ಚನ್ನಪಟ್ಟಣ :  ಲೋಕ ಕಲ್ಯಾಣಾರ್ಥ ಶ್ರೀ ಕ್ಷೇತ್ರದಲ್ಲಿ ಇಂದಿನಿಂದ ಏಳು ದಿನಗಳ ಕಾಲ ಶತ ಚಂಡಿಕಾ ಯಾಗವನ್ನು ಹಮ್ಮಿಕೊಳ್ಳಲಾಗಿದ್ದು ಭಕ್ತರು ಯಾಗದಲ್ಲಿ ಪಾಲ್ಗೂಂಡು ಇಷ್ಟಾರ್ಥ ಸಿದ್ದಿಗೆ ಪ್ರಾರ್ಥಿಸುವಂತೆ ಧರ್ಮಾಧಿಕಾರಿ ಮಲ್ಲೇಶ್ ಗುರೂಜಿ ತಿಳಿಸಿದರು.

ತಾಲೂಕಿನ ಗೌಡಗೆರೆ ಗ್ರಾಮದ ಚಾಮುಂಡೇಶ್ವರಿ ಬಸಪ್ಪನವರ ಪುಣ್ಯಕ್ಷೇತ್ರದಲ್ಲಿ ಕರೆಯಲಾಗಿದ್ದ ಪತ್ರಿಕಾಗೋಷ್ಠಿಯಲ್ಲಿ ಈ ಕುರಿತು ಮಾತನಾಡಿದ ಅವರು ಜುಲೈ 11 ರಿಂದ 17 ರ ವರೆಗೆ ವಿಶ್ವಶಾಂತಿ ಹಾಗೂ ಭಕ್ತ ಸಂಕುಲದ ಸಂಕಷ್ಟ ನಿವಾರಣೆಗಾಗಿ ಶ್ರೀ ಕ್ಷೇತ್ರ ಗೌಡಗೆರೆಯಲ್ಲಿ ತಂತ್ರಭಾಗ ಶತ ಚಂಡಿಕಾ ಮಹಾಯಾಗವನ್ನು ಆಯೋಜಿಸಲಾಗಿದೆ. ಪುರಾಣ ಕತೆಗಳಲ್ಲೂ ಯಾಗಗಳಿಗೆ ತಪಃಶಕ್ತಿ ಇರುವುದಾಗಿ ಉಲ್ಲೇಖವಿದ್ದು, ಯಾಗದಲ್ಲಿ ಭಾಗಿಯಾದರೆ ನಿಮ್ಮ ಕಷ್ಟಗಳಿಗೆ ಪರಿಹಾರ ಸಿಗುವ ನಂಬಿಕೆ ಇದೆ, ದೇಶ-ವಿದೇಶಗಳಿಂದ ಬರುತ್ತಿರುವ ಭಕ್ತರ ಜೊತೆಗೆ ಜಿಲ್ಲೆಯ ಜನರು ಇದರಲ್ಲಿ ಭಾಗವಹಿಸಿ ಪುಣ್ಯಕಾರ್ಯದಲ್ಲಿ ಪಾಲುದಾರರಾಗುವಂತೆ ಮನವಿ ಮಾಡಿಕೊಂಡರು.

ಮಹಾಯಾಗದಲ್ಲಿ ಲಕ್ಷಾಂತರ ಮಂದಿ ಆಗಮಿಸುತ್ತಿರುವ ಹಿನ್ನೆಲೆಯಲ್ಲಿ ಈಗಾಗಲೇ ಜಿಲ್ಲಾಧಿಕಾರಿಗಳಿಗೆ ಬಸ್ ಸಂಚಾರ ವ್ಯವಸ್ಥೆ ಕಲ್ಪಿಸುವಂತೆ ಮನವಿ ಮಾಡಲಾಗಿದ್ದು, ವಾಹನ ದಟ್ಟಣೆ ಹಾಗೂ ಶಾಂತಿ ಸುವ್ಯವಸ್ಥೆ ಕಾಪಾಡುವ ನಿಟ್ಟಿನಲ್ಲಿ ಸೂಕ್ತ ಪೊಲೀಸ್ ಬಂದೋಬಸ್ತ್ ಕಲ್ಪಿಸುವಂತೆ ಪೊಲೀಸ್ ಇಲಾಖೆಗೂ ಮನವಿ ಮಾಡಿಕೊಂಡಿದ್ದು, ಇನ್ನೂ ಮಹಾಯಾಗದ ವೇಳೆ ಆರೋಗ್ಯ ಸಮಸ್ಯೆ ಉಂಟಾದರೆ ಅದನ್ನು ನೋಡಿಕೊಳ್ಳಲು ಆರೋಗ್ಯ ಇಲಾಖೆಯಿಂದ ತಾತ್ಕಾಲಿಕ ಆರೋಗ್ಯ ಶಿಬಿರ ಸಹ ತೆರೆಸಲಾಗುತ್ತಿದೆ.

