ರಾಮನಗರ: ರಾಜಕೀಯವಾಗಿ ರಾಮನಗರ ವಿಧಾನಸಭಾ ಕ್ಷೇತ್ರ ಒಂದಲ್ಲಾ ಒಂದು ಸುದ್ದಿಗೆ ಹೆಸರು ವಾಸಿಯಾಗಿದ್ದು. ಚುನಾವಣೆ ಹೊಸ್ತಿಲಲ್ಲಿಯೆ ಕಳೆದ ವಿಧಾನಸಭಾ ಚುನಾವಣೆಯಲ್ಲಿ ಮಾಜಿ ಮುಖ್ಯ ಮಂತ್ರಿ ಹೆಚ್.ಡಿ.ಕುಮಾರಸ್ವಾಮಿ ಅವರಿಗೆ ಪ್ರಬಲ ಪೈಪೋಟಿ ನೀಡಿದ್ದ ದಿವಂಗತ ಮರಿದೇವರು ಪತ್ನಿ ಮಂಜುಳಾ ಅವರ ನಿವಾಸದಲ್ಲಿ ಯಡಿಯೂರಪ್ಪ ಅವರ ಆದೇಶದ ಮೇರೆಗೆ ಬಿಜೆಪಿ ಮುಖಂಡ ಎಂ.ರುದ್ರೇಶ್ ಮತ್ತು ಮುಖಂಡರ ಬೇಟಿ ಕುತೂಹಲ ಮೂಡಿಸಿದೆ.
ವಿದ್ಯಾನಗರದಲ್ಲಿರುವ ಮಂಜುಳಾ ಅವರ ನಿವಾಸಕ್ಕೆ ಮಂಗಳವಾರ ದಿಡೀರನೆ ಬೇಟಿ ನೀಡಿದ ನಂತರ ಸುದ್ದಿಗಾರರೊಂದಿಗೆ ಮಾತನಾಡಿದ ಕಂಠೀರವ ಸ್ಟುಡಿಯೋ ಮಾಜಿ ಅಧ್ಯಕ್ಷ ಎಂ.ರುದ್ರೇಶ್ ಮಾತನಾಡಿ ಜಿಲ್ಲೆಯಲ್ಲಿ ಬಿಜೆಪಿ ಪಕ್ಷವನ್ನು ಬಲಗೊಳಿಸುವ ನಿಟ್ಟಿನಲ್ಲಿ ಪಣ ತೊಟ್ಟಿದ್ದು, ಮಾಜಿ ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಮತ್ತು ಚುನಾವಣಾ ಜಿಲ್ಲಾ ಉಸ್ತುವಾರಿ ವಹಿಸಿರುವ ಸಿ.ಟಿ.ರವಿ ಅವರ ಸೂಚನೆಯಂತೆ ಮಂಜುಳಾ ಮರಿದೇವರು ಅವರನ್ನು ಬೇಟಿ ಮಾಡಿದ್ದೇನೆ. 
ಬಿಜೆಪಿಯ ಪರಿವರ್ತನಾ ರ್ಯಾಲಿ ಸಂಧರ್ಭದಲ್ಲಿ ಸಿ.ಟಿ.ರವಿ ಅವರು ಕನಕಪುರಕ್ಕೆ ತೆರಳುತ್ತಿದ್ದಾಗ ಮರಿದೇವರು ಅಭಿಮಾನಿಗಳು ಕೈಲಂಚಾ ಭಾಗದಲ್ಲಿ ಮರಿದೇವರು ಅವರ ಕುಟುಂಬವನ್ನು ಕಾಂಗ್ರೆಸ್ ಪಕ್ಷ ಹೀನಾಯವಾಗಿ ನಡೆಸುಕೊಳ್ಳುತ್ತಿದ್ದು, ಅವರಿಗೆ ಬಿಜೆಪಿ ಪಕ್ಷದಲ್ಲಿ ರಾಜಕೀಯ ಶಕ್ತಿ ತುಂಬುವ ಬಗ್ಗೆ ಗಮನ ಸೆಳೆದಿದ್ದಾರೆ. ಆಗಾಗಿ ಬಿಜೆಪಿ ಪಕ್ಷಕ್ಕೆ ಮಂಜುಳಾ ಮತ್ತು ಅನೇಕ ಮುಖಂಡರ ಅವರ ಸೇವೆ ಅವಶ್ಯಕತೆಯಿದೆ ಎಂದರು.
