ಚನ್ನಪಟ್ಟಣ: ಕರ್ನಾಟಕ ಲಾಕ್ ಡೌನ್ ಹಿನ್ನೆಲೆಯಲ್ಲಿ‌ ಬಿಗಿ ಕ್ರಮ ವಹಿಸಿರುವ ತಾಲ್ಲೂಕು ದಂಡಾಧಿಕಾರಿ ಸುದರ್ಶನ್, ಪೌರಾಯುಕ್ತ ಶಿವನಂಕಾರಿಗೌಡ ಮತ್ತು ಡಿವೈಎಸ್ಪಿ ಓಂಪ್ರಕಾಶ್ ರವರು ಒಗ್ಗೂಡಿ ಕಾರ್ಯಾಚರಣೆಗೆ ಇಳಿದಿದ್ದು ಕಟ್ಟುನಿಟ್ಟಿನ ಕ್ರಮ ಕೈಗೊಂಡಿದ್ದಾರೆ.

*ಬೆಂಗಳೂರಿಗೆ ನಿಷೇಧ*

ಜಿಲ್ಲೆಯ ಗಡಿ ಭಾಗಗಳಲ್ಲಿ ಚೆಕ್ ಪೋಸ್ಟ್ ನಿರ್ಮಿಸಿದ್ದು ಕೋಲೂರು ಮತ್ತು ಕಣಿಮಿಣಿಕೆ ಗ್ರಾಮಗಳ ಬಳಿ ಬೆಂಗಳೂರಿಗೆ ಸಾಮಾನ್ಯವಾಗಿ ಹೋಗುವವರರನ್ನು ತಡೆ ಹಿಡಿದು ವಾಪಸ್ಸು ಕಳುಹಿಸುತ್ತಿದ್ದು ನಗರಕ್ಕೆ ಆಗಮಿಸುತ್ತಿರುವ ವಾಹನಗಳನ್ನು ತಡೆ ಹಿಡಿದು ವಿಡಿಯೋ ಮಾಡಿಕೊಳ್ಳುತ್ತಿದ್ದಾರೆ.

*ಕಂಡ ವಾಹನಗಳಿಗೆಲ್ಲಾ ಕೈ ತೋರುವ ಪ್ರಯಾಣಿಕರು*

ಸಾರಿಗೆ ಮತ್ತು ರೈಲು ಸಂಚಾರದ ನಿಷೇಧವಿರುವುದರಿಂದ ನಗರದ ಷೇರು ಹೋಟೆಲ್, ಸಾತನೂರು ಸರ್ಕಲ್, ಬಸ್ ನಿಲ್ದಾಣದ ಮುಂಭಾಗ, ಎಸ್ ಬಿ ಎಂ ನಿಲ್ದಾಣ ಹಾಗೂ ಮಂಗಳವಾರಪೇಟೆ ಯ ಹೆದ್ದಾರಿಯ ಬದಿಯಲ್ಲಿ ಊರಿಗೆ ತೆರಳಲು ಪ್ರಯಾಣಿಕರು ಕಣ್ಣಿಗೆ ಕಾಣುವ ಎಲ್ಲಾ ವಾಹನಗಳಿಗೂ ಕೈತೋರಿ ನಿಲ್ಲಿಸುವಂತೆ ಮನವಿ ಮಾಡುತ್ತಿದ್ದು, ಬಹುತೇಕ ಖಾಸಗಿ ವಾಹನಗಳೇ ಹೋಗುತ್ತಿರುವುದರಿಂದ ಹಾಗೂ ಮಹಾಮಾರಿಯಿಂದ ತಪ್ಪಿಸಿಕೊಳ್ಳಲು ಯಾವುದೇ ವಾಹನಗಳು ನಿಲ್ಲಿಸದೇ ಪ್ರಯಾಣಿಕರು ಪರದಾಡುತ್ತಿರುವುದು ಕಂಡುಬರುತ್ತಿತ್ತು.

*ಹಬ್ಬದ ಖರೀದಿ ಜೋರು*

ಯುಗಾದಿಯ ಮುನ್ನಾ ದಿನವಾದ ಇಂದೂ ಸಹ ನಗರದ ಜೆಸಿ ರಸ್ತೆ ಮತ್ತು ಎಂಜಿ ರಸ್ತೆಯಲ್ಲಿ ವ್ಯಾಪಾರ ವಹಿವಾಟು ನಡೆಯಿತು. ಅದರಲ್ಲೂ ಬೀದಿ ಬದಿಯ ವ್ಯಾಪಾರಿಗಳ ಭರಾಟೆ ಹೆಚ್ಚಾಗಿದ್ದು ಹೂವು, ಹಣ್ಣು, ಬಟ್ಟೆ ಮತ್ತು ಪೂಜಾ ಸಾಮಗ್ರಿಗಳನ್ನು ಜನ ಖರೀದಿಸಲು ಮುಗಿಬಿದ್ದಿದ್ದರು.

