ಹಳೆ ಮೈಸೂರು ಭಾಗಕ್ಕೆ ನೀವೆ ನಾಯಕರು, ಗೆದ್ದಲ್ಲಿ ನೀವೂ ಸಹ ಮಂತ್ರಿ ಮಂಡಲದಲ್ಲಿ ಸ್ಥಾನ ಪಡೆಯುವಿರಿ ಎಂದು ಹೇಳಿ ಬಿಜೆಪಿಗೆ ಯೋಗೇಶ್ವರ್ ರವರನ್ನು ಕರೆತಂದಿದ್ದ ರಾಜ್ಯ ಬಿಜೆಪಿ ನಾಯಕರು ಈಗ ಹಳೇ ಮೈಸೂರು ಭಾಗದಲ್ಲಿ ನಾನೇಳಿದರವರಿಗೆ ಟಿಕೆಟ್ ಕೊಟ್ಟಿಲ್ಲ ಎನ್ನುವ ಕಾರಣಕ್ಕೆ ಪಕ್ಷೇತರರಾಗಿ ಸ್ಪರ್ಧಿಸಲು ನಿರ್ಧಾರಿಸಿದ್ದಾರೆ ಎನ್ನುವ ಸುದ್ದಿ ಚನ್ನಪಟ್ಟಣದಾದ್ಯಂತ ಹರಿದಾಡುತ್ತಿದೆ.

ಹಳೇ ಮೈಸೂರು ಭಾಗದಲ್ಲಿ ಮೈಸೂರು, ಕೊಡಗು, ಬೆಂಗಳೂರು ನಗರ ಕ್ಷೇತ್ರದ ಕೆಲವು ಕ್ಷೇತ್ರಗಳನ್ನು ಹೊರತುಪಡಿಸಿದರೆ ಹೆಚ್ಚು ಕ್ಷೇತ್ರಗಳು ಜೆಡಿಎಸ್ ಮತ್ತು ಕಾಂಗ್ರೆಸ್ ಪಕ್ಷದವು. ನಾನೊಬ್ಬ ರಾಜ್ಯದ ಸಮರ್ಥ ನಾಯಕ ಎನಿಸಿಕೊಳ್ಳಲು ಇದೇ ಸುಸಮಯ ಎಂದು ಹೊರಟ ಯೋಗೇಶ್ವರ್ ಗೆಲ್ಲುವ ಕ್ಷೇತ್ರಗಳಾದ ಮೈಸೂರು ಮತ್ತು ಕೊಡಗಿಗೂ ಕಾಲಿಟ್ಟರು.

ಇದನ್ನು ಸಹಿಸದ ಸಂಸದ ಪ್ರತಾಪ್ ಸಿಂಹ ಹಾಗೂ ಹಲವಾರು ನಾಯಕರು ಅವರನ್ನು ನಮ್ಮ ಕ್ಷೇತ್ರಗಳ ಕಡೆ ಕಾಲಿಡದಂತೆ ನೋಡಿಕೊಂಡಿದ್ದು ಗುಟ್ಟಾಗಿ ಉಳಿಯಲಿಲ್ಲ.

ಅಷ್ಟರಲ್ಲಾಗಲೆ ಹಳೆ ಮೈಸೂರು ಭಾಗ ಹಾಗೂ ರಾಜ್ಯ ನಾಯಕರ ಸ್ಥಾನದಲ್ಲಿ ಕಲ್ಪಸಿಕೊಂಡಿದ್ದ ಯೋಗೇಶ್ವರ್ ಅಲ್ಲಿನ ಸ್ಥಳೀಯ ನಾಯಕರನೇಕರಿಗೆ ಟಿಕೆಟ್ ಕೊಡಿಸುವ ಭರವಸೆ ನೀಡಿದರೆನ್ನಲಾಗಿದೆ.

ಯಾವಾಗ ಇವರು ಕೇಳಿದ ಒಬ್ಬರಿಗೂ ಬಿಜೆಪಿ ಹೈಕಮಾಂಡ್ ಟಿಕೆಟ್ ನಿರಾಕರಿಸಿದ್ದರಿಂದ ಬೇಸತ್ತು  ಸೋಮವಾರ ಬೆಳಿಗ್ಗೆ ಹನ್ನೊಂದು ಗಂಟೆಗೆ ಬಿಜೆಪಿ ಪಕ್ಷದಿಂದ ಒಂದು ಹಾಗೂ ಪಕ್ಷೇತರರಾಗಿಯೂ ಒಂದು ನಾಮಪತ್ರ ಸಲ್ಲಿಸಲು ಮುಂದಾಗಿದ್ದಾರೆಂದು ದೃಶ್ಯ ಮಾಧ್ಯಮದ ಜೊತೆಗೆ ಅನೇಕ ಜನರ ಬಾಯಲ್ಲಿ ಹರಿದಾಡುತ್ತಿದೆ.