2008 ರ ಚುನಾವಣೆಯಲ್ಲಿ ಮೂರನೆ ಸ್ಥಾನದಲ್ಲಿದ್ದ ಕಾಂಗ್ರೆಸ್ ಪಕ್ಷವನ್ನು 2013 ರ ಚುನಾವಣೆಯಲ್ಲಿ ರಾಜಕೀಯವಾಗಿ ರಾಜ್ಯವೆ ರಾಮನಗರದತ್ತ ನೋಡುವಂತಹ ವಾತಾವರಣವನ್ನು ಮರಿದೇವರು ಕುಟುಂಬ ಸೃಷ್ಟಿ ಮಾಡಿದ್ದರು. ಮಂಜುಳಾ ಅವರಿಗೆ ರಾಜಕೀಯವೇನೂ ಹೊಸದಲ್ಲ ಎರಡು ಬಾರಿ ತಾಲ್ಲೂಕು ಪಂಚಾಯಿತಿ ಸದಸ್ಯೆಯಾಗಿ, ಕೂಟಗಲ್ ಜಿಲ್ಲಾ ಪಂಚಾಯಿತಿ ಸದಸ್ಯರಾಗಿ, ಈ ಹಿಂದೆ ಮಹಿಳಾ ಕಾಂಗ್ರೆಸ್‍ನ ತಾಲ್ಲೂಕು ಅಧ್ಯಕ್ಷರಾಗಿ ಕೆಲಸ ಮಾಡಿದ ಅನುಭವವಿದ್ದು, ಅವರದೆ ಆದ ರಾಜಕೀಯ ಅಸ್ಥಿತ್ವವನ್ನು ಉಳಿಸಿಕೊಂಡಿದ್ದಾರೆ.
ಮರಿದೇವರು ಅವರು ಅಕಾಲಿಕವಾಗಿ ಮರಣ ಹೊಂದಿದ ನಂತರದ ದಿನಗಳಲ್ಲಿ ಕಾಂಗ್ರೆಸ್ ಪಕ್ಷ ಸರಿಯಾಗಿ ನಡೆಸಿಕೊಂಡಿಲ್ಲ. ಆ ನೋವು ಅವರನ್ನು ಕಾಡುತಿದ್ದು, ಅವರ ಬೆಂಬಲಕ್ಕಿದ್ದ ನೂರಾರು ಮುಖಂಡರು ಇಂದಿಗೂ ಸಹ ಪಕ್ಷದಿಂದ ದೂರ ಇದ್ದು ಅವರನ್ನು ಬಿಜೆಪಿ ಪಕ್ಷಕ್ಕೆ ಸೇರಿಸಿಕೊಳ್ಳುವಂತೆ ಮನವಿ ಮಾಡಲಾಗುತ್ತಿದೆ. ಮಂಜುಳಾ ಅವರು ಬಿಜೆಪಿ ಸೇರ್ಪಡೆಯಾದರೆ ಪಕ್ಷಕ್ಕೆ ಬಲ ಬರಲಿದೆ ಎಂದರು.
ಮಂಜುಳಾ ಮರಿದೇವರು ಮಾತನಾಡಿ ರಾಮನಗರ ಕ್ಷೇತ್ರದಲ್ಲಿ ನನ್ನ ಪತಿ ಮರಿದೇವರು ಅವರ ಅಭಿಮಾನಿಗಳು ಮತ್ತು ರಾಜಕೀಯ ಶಕ್ತಿ ತುಂಬಿದ ಮುಖಂಡರುಗಳಿದ್ದು, ಅವರ ಅಭಿಪ್ರಾಯ ಮತ್ತು ಚರ್ಚೆ ನಡೆಸಿ ರಾಜಕೀಯ ನಿರ್ಧಾರ ಕೈಗೊಳ್ಳುತ್ತೇವೆ. ಬಿಜೆಪಿ ಮುಖಂಡರು ಪಕ್ಷಕ್ಕೆ ಸೇರುವಂತೆ ಬೇಟಿ ಮಾಡಿ ಮನವಿ ಮಾಡಿದ್ದಾರೆ. ಆದರೆ ಈ ಬಗ್ಗೆ ಮರಿದೇವರು ಅವರ ಆಪ್ತ ಮುಖಂಡರು ಮತ್ತು ಅವರ ಅಪಾರ ಅಭಿಮಾನಿಗಳೊಂದಿಗೆ ಚರ್ಚಿಸಿ ತೀರ್ಮಾನ ತೆಗೆದುಕೊಳ್ಳುತ್ತೇನೆ.
ಈ ಸಂದರ್ಭದಲ್ಲಿ ತಾಲ್ಲೂಕು ಬಿಜೆಪಿ ಅಧ್ಯಕ್ಷ ಪ್ರವೀಣ್‍ಗೌಡ, ರಾ-ಚ ಪ್ರಾಧಿಕಾರದ ಮಾಜಿ ಅಧ್ಯಕ್ಷ ಎಸ್.ಅರ್.ನಾಗರಾಜು, ಬಿಜೆಪಿ ಮುಖಂಡರಾದ ಜಯಣ್ಣ, ಪದ್ಮನಾಭ್, ಪತ್ರಿಕಾ ವಕ್ತಾರ ರುದ್ರದೇವರು, ಯುವ ಮುಖಂಡ ಸಂಗಬಸವನದೊಡ್ಡಿ ಬಾಬು, ರಾಮಯ್ಯ, ಚಂದ್ರಶೇಖರರೆಡ್ಡಿ, ಭೂಪತಿ ಮತ್ತಿತರರು ಇದ್ದರು.