ಚನ್ನಪಟ್ಟಣ: ರಾಮನಗರ ಮತ್ತು ಚನ್ನಪಟ್ಟಣ ನಗರಗಳೆರಡನ್ನು ಒಟ್ಟಿಗೆ ಸೇರಿಸಿ ಅವಳಿ ನಗರಗಳನ್ನಾಗಿ ಮಾಡಿ ಅಭಿವೃದ್ಧಿ ಮಾಡಲಾಗುವುದು, ಇನ್ನು ನಾಲ್ಕು ತಿಂಗಳ ಅವಧಿಯಲ್ಲಿ ಚನ್ನಪಟ್ಟಣ ದ ಚಿತ್ರಣವನ್ನೇ ಬದಲಾಯಿಸುತ್ತೇನೆ ಎಂದು ರಾಜ್ಯದ ಮುಖ್ಯಮಂತ್ರಿ ಹೆಚ್ ಡಿ ಕುಮಾರಸ್ವಾಮಿ ಹೇಳಿದರು.

ಎರಡು ದಿನಗಳ ಚನ್ನಪಟ್ಟಣ ಭೇಟಿಯ ಸಮಯದಲ್ಲಿ ಅಕ್ಕೂರು, ಕೋಡಂಬಳ್ಳಿ ಮತ್ತು ಹೊಂಗನೂರು ಜಿಲ್ಲಾ ಪಂಚಾಯತಿಯ ಹಲವು ಕಾಮಗಾರಿಗಳನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

೭೦೦ ಕೋಟಿ ವೆಚ್ಚದಲ್ಲಿ ರಾಜೀವ್ ಗಾಂಧಿ ಆಸ್ಪತ್ರೆ ಮತ್ತು ಕಾಲೇಜಿನ ಕಾಮಗಾರಿಯನ್ನು ಶೀಘ್ರವಾಗಿ ಆರಂಭಗೊಳಿಸುತ್ತೇವೆ, ಸ್ಥಳೀಯರಿಗೆ ಉದ್ಯೋಗವಕಾಶದ ಜೊತೆಗೆ ಎಲ್ಲಾ ಆರೋಗ್ಯ ಭಾಗ್ಯ ಕಲ್ಪಿಸುವುದಾಗಿ ಭರವಸೆ ನೀಡಿದರು.

೩೩೦ ಕೋಟಿ ರೂಪಾಯಿಗಳ ವೆಚ್ಚದಲ್ಲಿ ಸತ್ತೇಗಾಲದಿಂದ ಇಗ್ಗಲೂರು ದೇವೇಗೌಡ ಬ್ಯಾರೇಜ್ ಗೆ ನೀರು ತಂದು ಶೇಖರಿಸಿ, ೫೪೮ ಕೋಟಿ ವೆಚ್ಚದಲ್ಲಿ ಜಿಲ್ಲೆಯ ಎಲ್ಲಾ ಕೆರೆಗಳನ್ನು ಭರ್ತಿ ಮಾಡುತ್ತೇವೆ, ಎರಡನೇ ಹಂತದಲ್ಲಿ ವೈ ಜಿ ಗುಡ್ಡ, ಕಣ್ವ ಜಲಾಶಯ ಮತ್ತು ಮಂಚನಬೆಲೆ ಡ್ಯಾಂ ಗೆ ನೀರು ಹರಿಸಲು ಸೂಕ್ತ ಕ್ರಮ ಕೈಗೊಳ್ಳುತ್ತೇನೆ ಎಂದು ಭರವಸೆ ನೀಡಿದರು.

ಮುಖ್ಯಮಂತ್ರಿಗಳನ್ನು ಸ್ವಾಗತಿಸಲು ಸಜ್ಜಾಗಿದ್ದ ಪೋಲಿಸ್ ಪೆರೇಡ್ ಮತ್ತು ಸಾಂಸ್ಕೃತಿಕ ತಂಡಗಳು ನಾಲ್ಕು ಗಂಟೆಗಳ ಕಾಲ ತಡವಾಗಿದ್ದಕ್ಕೆ ಸುಸ್ತಾದಂತೆ ಕಂಡುಬಂದರೂ ಸಹ ನಂತರ ಹುಮ್ಮಸ್ಸಿನಿಂದ ಸಾಗಿದವು.

