ಶ್ರವಣಬೆಳಗೊಳ : ಶ್ರವಣಬೆಳಗೊಳದಲ್ಲಿ ಈ ಬಾರಿ ಮಹಾಮಸ್ತಕಾಭಿಷೇಕದ ಸಂದರ್ಭದಲ್ಲಿ

ಉಂಟಾಗಬಹುದಾದ ಕೊಳಚೆ ನೀರಿನ ಸಮಸ್ಯೆಯನ್ನು ವೈಜ್ಞಾನಿಕವಾಗಿ ನಿರ್ವಹಿಸಲು ಜಿಲ್ಲಾಡಳಿತ ಸಜ್ಜಾಗಿದೆ. ಇಲ್ಲಿ ನಿರ್ಮಾಣವಾಗಿರುವ 12 ತಾತ್ಕಾಲಿಕ ನಗರಗಳಲ್ಲಿನ ಕೊಳಚೆ ನೀರನ್ನು ಶುದ್ಧೀಕರಿಸಲು ಒಂದು ಅತ್ಯಾಧುನಿಕ ಕೊಳಚೆ ನೀರಿನ ಸಂಸ್ಕರಣ ಘಟಕವನ್ನು ಸ್ಥಾಪಿಸಿದೆ.

ಮಹಾಮಸ್ತಕಾಭಿಷೇಕದಲ್ಲಿ ಲಕ್ಷಾಂತರ ಮಂದಿ ಭಾಗವಹಿಸುತ್ತಿರುವ ಹಿನ್ನಲೆಯಲ್ಲಿ ಒಳಚರಂಡಿ ನೀರನ್ನು ಶುದ್ಧೀಕರಿಸುವ ಸಲುವಾಗಿ ಮೂವಿಂಗ್ ಬೆಡ್ ಬಯೋಫಿಲ್ಮ್ ರಿಯಾಕ್ಟರ್ ತಂತ್ರಜ್ಞಾನ ಘಟಕವನ್ನು ಶ್ರವಣಬೆಳಗೊಳದಲ್ಲಿ ಅಳವಡಿಸಲಾಗಿದೆ.

ಶ್ರವಣಬೆಳಗೊಳವು ಒಂದು ಗ್ರಾಮ ಪಂಚಾಯಿತಿ ಆಗಿದ್ದು, ಸುಮಾರು 8000 ಜನಸಂಖ್ಯೆಯನ್ನು ಹೊಂದಿರುವ ಈ ಪಟ್ಟಣ ಮಹಾಮಸ್ತಕಾಭಿಷೇಕದ ನಂತರವೂ ಈ ಕೊಳಚೆ ನೀರು ಸಂಸ್ಕರಣಾ ಘಟಕ ಪಟ್ಟಣದ ಕೊಳಚೆ ನೀರು ಸಂಸ್ಕರಿಸಲು ಬಳಕೆಯಾಗುತ್ತದೆ. ಪಟ್ಟಣದ ಜನಸಂಖ್ಯೆ 15000 ಆಗುವವರೆಗೂ ಕೊಳಚೆನೀರು ಶುದ್ಧೀಕರಿಸುವ ಘಟಕದ ಸಾಮರ್ಥ್ಯ ಹೊಂದಿರುತ್ತದೆ.

1993 ರಲ್ಲಿ ನಡೆದ ಹಿಂದಿನ ಮಹಾಸ್ತಕಾಭಿಷೇಕದಲ್ಲಿ ಉಂಟಾದ ಕೊಳಚೆ ನೀರನ್ನು ಸಂಸ್ಕರಣೆ ಮಾಡಿ ಆ ನೀರನ್ನು ಭೂಮಿಗೆ ಇಂಗಿಸುವ ವ್ಯವಸ್ಥೆಯನ್ನು ಮಾಡಲಾಗಿತ್ತು. ಹಾಗೆಯೇ 2006 ರ ಮಹಾಮಸ್ತಕಾಭಿಷೇಕದಲ್ಲಿಯೂ ಇದೇ ವ್ಯವಸ್ಥೆಯನ್ನು ಅಭಿವೃದ್ಧಿ ಪಡಿಸಲಾಗಿತ್ತು ಎಂದು ಮಹಾಸ್ತಕಾಭಿಷೇಕದ ವಿಶೇಷ ಅಧಿಕಾರಿ ವರಾಪ್ರಸಾದ್ ರೆಡ್ಡಿ ಅವರು ತಿಳಿಸಿದ್ದಾರೆ.

