ಚನ್ನಪಟ್ಟಣ: ಮಲೇಶಿಯಾದ ಕ್ಲಾಂಗ್‍ನಲ್ಲಿ ನಡೆದ  ಅಂತರಾಷ್ಟ್ರೀಯ ಯೋಗೋತ್ಸವ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದ ತಾಲೂಕಿನ ಸೌಭಾಗ್ಯ ಯೋಗ ಕೇಂದ್ರ ಯೋಗಪಟು ವಿ.ಸಮೀಕ್ಷ ದ್ವಿತೀಯ ಸ್ಥಾನ ಪಡೆಯುವ ಮೂಲಕ ತಾಲೂಕಿನ ಕೀರ್ತಿ ಹೆಚ್ಚಿಸಿದ್ದಾರೆ.
 ಮಲೇಶಿಯಾದ ಸೆಲಂಗಾರ್ ಯೋಗಾ ಸೊಸೈಟಿ  ಮಾ.22 ರಿಂದ 28 ವರೆಗೆ ಆಯೋಜಿಸಿದ್ದ ಉತ್ಸವದಲ್ಲಿ  ಎಸ್‍ಜಿಎಸ್ ಇಂಟರ್ ನ್ಯಾಷನಲ್ ಯೋಗಾ ಪೌಂಢೇಷನ್ ವತಿಯಿಂದ ಭಾರತವನ್ನು ಪ್ರತಿನಿಧಿಸಿದ ಸಮೀಕ್ಷಾ, ಕಲಾ ಯೋಗ ವಿಭಾಗದಲ್ಲಿ ದ್ವಿತೀಯ ಬಹುಮಾನ, ಉಳಿದೆರಡು ವಿಭಾಗದಲ್ಲಿ ತೃತೀಯ ಬಹುಮಾನ ಪಡೆದಿದ್ದಾರೆ.
 ಅಂತರಾಷ್ಟ್ರೀಯ ಯೋಗ ಸ್ಪರ್ಧೆಯಲ್ಲಿ ಉತ್ತಮ ಪ್ರದರ್ಶನ ನೀಡುವ ಮೂಲಕ ಬಹುಮಾನ ಪಡೆದಿರುವ ಸಮೀಕ್ಷಾ ಅವರನ್ನು ತಾಲೂಕಿನ ವಿವಿಧ ಸಂಘ ಸಂಸ್ಥೆಗಳು, ಕ್ರೀಡಾಪಟುಗಳು ಅಭಿನಂದಿಸಿದ್ದಾರೆ.
ಪರಿಚಯ: ಕಳೆದ 30 ವರ್ಷಗಳಿಂದ ತಾಲೂಕಿನ ಅಸಂಖ್ಯಾತ ಜನತೆಗೆ ಯೋಗ ತರಬೇತಿ ನೀಡುತ್ತಾ ಬಂದಿರುವ ಸೌಭಾಗ್ಯ ಯೋಗಾ ಕೇಂದ್ರದ ಸಂಸ್ಥಾಪಕ ಕಾರ್ಯದರ್ಶಿ ಜೆ.ಎನ್.ಸೌಭಾಗ್ಯ ಅವರ ಪುತ್ರಿಯಾದ ಸಮೀಕ್ಷಾ, ತಮ್ಮ ತಾಯಿಯನ್ನೇ ಗುರುವಾಗಿ ಸ್ವೀಕರಿಸಿ ತಮ್ಮ 5ನೇ ವಯಸ್ಸಿನಿಂದಲೇ ಯೋಗ ಅಭ್ಯಾಸ ಆರಂಭಿಸಿದರು.
ಎಂಟೆಕ್ ಪದವೀಧರೆಯಾಗಿರುವ ಸಮೀಕ್ಷಾ ಶಿಕ್ಷಣದ ಜತೆಗೆ ಯೋಗಾಸನವನ್ನು ಅಭ್ಯಾಸ ಮಾಡಿಕೊಂಡು ಬಂದಿರುವ ಇವರು ರಾಜ್ಯ ಮತ್ತು ರಾಷ್ಟ್ರ ಮಟ್ಟದ ಹಲವಾರು ಯೋಗ ಸ್ಪರ್ಧೆಯಲ್ಲಿ ಪಾಲ್ಗೊಂಡು ಹಲವಾರು ಬಹುಮಾನಗಳನ್ನು ತಮ್ಮದಾಗಿಸಿಕೊಂಡಿದ್ದಾರೆ.
ಇದುವರೆಗೆ ಯೋಗಕ್ಷೇತ್ರದಲ್ಲಿ  ಇವರು ಮಾಡಿರುವ ಸಾಧನೆಯನ್ನು ಗುರುತಿಸಿ ವಿವಿಧ ಸಂಸ್ಥೆಗಳು ಹಲವಾರು ಬಿರುದು ನೀಡಿ ಗೌರವಿಸಿವೆ.2009ರಲ್ಲಿ ಎಸ್‍ಜಿಎಸ್ ಇಂಟನ್ರ್ಯಾಷನಲ್ ಯೋಗ ಫೌಂಡೇಶನ್ ಮತ್ತು ರೀಸರ್ಚ್ ಫೌಂಡೇಶನ್ ಯೋಗ ಸಾಧಕಿ ಬಿರುದು ನೀಡಿತು.2010ರಲ್ಲಿ ಕರ್ನಾಟಕ ಸೌತ್ ಝೋನ್ ಅಸೋಸಿಯೇಷನ್ ಯೋಗ ಸಾಧಕಿ ಗೌರವ ಮತ್ತು ವಿಶ್ವಪ್ರಕೃತಿ ಯೋಗ ಕೇಂದ್ರದಿಂದ  'ಭಾರತ ಯೋಗ ನಿಧಿ ಪ್ರಶಸ್ತಿ ನೀಡಿ ಗೌರವಿಸಿವೆ.
 ಇವರ ಯೋಗ ಸಾಧನೆಯನ್ನು ಗುರುತಿಸಿದ ಎಸ್‍ಜಿಎಸ್ ಯೋಗಪೌಂಢೇಷನ್  ಇವರನ್ನು ಅಂತರ್‍ರಾಷ್ಟ್ರೀಯ ಯೋಗೋತ್ಸವಕ್ಕೆ ಆಯ್ಕೆ ಮಾಡಿತ್ತು. ಯೋಗೋತ್ಸವದಲ್ಲಿ ಉತ್ತಮ  ಪ್ರದರ್ಶನ ನೀಡಿದ ಸಮೀಕ್ಷಾ ಎಲ್ಲಾ ವಿಭಾಗದಲ್ಲಿ ಉತ್ತಮ ಪ್ರದರ್ಶನ ನೀಡಿ ಬಹುಮಾನ ಪಡೆಯುವ ಮೂಲಕ  ತಮ್ಮ ಪ್ರತಿಭೆಯನ್ನು ಅಂತರಾಷ್ಟ್ರೀಯ ಮಟ್ಟಕ್ಕೆ ವಿಸ್ತಾರ ಗೊಳಿಸಿದ್ದಾರೆ.