಡಿಎಸ್ ನಗರ ಘಟಕದ ಅಧ್ಯಕ್ಷ ರಾಂಪುರ ರಾಜಣ್ಣ, ಕೃಷ್ಣೇಗೌಡ, ಮಳೂರು ಪಟ್ಟಣ ರವಿ, ಬೇವೂರು ಯೋಗೇಶ್, ಲ್ಯಾಬ್ ಚಂದ್ರು ಹಾಗೂ ಪೋಲಿಸ್ ಅಧಿಕಾರಿಗಳಾದ ಡಿವೈಎಸ್ಪಿ ಮಲ್ಲೇಶ್, ನಗರ ಸರ್ಕಲ್ ಇನ್ಸ್‌ಪೆಕ್ಟರ್ ಸತೀಶ್, ಹೇಮಂತ್ ಕುಮಾರ್, ಶಿವಕುಮಾರ್ ಸೇರಿದಂತೆ ಅನೇಕ ಸಿಬ್ಬಂದಿ ಭಾಗವಹಿಸಿದ್ದರು.

ಗೋ ರಾ ಶ್ರೀನಿವಾಸ...

ಮೊ:9845856139.