ಈ ಘಟಕ 1.5 ಎಂ.ಎಲ್.ಡಿ ಸಾಮರ್ಥ್ಯ ಹೊಂದಿದ್ದು 2.3 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸಲಾಗಿದೆ.

ಮನೆಗಳಿಂದ ಸಂಗ್ರಹಿಸಲಾದ ಕೊಳಚೆ ನೀರನ್ನು ಒಂದು ಕಡೆ ಸಂಗ್ರಹಿಸಿ ಬಯೋ-ರಿಯಾಕ್ಟರ್ ಗಳಿಗೆ ಪಂಪ್ ಮಾಡಲಾಗುತ್ತದೆ. ಈ ರಿಯಾಕ್ಟರ್ ಗಳು ಒಳಬರುವ ಕೊಳಚೆಯನ್ನು 3ರಿಂದ 4 ಗಂಟೆಗಳಲ್ಲಿ ಸಂಸ್ಕರಿಸುತ್ತವೆ. ರಿಯಾಕ್ಟರ್ ಗಳಿಂದ ಹೊರಬರುವ ವಸ್ತು ಪ್ಲೇಟ್ ಸೆಟ್ಲರ್ ಗೆ ಪ್ರವಹಿಸುತ್ತದೆ ಮತ್ತು ಅಲ್ಲಿ ಪಾಲಿಮರ್ ಸಹಾಯದಿಂದ ಘನ ತ್ಯಾಜ್ಯ ವಿಂಗಡಣೆಯಾಗುತ್ತದೆ. ಪ್ಲೇಟ್ ಸೆಟ್ಲರ್ ನಿಂದ ಹೊರಬರುವ ಸ್ವಚ್ಛ ನೀರು ಪ್ರೆಷರ್ ಸ್ಯಾಂಡ್ ಫಿಲ್ಟರ್ ಮೂಲಕ ಹರಿದು ಉಳಿದ ಯಾವುದೇ ಬಗೆಯ ಘನ ವಸ್ತುಗಳನ್ನು ನಿವಾರಿಸುತ್ತದೆ. ಮತ್ತು ಆಕ್ಟಿವೇಟೆಡ್ ಕಾರ್ಬನ್ ವಾಸನೆ ನಿವಾರಿಸುತ್ತದೆ.

ಅಂತಿಮವಾಗಿ ಕ್ಲೋರಿನ್ ಬಳಸಿ ಕೊಳಚೆ ನೀರಿನ ಸಂಸ್ಕರಣೆಯನ್ನು ಪೂರ್ಣಗೊಳಿಸಲಾಗುತ್ತದೆ. ಹೀಗೆ ಶುದ್ಧೀಕರಿಸಿದ ಕುಡಿಯುವುದಕ್ಕೆ ಹೊರತಾಗಿಸಿ ನೀರು ಕೃಷಿ, ತೋಟಗಾರಿಕೆ, ಶೌಚಾಲಯ, ಸ್ವಚ್ಛತೆಗೆ ಬಳಸಬಹುದಾಗಿದೆ.

"ಕೊಳಚೆ ನೀರು ಶುದ್ಧೀಕರಣ ಘಟಕದ ಬಳಿ ಒಂದು ರಾಕ್ ಗಾರ್ಡ್‌ನ್ ನಿರ್ಮಿಸಲಾಗುವುದು. ಈ ನೀರನ್ನು ಅಲ್ಲಿನ ಸಸ್ಯಗಳಿಗೆ ಬಳಸಲಾಗುವುದು. ಈ ರಾಕ್ ಗಾರ್ಡನ್ ಯಾತ್ರಾರ್ಥಿಗಳು ಮತ್ತು ಪ್ರವಾಸಿಗರಿಗೆ ಪ್ರಮುಖ ಆಕರ್ಷಣೆಯಾಗಲಿದೆ"ಎಂದು ಹಾಸನ ಜಿಲ್ಲಾಧಿಕಾರಿ ರೋಹಿಣಿ ಸಿಂಧೂರಿ ಅವರು ತಿಳಿಸಿದ್ದಾರೆ.