ಮೈಸೂರು : ಜಗತ್ತಿನ ಎಲ್ಲಾ ಸಮಸ್ಯೆಗಳಿಗೆ ಗಾಂಧೀಜಿ ಅವರ ಶಾಂತಿ ಮತ್ತು ಅಹಿಂಸೆ ಮಾರ್ಗವೇ ಸರಿಯಾದ ಮಾರ್ಗ ಎಂದು ಕರ್ನಾಟಕ ಸ್ಮಾರಕ ನಿಧಿ ಉಪಾಧ್ಯಕ್ಷ ಪ್ರೊ.ಜಿ.ಬಿ. ಶಿವರಾಜು ಅವರು ತಿಳಿಸಿದರು. 
ಕಿರು ರಂಗಮಂದಿರದಲ್ಲಿ ಆಯೋಜಿಸಿದ್ದ ಗಾಂಧಿ ಧ್ವನಿ ಮತ್ತು ಬೆಳಕು ಪ್ರದರ್ಶನ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು ಬಹಳಷ್ಟು ರಾಷ್ಟ್ರಗಳ ಮಕ್ಕಳು ಗಾಂಧಿ ವಿಚಾರಗಳನ್ನು ತಿಳಿಯಲು ವೆಬಸೈಟ್‍ನಲ್ಲಿ ಹುಡುಕುತ್ತಾರೆ. ನೆಮ್ಮದಿಯ ಬದುಕು ನಡೆಸಲು ಯುವಜನತೆಯು ಗಾಂಧೀಜಿಯ ಬಗ್ಗೆ ತಿಳಿದುಕೊಳ್ಳಬೇಕು, ಅವರ ತತ್ವಗಳನ್ನು ಪಾಲಿಸಬೇಕು ಎಂದರು. 
ಇಂದಿನ ವಿದ್ಯಾಭ್ಯಾಸ ಪಠ್ಯಕ್ರಮ, ಉದ್ಯೋಗ ಆಧಾರಿತವಾಗಿದೆ. ನೈತಿಕ ಮೌಲ್ಯವನ್ನು ಮರೆತಿದೆ. ಇದು ಸಮಾಜದ ದ್ವಂಸೀಕರಣದ ಕಡೆ ಸಾಗುತ್ತಿದೆ. ಸತ್ಯ, ಅಹಿಂಸೆಯ ಮೂಲಕ ಎಲ್ಲಾವನ್ನು ಪಡೆಯಬಹುದು ಎಂದು ತೊರಿಸಿಕೊಟ್ಟವರು ಮಹಾತ್ಮ ಗಾಂಧೀಜಿ. 130 ವರ್ಷಗಳ ಕಾಲ ಕಪ್ಪು ಜನರಿಗೆ ಮತದಾನದ ಮಾಡಲು ಅವಕಾಶವಿಲ್ಲದಿದ್ದಾಗ ಪರಕೀಯರ ವಿರುದ್ಧ ಹೋರಾಡಿ ಮತದಾನದ ಹಕ್ಕು ತಂದುಕೊಟ್ಟವರು ಗಾಂಧೀಜಿಯವರು ಎಂದು ತಿಳಿಸಿದರು.
ಮಹಾತ್ಮ ಗಾಂಧೀಜಿ ಅವರ ಪ್ರತಿಮೆಯನ್ನು ಕೇವಲ ನಮ್ಮ ದೇಶದಲ್ಲಿ ಮಾತ್ರವಲ್ಲಾ ಇಡೀ ಜಗತ್ತಿನಲ್ಲಿ ನೋಡಬಹುದು. ಇದಕ್ಕೆ ಕಾರಣ ಅವರು ಪಾಲಿಸಿದ ಆದರ್ಶಗಳು. ಮಹಾತ್ಮ ಗಾಂಧೀಜಿಯವರ 32 ಸಾವಿರ ಪ್ರತಿಮೆಗಳಿವೆ. ವಿವಿಧ ಲೇಖಕರು ಬರೆದಿರುವ 450 ಜೀವನ ಚರಿತ್ರೆಗಳಿವೆ 23 ಭಾಷೆಗಳಲ್ಲಿ ಭಾಷಾಂತರವಾಗಿವೆ. ಮಹಾತ್ಮ ಗಾಂಧೀಜಿಯವರ ಭಾವಚಿತ್ರವುಳ್ಳ ವಿವಿಧ ಬಗೆಯ ಸ್ಟಾಂಪ್‍ಗಳಿವೆ ಎಂದರು.
ಗಾಂಧೀಜಿ ಅವರು ಮಾಡಿದ ಸ್ವಾತಂತ್ರ್ಯ ಹೋರಾಟಗಳಲ್ಲಿ ಮಾಡಿದ ಭಾಷಣ ಇಡೀ ಭಾರತದ ಚಿತ್ರಣವನ್ನು ಬದಲಾವಣೆ ಮಾಡಿದೆ. ಗಾಂಧೀಜಿಯ ತತ್ವಗಳನ್ನು ನಾನು ಅನುಸರಿಸುತ್ತೇನೆ ಎಂದು ಅಮೇರಿಕಾದ ಅಧ್ಯಕ್ಷರಾಗಿದ್ದ ಒಬಾಮ ಅವರು ಹೇಳಿದ್ದಾರೆ ಎಂದು ತಿಳಿಸಿದರು. 
ಮೈಸೂರು ವಿಶ್ವವಿದ್ಯಾನಿಲಯದ ಗಾಂಧಿ ಅಧ್ಯಯನ ಸಂಸ್ಥೆ ನಿರ್ದೇಶಕ ಡಾ|| ಎಂ.ಎಸ್. ಶೇಖರ್ ಅವರು ಮಾತನಾಡಿ ಇಡೀ ದೇಶಕ್ಕೆ ಗಾಂಧೀಜಿ ಅವರು ನೀಡಿದ ಸಂದೇಶ ಮಾನವೀಯತೆ. ಜಗತ್ತಿನಲ್ಲಿ ಪ್ರೀತಿ, ವಿಶ್ವಾಸದಿಂದ ಬದುಕಬೇಕು ಎಂದರು.
ಕಾರ್ಯಕ್ರಮದಲ್ಲಿ ಮೈಸೂರು ವಿಶ್ವವಿದ್ಯನಿಲಯ ಪತ್ರಿಕೋದ್ಯಮ ವಿಭಾಗದ ಪ್ರಾಧ್ಯಪಕ ಪ್ರೊ|| ಸಿ.ಕೆ.ಪುಟ್ಟಸ್ವಾಮಿ, ನಿವೃತ್ತ ಪ್ರಾಧ್ಯಪಕ ಪ್ರೊ|| ಬಿ.ಕೆ.ಶಿವಣ್ಣ, ರಂಗಾಯಾಣದ ಜಂಟಿ ನಿರ್ದೇಶಕ ಮಲ್ಲಿಕಾರ್ಜುನ, ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆ ಸಹಾಯಕ ನಿರ್ದೇಶಕ ಆರ್.ರಾಜು ಸೇರಿದಂತೆ ಇನ್ನಿತರ ಗಣ್ಯರು ಉಪಸ್ಥಿತರಿದ್ದರು.