ಬೆಂಗಳೂರು ಮೈಸೂರು ಹೆದ್ದಾರಿ ನಡುವಿನ ಚನ್ನಪಟ್ಟಣ ಭಾಗವಾದ ಜಾನಪದ ಲೋಕದಿಂದ ಕೋಲೂರು ಗೇಟ್ ತನಕ ಅನೇಕ ತರಹೇವಾರಿ ಮಾಂಸದ ಹೋಟೆಲ್ ಗಳು ಢಾಭಾಗಳು ತೋಟದ ಹೋಟೆಲ್ ಗಳು ತಲೆ ಎತ್ತಿ ನಿಂತಿವೆ.

 

ಫ್ಯಾಮಿಲಿ ಹೋಟೆಲ್ ಎಂದು ಬೋಡ್೯ ನೇತು ಹಾಕಿಕೊಂಡಿದ್ದರೂ ಸಹ ಕುಟುಂಬ ಸಮೇತ ಹೋಗಿ ಊಟ ಮಾಡಲು ಆಗದಷ್ಟು ಮದ್ಯಪ್ರಿಯರು ಪ್ರತಿ ಟೇಬಲ್ ನಲ್ಲಿಯೂ ಎದುರಾಗುವುದರಿಂದ ಫ್ಯಾಮಿಲಿಗಳು ಹೆಚ್ಚು ಶುಲ್ಕದ ದೊಡ್ಡ ಹೋಟೆಲ್ ಗಳು ಅಥವಾ ಸಸ್ಯಹಾರಿ ಹೋಟೆಲ್ ಗಳಿಗೆ ಹೋಗುವಂತಾಗಿದೆ.

ಈ ಬಾರಿಯ ವಿಧಾನಸಭಾ ಚುನಾವಣೆಯ ನೀತಿಸಂಹಿತೆ ಜಾರಿಯಾದನಂತರ ಅಬಕಾರಿ ಇಲಾಖಾಧಿಕಾರಿಗಳು ಹೆದ್ದಾರಿ ಬದಿಯ ಎಲ್ಲಾ ಹೋಟೆಲ್ ಗಳಿಗೂ ಮದ್ಯ ಸೇವನೆ ಮಾಡಿಸಬಾರದಾಗಿ ಕಟ್ಟುನಿಟ್ಟಿನ ಅಪ್ಪಣೆ ಹೊರಡಿಸಿದ್ದಾರೆ.

ನೀವು ಯಾವುದೇ ಹೋಟೆಲ್ ಗೆ ಹೋದ ತಕ್ಷಣ ಅವರು ಮೊದಲು ಹೇಳುವುದೇ ಸರ್ ಡ್ರಿಂಕ್ಸ್ ಮಾಡೋ ಹಾಗಿಲ್ಲ, ಅಂತಾ, ಅದೂ ಅಲ್ಲದೆ ನೀವು ಕೇಳದೆ ಇದ್ದರೂ ಅವರು ಮೊದಲೇ ಹೇಳುತ್ತಾರೆಂದರೆ ಅದು ಪ್ರತಿನಿತ್ಯ ನಡೆಯುವ ಒಂದು ದೊಡ್ಡ ವಹಿವಾಟು ಎಂಬುದು ವೇದ್ಯವಾಗುತ್ತದೆ.

ಕಾನೂನು ಬಾಹಿರ ಎಂದು ಗೊತ್ತಿದ್ದು ಸಹ ಮದ್ಯಸೇವನೆಗೆ ಅವಕಾಶ ಮಾಡಿಕೊಡುವ ಹೋಟೆಲ್ ಮಾಲೀಕರು ಒಂದು ಕಡೆಯಾದರೆ ಅನುಮತಿ ಕೊಡಲು ಬರುವುದಿಲ್ಲ ಎನ್ನುವ ಕಾನೂನು ಅಧಿಕಾರಿಗಳಿಗಿದ್ದರೂ ಸಹ ಒಳ ಒಪ್ಪಂದ, ಹಾಗೂ ಕೊಡುಕೊಳ್ಳುವ (ಮಾಮೂಲು) ಅಲಿಖಿತ ನಿಯಮದಂತೆ ಇದು ಎಲ್ಲಾ ರಸ್ತೆಬದಿ ಹಾಗೂ ಹಳ್ಳಿಗಳ ಗೂಡಂಗಡಿಗಳಲ್ಲಿ ಯಥೇಚ್ಛವಾಗಿ ನಡೆಯುತ್ತಿರುವುದು ಸಹ ಅಷ್ಟೇ ಬಹಿರಂಗ ಸತ್ಯ.

ಅಬಕಾರಿ ಅಧಿಕಾರಿಗಳೇ ಚುನಾವಣೆ ಮುಗಿದ ನಂತರವೂ ಇದೇ ಕಟ್ಟುನಿಟ್ಟಿನ ಕಾನೂನನ್ನು ನೀವು ಏಕೆ ಸಡಿಲುಸುತ್ತೀರಿ ?

 

ಏಕೆ ಮುಂದುವರಿಸುವುದಿಲ್ಲಾ ?

 

ಕುಟುಂಬದ ಸದಸ್ಯರೆಲ್ಲರೂ ಹೋಗಿ ಕೂತು ಊಟ ಮಾಡಿ ಬರುವ ನಿರ್ಭಯ ವಾತಾವರಣವನ್ನು ಸೃಷ್ಟಿಸುವ ಮೂಲಕ ನೀವುಗಳು ನಿಮ್ಮ ಜವಾಬ್ದಾರಿಯನ್ನು ನಿರ್ವಹಿಸಿದರೆ ಜನಮಾನಸದಲ್ಲಿ ನೀವು ಅಜರಾಮರಾಗುವಿರಿ,

 

ನಿಮ್ಮ ವೈಯುಕ್ತಿಕ ಚಂಚಲತೆಗಾಗಿ ಕಾನೂನನ್ನು ಸಡಿಲಿಸಿ ಹೋಟೆಲ್ ಗಳಲ್ಲಿ ಮದ್ಯ ಸೇವನೆಗೆ ಅನುವು ಮಾಡಿಕೊಟ್ಟರೆ ಮುಂದೊಂದು ದಿನ ಹೆಚ್ಚು ಬೆಲೆ ತೆರಬೇಕಾದ ಸ್ಥಿತಿ ನಿರ್ಮಾಣವಾಗುತ್ತದೆ.

 

ನೀತಿ ಸಂಹಿತೆಯ ಭಾಗವಾಗಿ ವಿಧಿಸಿರುವ ಕಾನೂನನ್ನು ಮುಂದುವರೆಸುತ್ತೀರಿ ಎನ್ನುವ ಭರವಸೆಯನ್ನು ಮರ್ಯಾದಸ್ತ ಆಹಾರ ಪ್ರಿಯರು ಹೊಂದಿದ್ದಾರೆ.

 

ಗೋ ರಾ ಶ್ರೀನಿವಾಸ...

ಮೊ: 9845856139.