ಸಾವಂದಿಪುರದಲ್ಲಿ ನಿರ್ಮಾಣಗೊಂಡಿದ್ದ ಹೆಚ್ ಡಿ ದೇವೇಗೌಡರ ಕಂಚಿನ ಪುತ್ಥಳಿ ಅನಾವರಣಕ್ಕೆ ಬರಲು ಕನಗನಮರಡಿ ಬಸ್ ದುರಂತ ತಡೆಯಾಗಿದ್ದರಿಂದ ಇಂದು ವೀಕ್ಷಿಸಿ ಸಂತಸ ವ್ಯಕ್ತಪಡಿಸಿದರು, ಇದೇ ವೇಳೆ ಅಭಿಮಾನಿಗಳು ೧,೦೦೧ ತೆಂಗಿನಕಾಯಿಗಳನ್ನು ಹೀಡುಗಾಯಿ ಹೊಡೆಯುವುದರ ಮೂಲಕ ಅಭಿಮಾನ ಮೆರೆದರು.

ಜನಸಂಪರ್ಕ ಸಭೆಗಳಲ್ಲಿ ಮನವಿ ಸಲ್ಲಿಸಲು ನಾಮುಂದು ತಾಮುಂದು ಎಂದು ನೂಕುನುಗ್ಗಲು ಸಾಮಾನ್ಯವಾಗಿತ್ತು, ಜಿಲ್ಲಾಧಿಕಾರಿ ಕ್ಯಾಪ್ಟನ್ ಡಾ ರಾಜೇಂದ್ರ ಮತ್ತು ಜಿಲ್ಲಾ ಪಂಚಾಯತ್ ಕಾರ್ಯನಿರ್ವಹಣಾಧಿಕಾರಿ ಮುಲ್ಲೈಮುಹಿಲನ್ ಮುಖ್ಯಮಂತ್ರಿಗಳ ಎಡಬಲದಲ್ಲಿ ನಿಂತು ಸಾಧ್ಯವಾದಷ್ಟು ಸಮಸ್ಯೆಗಳನ್ನು ಪರಿಹರಿಸುವ ಮೂಲಕ ಜವಾಬ್ದಾರಿ ಮೆರೆದರು, ಕುಮಾರಸ್ವಾಮಿ ಯವರು ಅರ್ಜಿದಾರರನ್ನು ಕುರಿತು ಮನವಿ ನನಗೇ ಕೊಡಬೇಕೆಂದೇನಿಲ್ಲ, ಅಧಿಕಾರಿಗಳಿಗೆ ನೀಡಿ, ತಮ್ಮ ಅರ್ಜಿ ಇತ್ಯರ್ಥ ಆಗಿಲ್ಲ ಎಂದಾದರೆ ಕೃಷ್ಣಾ ದಲ್ಲಿ ಬಂದು ವಿಚಾರಿಸಿದರೆ ಅಧಿಕಾರಿಗಳು ಪರಿಹರಸಿಕೊಡುತ್ತಾರೆ ಎಂದರು.

ಅರವತ್ತು ವರ್ಷ ದಾಟಿದ ಎಲ್ಲರಿಗೂ ೧,೦೦೦ ರೂಪಾಯಿಗಳನ್ನು ತಲುಪಿಸಲು ಅಧಿಕಾರಿಗಳು ಸೂಕ್ತ ಕ್ರಮ ಕೈಗೊಳ್ಳಿ ಎಂದು ಅಧಿಕಾರಿಗಳಿಗೆ ಸೂಚಿಸಿದರು, ಮುಂದಿನ ವರ್ಷದಿಂದ ವೃದ್ದರಿಗೆ ೨,೦೦೦ ರೂ ವೃದ್ಯಾಪ್ಯ ವೇತನ ಕೊಡಲು ತೀರ್ಮಾನ ತೆಗೆದುಕೊಳ್ಳಲಾಗುವುದು ಎಂದು ಹೇಳಿದರು.

೨,೦೦೦ ಕ್ಕೂ ಹೆಚ್ಚು ಅರ್ಜಿಗಳು ಬಂದಿದ್ದು ಕಂದಾಯ ಇಲಾಖೆಗೆ ಸಂಬಂಧಿಸಿದ ಹೆಚ್ಚು ಅರ್ಜಿಗಳು ಬಂದಿರುವುದರಿಂದ ಸಂಬಂಧಿಸಿದ ಅಧಿಕಾರಿಗಳು ಎಲ್ಲವನ್ನೂ ಕಾಲಮಿತಿಯೊಳಗೆ ಪರಿಹರಿಸುವಂತೆ ಸೂಚಿಸಿದರು, ಕಂದಾಯ ಇಲಾಖೆಯಲ್ಲಿ ಇಬ್ಬರು ಅಧಿಕಾರಿಗಳನ್ನು ಅಮಾನತು ಮಾಡಬೇಕಾಗಿತ್ತು, ಸದ್ಯ ತಡೆ ಹಿಡಿದಿದ್ದೇನೆ, ಈಗಲೂ ಕೆಲಸ ಮಾಡದಿದ್ದರೆ ಸೂಕ್ತ ಕ್ರಮ ಕೈಗೊಳ್ಳುವುದಾಗಿ ಎಚ್ಚರಿಸಿದರು.