*ತಹಶಿಲ್ದಾರ್, ಪೌರಾಯುಕ್ತ ಮತ್ತು ಪೋಲೀಸರು*

ನಗರದಲ್ಲಿ ಹೆಚ್ಚು ಜನಸಂದಣಿ ಉಂಟಾಗದಂತೆ ಕ್ರಮ ಕೈಗೊಳ್ಳುವ ನಿಟ್ಟಿನಲ್ಲಿ ದಂಡಾಧಿಕಾರಿ ಸುದರ್ಶನ್ ಮತ್ತು ಪೌರಾಯುಕ್ತ ಶಿವನಂಕಾರಿಗೌಡರು ಒಂದೇ ವಾಹನದಲ್ಲಿ ಸಂಚರಿಸಿ ನಗರದ ಬೀದಿಬದಿಯ ವ್ಯಾಪಾರಿಗಳಿಗೆ ಹಾಗೂ ಗ್ರಾಹಕರಿಗೆ ತಿಳುವಳಿಕೆ ನೀಡಿದರು. ಇವರ ಜೊತೆಗೆ ಡಿವೈಎಸ್ಪಿ ಓಂಪ್ರಕಾಶ್ ಆದೇಶದ ಮೇರೆಗೆ ಪೋಲಿಸ್ ಗಸ್ತು ವಾಹನ ಮತ್ತು ಸಿಬ್ಬಂದಿಗಳು ಗುಂಪುಗೂಡುವ ಮಂದಿಯನ್ನು ಚದುರಿಸಿ ಕಳುಹಿಸುತ್ತಿದ್ದರು.

*ಸಾರ್ವಜನಿಕ ಆಸ್ಪತ್ರೆಯಲ್ಲಿ ಕರೋನಾ ರೋಗಿಗಳಿಗೆ ವಿಶೇಷ ನಿಗಾ*

ಸಾರ್ವಜನಿಕ ಆಸ್ಪತ್ರೆಯ ಅಧೀಕ್ಷಕ ಡಾ ಮಹೇಂದ್ರ ಮತ್ತು ತಾಲ್ಲೂಕು ವೈದ್ಯಾಧಿಕಾರಿ ಡಾ ರಾಜು‌ ನೇತೃತ್ವದಲ್ಲಿ ಕೊರೊನಾ ವೈರಸ್ ರೋಗಿಗಳಿಗೆ ಮಾಹಿತಿ ನೀಡಲು ವಿಶೇಷ ಕ್ಯಾಬಿನ್ ರೂಪಿಸಿದ್ದು, ರೋಗಿಗಳನ್ನು ಸಂದರ್ಶಿಸಿ, ರೋಗ ದೃಢ ಪಟ್ಟರೆ ತಕ್ಷಣವೇ ನೇರವಾಗಿ ಕಾಯ್ದಿರಿಸಿದ ವಾಡ್೯ಗೆ ಹೋಗಲು ನೆಲದ ಮೇಲೆ ಬಾಣದ ಗುರುತು ಹಾಗೂ ಫಲಕಗಳನ್ನು ಅಳವಡಿಸಿದ್ದು ಮುನ್ನೆಚ್ಚರಿಕೆಯ ಕ್ರಮಗಳನ್ನು ಕೈಗೊಂಡಿರುವುದಾಗಿ ಡಾ ಮಹೇಂದ್ರ ಮಾಹಿತಿ ನೀಡಿದರು.

*ಸನ್ಮಿತ್ರ  ಪತ್ರಿಕೆಯ ಆಶಯ*

*ಈ ವರ್ಷದ ಯುಗಾದಿ ಹಬ್ಬದ ಹರ್ಷ ಕ್ಷೀಣಿಸಿದ್ದು, ಕರೋನಾ ಎಂಬ ಮಹಾಮಾರಿ ಯ ಕೈ ಮೇಲಾಗುವ ಸಾಧ್ಯತೆ ಹೆಚ್ಚಾಗುತ್ತಿದ್ದು, ಆರೋಗ್ಯ ಚನ್ನಾಗಿದ್ದರೆ ಮುಂದಿನ ವರ್ಷ ವಿಜೃಂಭಣೆಯಿಂದ ಹಬ್ಬ ಆಚರಿಸಬಹುದು. ಹಬ್ಬದ ಸಡಗರ ಬಿಟ್ಟು ಕರೋನಾ ತಡೆಗಟ್ಟುವ ಮೂಲಕ ತಮ್ಮ ಆರೋಗ್ಯವನ್ನು ಕಾಪಾಡಿಕೊಳ್ಳಿ ಎಂದು ಪತ್ರಿಕೆಯ ಆಶಯವಾಗಿದೆ.*

ಗೋ ರಾ ಶ್ರೀನಿವಾಸ...

ಮೊ:9845856139.