*ಮಹಾಯಾಗದ ಉದ್ದೇಶ :*

ಲೋಕ ಕಲ್ಯಾಣಾರ್ಥ ಮಹಾಯಾಗ ನಡೆಸುತ್ತಿದ್ದು, ದುಷ್ಟರ ಸಂಹಾರ, ರೈತರ ಸಮಸ್ಯೆ ನಿವಾರಣೆ, ದೇಶಕ್ಕೆ ಯಾವುದೇ ಅಪಾಯ ಉಂಟಾಗದಿರಲಿ, ದೇಶದ ಸುಭೀಕ್ಷೆ, ಜನರನ್ನು ರೋಗ ರುಜಿನಗಳು ಭಾದಿಸದಂತೆ ಪ್ರಾರ್ಥಿಸಲು ಶತ ಚಂಡಿಕಾ ಮಹಾಯಾಗ ಆಯೋಜನೆ ಮಾಡಿದ್ದು ಕಡೂರಿನ ವಿನಯ್ ಶಾಸ್ತ್ರಿ ನೇತೃತ್ವದಲ್ಲಿ ಈ ಯಾಗ ನಡೆಯಲಿದೆ. ಪ್ರತಿನಿತ್ಯ ನೂರೆಂಟು ಚಂಡಿ ಹೋಮ, ಒಂದು ಲಕ್ಷ ಪಾರಾಯಣ, ಏಳು ಲಕ್ಷ ಬೀಜಾಕ್ಷರಗಳ ಪಠಣ ಮಹಾಯಾಗದಲ್ಲಿ ನಡೆಯಲಿದೆ.

*ಲಕ್ಷಾಂತರ ಮಂದಿ ನೀರಿಕ್ಷೆ :*

ಶತ ಚಂಡಿಕಾ ಯಾಗಕ್ಕೆ ಜಿಲ್ಲೆಯಿಂದ ಮಾತ್ರವಲ್ಲದೆ ರಾಜ್ಯ, ದೇಶ, ವಿದೇಶಗಳಿಂದಲೂ ಭಕ್ತರು ಆಗಮಿಸುತ್ತಿದ್ದು, ಏಳು ದಿನಗಳ ಕಾಲ ನಡೆಯುವ ಮಹಾಯಾಗದಲ್ಲಿ ಲಕ್ಷಾಂತರ ಮಂದಿ ಪಾಲ್ಗೊಳ್ಳಲಿದ್ದಾರೆ. ಯಾಗಕ್ಕೆ ಬರುವ ಭಕ್ತರಿಗಾಗಿ ಅನ್ನ ದಾಸೋಹ ಹಾಗೂ ವಸತಿ ವ್ಯವಸ್ಥೆ ಕಲ್ಪಿಸಲಾಗಿದ್ದು, ಯಾವುದೇ ರೀತಿಯ ಲೋಪದೋಷಗಳು ಬಾರದಂತೆ ಕ್ರಮ ಕೈಗೊಳ್ಳಲಾಗಿದೆ.

*ಆಗೋರಿಗಳಿಂದ ಪೂರ್ಣಾಹುತಿ :*

ಏಳು ದಿನಗಳ ಕಾಲ ನಡೆಯುವ ಮಹಾಯಾಗ ಭೀಮನ ಅಮವಾಸ್ಯೆ ದಿನ ಕೊನೆಗೊಳ್ಳಲಿದ್ದು, ಬದರೀನಾಥ, ಕೇದಾರನಾಥ ದಿಂದ ನಾಗಾ ಸಾಧುಗಳು, ಅಘೋರಿಗಳು, ಸಂತರು ಆಗಮಿಸಿ ಪೂರ್ಣಾಹುತಿ ನೀಡಲಿದ್ದಾರೆ. ಭೀಮನ ಅಮವಾಸ್ಯೆ ಬಹಳ ಶಕ್ತಿಶಾಲಿ ದಿನವೆಂಬ ನಂಬಿಕೆ ಹಿಂದೂ ಸಂಪ್ರದಾಯದಲ್ಲಿದ್ದು, ಅಂದು ನಡೆಯಲಿರುವ ಮಹಾಯಾಗದಲ್ಲಿ ಭಾಗಿಯಾದರೆ ಸಾಕು ಶುಭವೆಂಬ ಪ್ರತೀತಿ ಇದ್ದು, ಅಘೋರಿಗಳಿಂದಲೇ ಪೂರ್ಣಾಹುತಿ ನೀಡಬೇಕೆಂದು ದೇವಸ್ಥಾನದ ಆಡಳಿತ ಮಂಡಳಿ ನಿರ್ಧರಿಸಿದೆ.