ಒಂದೇ ಕಲ್ಲಿಗೆ ಎರಡು ಮತ್ತೆರಡು ಹಕ್ಕಿ ಹೊಡೆಯುವ ಹುನ್ನಾರ:

ಬಿಜೆಪಿಯ ಪಕ್ಷದಲ್ಲಿ ನಾನೊಬ್ಬ ಸಮರ್ಥ ನಾಯಕ ಎಂದು ಗುರುತಿಸಿಕೊಳ್ಳಲು ಇದೊಂದು ಸದಾವಕಾಶ ಎಂದು ನಂಬಿರುವ ಯೋಗೇಶ್ವರ್ ಮುಂದಿನ ದಿನಗಳಲ್ಲಿ ನನ್ನ ಮಾತು ನಡೆಯಬೇಕು ಎನ್ನುವ ಕಾರಣದಿಂದ ಬೆದರುಬೊಂಬೆಯ ಪ್ರದರ್ಶನದಂತೆ ಬಿಜೆಪಿ ಮತ್ತು ಪಕ್ಷೇತರರಾಗಿ ಸ್ಪರ್ಧಿಸಲು ಹವಣಿಸುತ್ತಿದ್ದಾರೆ.

ಇಲ್ಲಿ ಮತ್ತೊಂದು  ಗಿಮಿಕ್ ಸಹ ಅಡಗಿದೆ, ಇಂದಿನ ಬಹುತೇಕ ಎಲ್ಲಾ ಸಮೀಕ್ಷೆಗಳ ಪ್ರಕಾರ ಯಾವುದೇ ಪಕ್ಷಗಳು ಸಹ ಪೂರ್ಣ ಪ್ರಮಾಣದಲ್ಲಿ ಅಧಿಕಾರಕ್ಕೆ ಬರುವುದಿಲ್ಲ ಎಂದು ಸಾರಿರುವುದರಿಂದ ಬಿಜೆಪಿ ಪಕ್ಷದಿಂದ ಗೆದ್ದೂ ಪಕ್ಷ ಅಧಿಕಾರಕ್ಕೆ ಬರಲಿಲ್ಲವೆಂದರೆ ಪ್ರಯೋಜನಕ್ಕೆ ಬರುವುದಿಲ್ಲ.

ಪಕ್ಷೇತರನಾಗಿ ಗೆದ್ದು ಬಂದರೆ ಯಾವ ಪಕ್ಷ ಅಧಿಕಾರಕ್ಕೆ ಬಂದರೂ ನನಗೆ ಬೇಡಿಕೆ ಇರುತ್ತದೆ ಎನ್ನುವ ದೂರಾಲೋಚನೆಯನ್ನು ಮಾಡಿದ್ದಾರೆ ಎನ್ನುವುದನ್ನು ಅಲ್ಲಗಳೆಯುವಂತಿಲ್ಲ.

ಚನ್ನಪಟ್ಟಣದಲ್ಲಿ ಜೆಡಿಎಸ್ ನಿಂದ ಹೆಚ್ ಡಿ ಕುಮಾರಸ್ವಾಮಿ ಮತ್ತು ಕಾಂಗ್ರೆಸ್ ನಿಂದ ಹೆಚ್ ಎಂ ರೇವಣ್ಣ ಸ್ಪರ್ಧಿಸಿದ್ದರೂ ಸಹ ಅವರ್ಯಾರು ನನಗೆ ಲೆಕ್ಕವಿಲ್ಲ, ಬಿಜೆಪಿಯ ಹಂಗೂ ನನಗೆ ಬೇಕಾಗಿಲ್ಲ ನಾನು ವ್ಯಕ್ತಿಗತವಾಗಿ ಗೆದ್ದೇ ಗೆಲ್ಲುತ್ತೇನೆ ಎನ್ನುವ ಧೈರ್ಯವಿದ್ದರೂ ಇರಬಹುದು.

ಜೊತೆಗೆ ತನ್ನ ಮಗಳಿಗೂ ಸಹ ಮದ್ದೂರು ಅಥವಾ ಯಾವುದಾದರೂ ಕ್ಷೇತ್ರದಲ್ಲಿ ಟಿಕೆಟ್ ಕೊಡಿಸುವ ಸಂಬಂದ ಹಿರಿಯ ನಾಯಕರ ಜೊತೆ ಮಾತುಕತೆ ನಡೆಸುತ್ತಿದ್ದಾರೆ ಎನ್ಜುವುದು ಕುಟುಂಬ ರಾಜಕಾರಣದಲ್ಲಿಯೂ ತೊಡಗಿಸಿಕೊಳ್ಳಲು ಯತ್ನಿಸುತ್ತಿದ್ದಾರೆಂಬ ಸುದ್ದಿ ಹರಿದಾಡುತಿದ್ದು ಎಷ್ಟರ ಮಟ್ಟಿಗೆ ಸಫಲವಾಗುವುದೆಂದು ಕಾದುನೋಡಬೇಕಾಗಿದೆ.

 

ಗೋ ರಾ ಶ್ರೀನಿವಾಸ...

ಮೊ: 984585613