ಇದೇ ವೇಳೆ ಖಾರವಾಗಿ ಪ್ರತಿಕ್ರಿಯಿಸಿದ ಮುಖ್ಯಮಂತ್ರಿ ಗಳು ಸಾರ್ವಜನಿಕರ ಮತ್ತು ರೈತರ ಕೆಲಸವನ್ನು ಶೀಘ್ರವಾಗಿ ಮಾಡಿಕೊಡಿ ಇಲ್ಲವಾದರೆ ಅಮಾನತಿಗೆ ತಯಾರಾಗಿ ಎಂದು ಅಧಿಕಾರಿಗಳಿಗೆ ಎಚ್ಚರಿಸಿದರು.

ಹೊಂಗನೂರು ಜಿಲ್ಲಾ ಪಂಚಾಯತಿ ವ್ಯಾಪ್ತಿಯ ೧,೦೪೮ ರೈತರ ೪.೧ ಕೋಟಿ ರೂಪಾಯಿಗಳು, ಕೋಡಂಬಳ್ಳಿ ಜಿಲ್ಲಾ ಪಂಚಾಯತ ವ್ಯಾಪ್ತಿಯ ೧,೭೮೯ ರೈತರ ೮.೩೫ ಕೋಟಿ ರೂಪಾಯಿಗಳ ಸಹಕಾರ ಸಂಘಗಳ ಸಾಲಮನ್ನಾ ಮಾಡಿದ ಋಣಮುಕ್ತ ಪತ್ರಗಳನ್ನು ರೈತರಿಗೆ ವಿತರಿಸಿದರು.

ಕಾವೇರಿ ನಿಗಮದ ೧.೬೫ ಕೋಟಿ ರೂಪಾಯಿಗಳು, ಲೋಕೋಪಯೋಗಿ ಇಲಾಖೆಯ ೧೮.೩೫ ಕೋಟಿ ರೂಪಾಯಿಗಳು, ಹೊಂಗನೂರು ಜಿಲ್ಲಾ ಪಂಚಾಯತ ವ್ಯಾಪ್ತಿಯ ೧೫.೬೫ ಕೋಟಿ ರೂಪಾಯಿಗಳು ಮತ್ತು ಕೋಡಂಬಳ್ಳಿ ಲೋಕೋಪಯೋಗಿ ಇಲಾಖೆಯ ೬.೭ ಕೋಟಿ ರೂಪಾಯಿಗಳ ವಿವಿಧ ಕಾಮಗಾರಿಗಳ ಉದ್ಘಾಟನೆಯನ್ನು ಇದೇ ವೇಳೆ ನೆರವೇರಿಸಿದರು.

ಅಕ್ಕೂರು, ಕೋಡಂಬಳ್ಳಿ ಮತ್ತು ಹೊಂಗನೂರು ಜಿಲ್ಲಾ ಪಂಚಾಯತ ವ್ಯಾಪ್ತಿಯ ಬಹುತೇಕ ಎಲ್ಲಾ ಹಳ್ಳಿಗಳಲ್ಲೂ ತಳಿರು ತೋರಣಗಳೊಂದಿಗೆ ಸಿಂಗರಿಸಿ ಪಟಾಕಿ ಸಿಡಿಸಿ ಮುಖ್ಯಮಂತ್ರಿ ಗಳನ್ನು ಸ್ವಾಗತಿಸಲಾಯಿತು, ಅಭಿಮಾನಿಗಳು ಮತ್ತು ಕಾರ್ಯಕರ್ತರ ಒತ್ತಾಯಕ್ಕೆ ಮಣಿದು ದೇವಾಲಯಗಳಿಗೆ ಭೇಟಿ ನೀಡಿ ಪೂಜೆ ಸಲ್ಲಿಸಿದರು, ಜನರು ನಿಂತೆಡೆಯಲ್ಲಿಯೂ ಸಹ ಕೈ ಮುಗಿದು ಅಹವಾಲುಗಳನ್ನು ಸ್ವೀಕರಿಸಿದರು.

ಗೋ ರಾ ಶ್ರೀನಿವಾಸ...

ಮೊ:9845856139.