*ಭಾಗವಹಿಸಲಿರುವ ಗಣ್ಯರು :*

ಏಳು ದಿನಗಳ ಕಾಲ ನಡೆಯುತ್ತಿರುವ ಮಹಾಯಾಗದಲ್ಲಿ ಚಲನಚಿತ್ರ ನಟ ನಟಿಯರು, ರಾಜರಾಣಿಗಳು, ಸರಕಾರದ ಉನ್ನತ ಅಧಿಕಾರಿಗಳು, ಚಲನಚಿತ್ರ ನಿರ್ದೇಶಕರುಗಳು ಆಗಮಿಸುತ್ತಿದ್ದು, 14ನೇ ತಾರೀಕು ಮಾಜಿ ಮುಖ್ಯಮಂತ್ರಿ ಹೆಚ್.ಡಿ.ಕುಮಾರಸ್ವಾಮಿ, 15ನೇ ತಾರೀಕು, ಮಾಜಿ ಸಚಿವರುಗಳಾದ ಆಶ್ವಥ್ ನಾರಾಯಣ್ ಹಾಗೂ ಸಿ.ಪಿ.ಯೋಗೇಶ್ವರ್, 17ನೇ ತಾರೀಕು ಉಪ ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಸೇರಿ ಸಾಕಷ್ಟು ಗಣ್ಯರ ದಂಡೆ ಆಗಮಿಸಲಿದೆ.

ರಾಷ್ಟಮಟ್ಟದಲ್ಲಿ ಮಾತ್ರವಲ್ಲದೆ ಅಂತರಾಷ್ಟ್ರೀಯ ಮಟ್ಟದಲ್ಲೂ ನಮ್ಮ ಗೌಡಗೆರೆ ಗ್ರಾಮ ಇಂದು ಪ್ರಸಿದ್ದಿ ಪಡೆದಿದ್ದು, ಇದಕ್ಕೆ ತಾಯಿ ಚಾಮುಂಡಿ ದೇವಿಯ ಅನುಗ್ರಹವೆ ಕಾರಣವಾಗಿದ್ದು, ಲೋಕ ಕಲ್ಯಾಣಾರ್ಥ ಗುರುಗಳಾದ ಮಲ್ಲೇಶ್ ಗುರೂಜಿ ತಮ್ಮ ಶಕ್ತಿ ಮೀರಿ ಕ್ಷೇತ್ರದಲ್ಲಿ ಶತ ಚಂಡಿಕಾಯಾಗವನ್ನು ನಡೆಸುತ್ತಿದ್ದಾರೆ. ಮನೆಗಳಲ್ಲಿ ಒಂದು ಸಣ್ಣ ಕಾರ್ಯಕ್ರಮ ಮಾಡಲು ಹಿಂದುಮುಂದು ಯೋಚಿಸುವ ಜನರ ನಡುವೆ ಶತ ಚಂಡಿಕಾ ಯಾಗದ ಜೊತೆಗೆ ಲಕ್ಷಾಂತರ ಮಂದಿಗೆ ಅನ್ನ ದಾಸೋಹ ಕೈಗೊಂಡಿರುವ ಗುರೂಜಿ ಕೆಲಸವನ್ನು ಎಷ್ಟು ಹೊಗಳಿದರೂ ಸಾಲದು ತಾಯಿ ಚಾಮುಂಡಿ ಅವರಿಗೆ ಇನ್ನಷ್ಟು ಶಕ್ತಿ ನೀಡಿ ತನ್ನ ಸೇವೆ ಮಾಡಿಸಿಕೊಳ್ಳಲಿ.

ದಯಾನಂದ್ ಗೌಡಗೆರೆ, 

ಗೋ ರಾ ಶ್ರೀನಿವಾಸ...

ಮೊ:9845856139.